II PETERA 2 - Khumi Common Language Bible

Tapawp nai amochi

¹ Na i py khumi humchi theung y ly tapawp nai amochi py theu u reng:hunai kamta nangchi theung y tapawp nai patiu nai keungchi awm ai mang, nichi my ly mymychi ai van nai keung Areng puipui ai malawn py apha vui iy, ang taphra pajau ai nai ym takhra nai leuchi kangviu y kun hai ai i, mymychi i tlang tleaung y tlenrei khyh my tama ai naira angtym hai ai.

² Naibaly khumi neangneangchi ly mymychi i paleaung naira mang i atitichi ly abang u teang ai i, mymychi deaungkho y lam teng parai nai ai ly thui tamawn nai lawn ai.

³ Naibaly nichi ly yhmtheaung ai paleung no nai deaungkho y leu ka-chawi y nangchi ai ang teaung iy kamrancha ai; na i py jangni i dengdairei mymychi i tlang tleaung y leu atlym nai ly kyh chawn y iy, mymychi ai tama hai naira py i ngym y leang bo.

⁴ Ati mana nai mo nabaly kani pri i amtaw thau naichi kamngo sa nai khala y ly Tameuh my nichi ai khai y i, ngari angawm y aphi iy tara chih pi ai khai nai angawm kaveng y paeung baly:

⁵ naibaly mymy ai tahm khai y naichi i awm nai khaileaung pri ai ly tuibai theu hai i, jangni i khaileaung pri ai ly khai y iy, hawi nai leu thui nai keung Nova ai hawi, khumi takhra leaung saryhreichi ai paheng baly:

⁶ naibaly Sodom hawi Komora avang ai ly mymy ai tahm khai y naichi i vui y pany hai naira palawn i maiphu lawn hai iy tama hai naira y pasum baly:

⁷ naibaly khumi kahawi Lota, khumi kamngochi i paleaung parai nai awm nai sai deaungkho y khrikhri pa-rei paleung mawn nai ai ly paheng baly:

⁸ (huni khumi kahawi ly nichi theung y awm iy niu nai hawi thai nai deaungkho y nichi i reita kamta ny y nai atiti sa nai sai ly mymy i paleung kahawi ai kani tleirei khrikhri pa-rei no hai lawh veng:)

⁹ tumbaly Areng ly Tameuh ai dawn ryhryh naichi ai ly parawi naira i dengdairei palawi ai nai hawi, tara chih ai nai kani i vui y hawi y sa naichi ai pajeng ai khai nai py pany chy bo;

¹⁰ tlang i ngai phi teng y nai chai y naira mang y asa nai hawi, aly peang naira tahm khai y naichi ai khai ai nai pany nai tleaung y ang pany ra nai ne. Nichi ly khri pa-rei vam iy mymychi i ngai nai harei dawn khyh i, nang parai nai keungchi ai thui tamawn ai nai kaso theu u vai y:

¹¹ na i py nichi tleaung y ham keh nai hawi sa thai naira awm keh nai kani pri i amtaw thau naichi malawn py Areng i mo y ly nichi molam chih pi nai thui tamawn y.

¹² Na i py hunichi, dawn pasym naira by y nai mawichi kamta patiu ai nai hawi tama hai ai nai tlang y tapen naichi ly ati sai py pany u y naira y thui tamawn iy, mymychi i phra naira y my tama u ai, kamngo vang py nga u takengkei ai;

¹³ kanithun y pawi sa khrukhrala nai ly hawi parai, napi naichi ne; meimai cheh naira hawi anyng akau naichi ne; nangchi hawi vanrei atamen nai pawi cha u iy, saw ala nai tarawi y awm tapawp naichi ne;

¹⁴ nichi i mei ly pajang sa nai kawi iy, kamngo anawn pajau y naichi ne; nichi ly khaw y naichi ai parawi, yhmtheaung ano kawp ha nai paleung py awm; amsawi lawi nai chanauchi ne he!

¹⁵ Nichi ly Bosara i chapo Balam, kamngo sa nai vang ngai parai nai keung i lam y tako chum nai deaungkho y, lam kateng ai ly khai u su i, lam tamang veng bo;

¹⁶ ne mang ly hawi y sa nai deaungkho y ni ai ang parip i, leu katheu thai y nai keaungngo kano kasau my ly khumi i raawi y katheu iy amo i kamthu sa nai sai ai ly kam bo.

¹⁷ Hunichi ly tui by y nai tuikan hawi, tamai ai ali khu my hm naichi ne; hunichi i vui ly kaveng tho kha nai pateung nai bo.

¹⁸ Nichi ly leu rumrang len parai nai thui iy, paleaung nai deaungkho y tlang i ngai phi teng y naira y kamngo y awm naichi theung i dengdairei atleu dudu naichi ai ly parawi;

¹⁹ nichi ai alaw hai naira adeu hai u lawh reng, na i py mymychi kypkyp ly phra naira i miseaungchi ne:ati mana nai mo nabaly khumi ai pajau naira ngierei ly huni khypkhyp ly mymy ai miseaung y palawn lawh reng nai ne.

²⁰ Naibaly nichi ly Areng hawi Paheng Keung Isu Krista ai pany nai deaungkho y khaileaung pri i amnyng naira i nai angpreng vui nai bo y, hunira y ang tang u teang bi iy pajau nai awm makho baly, nichi i kangkhym i awm nai sai ly angchei i tleaung y ly hawi y kehkeh nai ne.

²¹ Nichi ly lam kahawi pany nai bo y, leu pei nai kachai nichi teng y au nai ai hi vui nai tleaung y ly, lam kahawi pany y nai khyly nichi i vui hawi alam ai.

²² “Ui ly mymy i amleu ai cha teang bi nai hawi, eu ly ahiu nai bo y amkai y aho teang bi,” napi nai leu kadawi kacheng teng parai nai leu ly nichi i tlang tleaung y tym nai bo.