ISAIA 18 - Khumi Common Language Bible

Ethiopia pri y Areng my pajeng ai nai satang

¹ Ethiopia tavochi kamlem mang y pakhi takhym nai katynchi thai nai pri harei awm.

² Huni pri i savaichi ly japang uipo hawi sa nai paleaungchi hawi, Naing tavo ahu kathiu u nai ne. Nangchi rang parai nai savaichi awi, nangmychi i saleaung khuteng mang y vawi u! Naing tavo syh mang y awm nai khaileaung pri vereichi my jei iy sa thai naira awm nai, mo-cha hawi iy jeng asang nai, nangchi i pri khumichi teng y hini satang syn u.

³ Khaileaung pri y awm nai khumi bawibawichi awi, khaileaung salo y awm u nai khumi bawibawichi awi, tangai u! Mawi saleungra y pado ai nai ka-ma-ra tamkhawn ai khen angdeang u!

⁴ Baw eng nai katyn kano patheung u! Areng my kai teng y, “Amti amjang tyn nai neng i bi pahui nai dym y, kadamchi tla rypsy nai kamta py, khri pa-rei bi nai neng kani khala kanito ly chai pan naimy angvang phang nai kamta py, kai ly kani pri mang dengdairei chymme naimy khen kathiu ai.

⁵ Kreip athaichi pakym y rai khala y, pauchi vui i athaichi myn nai neng khala y, haisau hawi kreip changpichi ai jadeu naimy ateng pawn nai kamta, Ethiopia chengchi ai paleung ka-e my tamyh pawn ai.

⁶ Huni khumichi i veuchi ly tavochi hawi daichi mawi kasichi i vui teicha lawm ai. Kanipui khala tavochi hawi, kaseih neng khala daichi mawichi ly huni khumi veuchi cha u ai.

⁷ Tavochi kangpreira y awm nai huni pri i dengdairei py, kho-ban atho len nai huni khumi chengchi teng i dengdairei py, mo-cha hawi jeng asang nai huni pri khumichi teng i dengdairei py, khaileaung pri vereichi my jei hyn nai khumi teng i dengdairei py, kapathyprachi ai, ati cheaungkhang sa thai nai keung Areng my kawn pi nai neng kani tym ai. Huni khumichi ly ati cheaungkhang sa thai nai keung Areng ai chiu ai nai Zion mawi y jeu u ai.