ISAIA 15 - Khumi Common Language Bible

Moba pri ai Areng my tamyh ai nai satang

¹ Hini leu pei nai ly Moba pri i vui ne. Ara mary hawi Kira mary ly vumrei y my phra nai ne. Moba pri py savai tlang na bo.

² Dibon mary i khumichi ly myn chiu nai meingtymra y chei u iy, vo tangam ai nai mawi saleung y lyn u. Moba pri i khumichi py Nebo mary hawi Medeba mary i vui paleung si nai deaungkho y vo hang u nai ne. Nichi ly paleung si nai ka-ma-ra sam hawi labeaung muichi vau pawn.

³ Lamchira y awm nai khumichi ly paisiu akhiu u nai ne. Khaileaung ka-hochi hawi yhm amphuchi salo y py, paleung si nai patei iy vo u bo.

⁴ Hesabon mary hawi Elealeh mary i khumichi ly vo hang u i, nichi i vo nai raawi ly Jaha mary mang y khrairei thai nai deaungkho y, Moba tavaimichi malawn py kaso tahyn theu u i, jei u nai ne.

⁵ Kai ly Moba pri i vui vo tangam bo! Mipuichi ly Zorath mary Ekalath Shelishija ryrei preang u. Phyrei khumichi ly meikatui tla naimy, Luhith mawi lam kataw lyn u bo. Phyreichi ly paleung si vo hang naimy, Horonam mary mang y preang u nai ne.

⁶ Nimarim tavo micheaung ly tui kang pawn nai y, tavo micheaung peang i awm nai achachi py jei pawn i, suino naira ati sai py by y leang bo.

⁷ Khumichi ly mychi i vawnsai awm nai ngierei syn u iy, paijeaung keung leaunghawi tako prei iy preang u ai nai atho sa u.

⁸ Moba pri khujyh tengtangra y vo tangam nai raawi thai u bo. Huni raawi ly Ekalaim mary hawi Berelim mary mang malawn py thai u nai ne.

⁹ Dibon mary tavo tui ly thichi hawimy pasen na bo. Tameuh py huni mary i khumichi i vui, hawi y keh nai ka-jeira khai pi rym nai ne. Moba pri y awm asai rai nai khumi ngiereichi ly huni meingtym y pahyp y naimy atleh ahum nai avum u ai.