ISAIA 1 - Khumi Common Language Bible

¹ Hini cha-iu theung y Juda samrangchi napi nai Uzia samrang, Jotham samrang, Ahaz samrang hawi Hezekia samrangchi i deung y Juda pri hawi Jerusalem mary tlang tleaung y ati mana tym ai mo, nanai Amoz i chapo Isaia teng y Tameuh my pei nai amo leuchi abawi nai ne.

Tameuh my mymy i khumichi ai khri pa-rei parip patyp nai

² Areng my, “Khaileaung hawi kani khusangchi awi, kai i leu pei nai tangai u! Kaimy pacho panei nai deaungdichi ly ang tiu u lawh bo.

³ Si hawi painochi ly yhmkeung ai pany; keaungngo kano kasauchi py yhmkeung i keaungngo hai, mychi i yhmkeung my teicha patlai nai meingtymchi pany. Na i py kai i khumi Israela chengchi ly huna tanrei pany u y. Nichi ly pany thai u y na ly” napi.

⁴ Nangchi kamngo sa nai khumichi awi, sa tamang reng nai khumi kamngochi awi! nangchi ly taham si u bo. Nangchi ai ly kamngo mynji my ang ti cheng na lawh bo ly! Israela chengchi i chai parai nai Areng Tameuh ai khai su iy, mymy ai nithun thun u vui bo.

⁵ Nangchi ly ati mana nai y tiu u veangveang lawh mo? Vai i tleaung y lenra nai kamngo pajeng naira avum ai nai ngai u lawh a? Nangchi Israela mipuichi awi, nangchi i luchira y tamo kalem kawi na bo. Nangchi i paleung pathym py phra u na bo.

⁶ Kheupadawi dengdairei lu tym pa-rei, nangchi i tlang bom verei ly tamo kalem chym y na bo. Abei ako nai tamochi, tamo kangtha, kangngymchi hawimy kawi nai ne. Huni tamo kalemchi ai pasawp iy kanih hawi bam y rai, asi py so y rai.

⁷ Nangchi i pri ly phra iy nangchi i marychi py, maidym satlawi lawm vui bo. Nang khen nai thym khala my py, pri takhra khumichi ly nangchi i khu peang vui iy, ati cheaungkhangchi ai phra hai pawn bo.

⁸ Katanmeuh naira avum nai Jerusalem mary harei naini awm khyh bo. Huni mary ly mymy i vui amtang pajau y nai kreip akho typ nai tai kamta py, pajawi bai typra tai kamta py lawm nai ne.

⁹ Ati cheaungkhang sa thai nai keung Areng my naini, mary i khumi phyreichi ai dei kamthum khai pi mailai y lawh teu i khyly, Jerusalem mary ly Sodom mary hawi Komora mary kamta, taphra naira avum ai nai ne.

¹⁰ Aw Jerusalem mary, nang ai peang nai samrangchi hawi nang i mary khumichi ly Sodom mary hawi Komora mary i khumichi hawi atawm. Nang ai Areng my leu pei nai tangai ba. Achi i Tameuh my parip nai tangai ba.

¹¹ Mymy ly “Nangchi avaw avawrei talam nai kapathyprachi ai kai aly ngai,” nanai athang khai u a? Nangchi i leng patlum nai beramchi hawi tawnbawichi i thauchi paleih na bo. Si, beram, mi-ichi i thichi ai py, kai paleung no y leang bo.

¹² Nangchi kai teng y chiu sa ai nai jeu u nai khala y, hunichi syn u ai nai tla, nanai nangchi ai ami my leu pei mo? Ami my nangchi ai kai i Achura yhm mang y tako nai a-i mengmeaung hai lawh mo?

¹³ Nangchi i ati sai py ny y nai kapathyprachi ai kai, aly ngai bi y leang bo. Nangchi i talam nai mui katui kamuichi ai kai paso. Nangchi i lo si pawi kanichi, anawn kanichi hawi reita pawi kanichi ai kapaso. Nangchi i kamngo nai molam y, hunichi ly tamang piupa na veng bo.

¹⁴ Nangchi i lo si pawi kanichi hawi kani kachaichi ai kai, kaniu ngai y. Huni kanichi ly kai pho ai ngai y nai myn kaji ne.

¹⁵ “Nangchi kiu pheu iy chiu sa u nai khala y, kai ly nangchi mang y hi iy kang khen pi ai ny y. Nangchi i kiuchi ly kamngo thi akau nai deaungkho y, nangchi mana tanrei ham parai naimy chiu sa u teu i py, kang tangai pi ai ny y leang.

¹⁶ Nangchi i paleung chai pa-rei so u. Kai i mo y nangchi i sa tamang naichi anawn u. Hawi y sa naichi anawn iy

¹⁷ kahawi so u. Ana piupa naira avum nai khumichi ai sabawm iy, nuro nukai chochi hawi lumai cheaungtichi i nga ai avo naichi ai ama hai nai hawimy, tara leu reita my peang nai awm pa-rei so u,” napi.

¹⁸ Areng my, “Vai, nangchi i sa nai sai adawn pasym u sina. Nangchi ly kamngo thi akau naimy awm. Na i py kai ly nangchi ai ji amai kamta kaleung pa-rei paju pachai pi ai. Nangchi ly kamngo thi hawi pasen na teu i py, palopi kamta kaleung hai ai.

¹⁹ Nangchi ly kai i leu tangai lawh teu i khyly, khaileaung i theu nai amti amjang kahawichi cha ai nai nga u ai.

²⁰ Na i py kai i leu tangai ai nai akhi vui iy, kai ai amtang u lawh ai nabaly nangchi ly myh kang u ai. Hini ly kai Areng my leu pei nai ne,” napi.

Khri pa-rei kamngo sa nai mary

²¹ Vaichi khala ka-ym awm nai mary ly vai i neng y bimanu kamta lawm veng lawh bo ly! Vaichi khala huni mary theung y khumi kahawichi awm u nai ne teu i py, vai ly khumi ai padei naichi naini awm khyh bo.

²² Aw Jerusalem mary, nang ly vaichi kha tangka hawi atawm. Nang ly vang teng y nai lawm veng bo. Vaichi khala nang ly kreip hang kahawi hawi atawm. Vai ly tui lawm angchi khyp veng bo.

²³ Nang i miteaung kehchi py langmeang thau naichi, kangviu ai atho pei naichi lawm u bo. Nangchi ly un langseaungchi la u teu i py, Tara jeungra y nuro nukai chochi ai amo hai u y. Lumai cheaungtichi i ka-jo ka-thuichi ai py, tangai iy chih pi y.

²⁴ Hunai deaungkho y sa thai naira angym nai Israela chengchi i Tameuh, ati cheaungkhang sa thai nai keung Areng my leu pei nai vai, tangai ba. Mymy ly “Kai ly kaimy i paleung ka-e napi nai nangchi ai vawitheung tha ai i, nangchi ly kai ai mana mo i py, khrukhra hai pajau ai ny y.

²⁵ Kai ly nang ai bawi la iy kang pajeng ai. Tamo ngan ai pachai nai kamta, nang i kakhawi kangjenchi py pachai iy, nang ai kachai sa ai.

²⁶ Jangni i kamta nang teng y lu sa naichi hawi tau pei nai bangtangchi kang pei ai. Hunaibaly Jerusalem mary ai khumi kahawichi i reita angym nai mary, ka-ym awm nai mary, nanai amyn pathi ai,” napi.

²⁷ Areng ly hawi nai deaungkho y, mymy ly Jerusalem mary hawi uikheih nai khumi ngiereichi ai atleu ai.

²⁸ Na i py mymy ly kamngo sa nai khumi hawi mymy ai tiu nai khumi bawibawichi ai tamyh pawn ai. Mymy ai khai su nai khumi ngiereichi ai tamyh ai.

²⁹ Nang ly dengkeaung keungchi ai chiu lawh nai deaungkho y, chiu ai nai akho baichi sa lawh nai deaungkho y, paleung si naira avum ai.

³⁰ Nang ly dei enten nai ngopraibiu keung hawi, tui lei y nai akho bai kamta jei rawm vui ai.

³¹ Dengkeaung kadei ly mai kali deaungkho y, mai amtawi nai kamta phum-ang len nai khumichi py, mychi i kamngochi deaungkho y phra u ai. Huna nai phra naira ai ly ami py paka ai nai nga ai ny y,” nanai thui bo.