II TIMOTHEI 2 - Khumi Common Language Bible

Isu Krista y ka-ym awm nai tavaimi risa

¹ Hunaibaly kai i chanau awi, nang ly Krista Isu y awm nai pahenra deaungkho y ham naira nga ryh nga ryh nai awm ba.

² Naibaly pany nai keung neangneangchi i mo y kai labeaung i leu atiti nang thai nai ly ka-ym awm nai khumi, khumi takhrachi ai patiu pateang pajau ai naichi teng y au.

³ Krista Isu i tavaimi hawi parai nai kamta patang naira y kai kamta kham kyh ba.

⁴ Tavai mi ami py ni ai tavaimi y awm ai nai vawi nai keung ai ly kawn hai ai nai, atiu nai thym khala y ly vai i heng nai sala kani tleirei i sa nai sai amymy ai paka ai nai pei y.

⁵ Naibaly ami my angpreng acham naira y angpreng teu i py, reita kamta angpreng y baly ni ai areng lukhum amym hai ai nai awm vai y leang.

⁶ Hlau sa akawm nai keung ly athai nga man nai keung lawn ai nai tla.

⁷ Kai i leu thui nai ly dawn cham: Areng my ly ati cheaungkhangra y pany thai naira ang pei ai.

⁸ Kai i Satang Kahawi leu thui nai kamta, Davida i kangpreang i nai theu nai, kadeich theung i dengdairei angthau bi nai Isu Krista ai ly pany jo;

⁹ kai ly huni Satang Kahawi deaungkho y atiti hawi y sa nai keung kamta kawm ai ka-lawn pa-rei patang naira kakham nai ne; na i py Tameuh i leu ly kawm nai ny y leang.

¹⁰ Hunai deaungkho y vawi takhra naichi ly Krista Isu y paheng naira ly deungtasarei nang parai naira hawi vanrei nga u thai ai nai, nichi deaungkho y kai ly ati cheaungkhang kakham.

¹¹ “Achi ly mymy hawi dei chum nai awm baly, Achi ly mymy teng y heng teang ai,

¹² Achi ly kham baly, Achi ly mymy hawi vanrei peang ai; Achi ly mymy ai apha baly Mymy py achi ai apha teang ai;

¹³ Achi ly ka-ym by y nai awm teu i py, Mymy ly ka-ym awm nai awm jojo, Mymy ly amymy ai apha pajau y,” nanai leu ly ka-ym awm nai ne.

Tameuh i kangai kalop sa nai keung kahawi

¹⁴ Huni atiti leu ly nichi ai dawn hai vau; ati sai py chawn y naimy, tangai nai keungchi ai taphra ai nai leu rumrang naira aei u y ai nai Areng i mei ka-niu y leu pei.

¹⁵ Leu meitang hawi parai naimy teaung nai, kalop sa nai keung kaji ai tlo y nai kamta, sa avo nai keung y Tameuh teng y apei ai nai hawihai adawn.

¹⁶ Na i py Tameuh ai tahm khai y nai leu thui rumrang nai ai ly hi pi veng; hunai kamta thui naichi ly Tameuh ai dawn y naira mang y ty ra ty ra ai i,

¹⁷ mymychi i leu ly angvawi hawi y parai nai kamta angdai ryh angdai ryh ai; mymychi theung y Humenai nini Phileta abawi hawi nai ne;

¹⁸ nini ly “Angthau bi nai ly vai py ne palai veng bo,” na hawi iy, leu meitang lam ai ly tako hawi akawi veng i, phyreichi i ym naira ai ly atlym hai bo.

¹⁹ Na i py Tameuh i lengseaung leng nai kakhaw my ly awm jojo iy, hini pajawp typ nai ka-ma-ra ne i, “Areng ly mymy i khumichi ai ly ang pany,” nanai hawi, “Areng i amyn palau nai ngiereichi ly hawi y sa naira aheng u sy,” nanai py ne.

²⁰ Na i py yhm kalen pui y ly muku hawi tangka laawmchi harei khyh ny y naimy, dengkeaung hawi alai laawmchi py awm teang; phyrei ly tahm asang ai nai awm iy, phyrei ly tahm anem naira y awm teang.

²¹ Hunai deaungkho y ami py huni atitichi ra y apachai baly, mymy ly tahm asang nai laawm, khai takhra nai, yhmkeung my teaung ai avo nai, atiti sa ai nai cheaungkhangra y angvei rym nai awm khyp ai.

²² Hunaibaly thawndeang thym khala i ngai phi teng y nairachi ai ly angpreng veng, naibaly paleung kamchym y Areng ai palau nai ngiereichi hawi vanrei hawi naira hawi, ym naira hawi, tamen naira hawi, aly naira py hui jojo.

²³ Na i py aei atyhtyh naira hawi cheng y naira y ly abawi ai nai ngai moh; hunichi ly ajo nairachi tapen lawh veng, nanai nang pany.

²⁴ Areng i miseaung ly ajo ai nai tlo y i, khumi bawibawichi i tlang tleaung y neaung hawi iy patiu nai sai kawp i,

²⁵ hawi y sa naira y kham pajau nai, mymy i patiu nai leu ngai y naichi ai leu anui parai naimy nichi ai patiu lawh ai nai tla;

²⁶ hunaibaly Tameuh my nichi ai leu meitang pany angym ai nai uikhei hai baly nichi ly diabola deaung i nai theu u pajau lawh na: ni ly mymy i ngai nai kamta nichi ai patiu chum veng bo.