II KORINTH 9 - Khumi Common Language Bible

Kristian tengtawi asabawm nai

¹ Khumi kachaichi ai sabawm nai molam y nangchi teng y katajiu ai nai aly by y leang;

² kai ly nangchi i dawn rym nai sai ly pany bo, huni molam y ly Akaia pri y dawn u rym nai ly sanengrei awm bo, nanai kai ly Makedonia pri i khumichi teng y nangchi ai kamlyh bo; hunaibaly nangchi i hawihai palai sa nai ly nichi theung y khumi neangneangchi ai amcheng hai bo.

³ Na i py nangchi ly kai i thui nai kamta khyp angvei u rym naimy awm u thai ai nai, huni molam y kaichi i nangchi ai amlyh nai ly ati sai py ny y nai lawn lawh y ai nai, amjo amnauchi ai kapato bo;

⁴ hu ti y baly Makedonia pri i khumi ami mo kai teng y abang iy nangchi ai angvei u y nai niu lawh baly, nangchi nanai khyh ny y, kaichi hini nangchi ai kang ym naira y kaichi ly jei kaji naira ngo lawh na.

⁵ Hunai deaungkho y huni kypkyp ly la akhikan nai kamta atawm y nai, paleung kahawi pei nai kamta angveirym nai angchi awm ai nai, hini amjo amnauchi ly nangchi teng y jeu manme iy, nangchi i atiti pei ai naira adeu u rym nai ly sa hai rym ai nai katakeng ai nai aly aeang nai athang kakhai.

⁶ Na i py hina nai kang napi, hei nai di baly tyn nai py di teang ai; naibaly hei nai nawi baly tyn nai py nawi teang ai.

⁷ Khumi leaung leaungrei ly pei ei a y iy, pei ai tla nai kamta ny y naimy, amymy i paleung y tau nai kamta pei bawibawi sy; Tameuh ly amo theu parai naimy pei nai keung ai ly tamen.

⁸ Naibaly nangchi ly ati cheaungkhangra y hawi khyp naimy awm u jojo iy, kalop kahawi cheaungkhang i vui sa naira bawn u thai ai nai, Tameuh ly nangchi i tlang tleaung y pahenra cheaungkhang ang bawn hai pajau.

⁹ “Mymy ly paji phro iy kamawnchi teng y pei bo; Mymy i hawi naira ly awm jojo ai,” nanai tajiu nai kamta.

¹⁰ Naibaly hei nai keung teng y ti pei nai hawi, cha ai nai vui tako pei nai keung my ly hei u ai nai ti pei iy, nangchi ai am-oh hai ai, naibaly nangchi i hawi naira athaichi ly ang pasu hai ai;

¹¹ Nangchi ly ati cheaungkhangra y paawh y nai pei nai bawibawi y nang hai nai awm iy, huni my ly kaimychi deaungkho y Tameuh teng y kawn nai leu thui naira sa hai nai ne.

¹² Hini sabawm nai sa nai sai ly khumi kachaichi i avaw naira y sabawm nai khyh ny y leang, Tameuh teng y kawn nai leu thui nai neangneangra y lem na pa-rei leaung nai ne;

¹³ hini sabawm naira y nangchi ai ang cham nai deaungkho y, Krista i Satang Kahawi mang y nangchi i leu ym u nai patawm nai sai deaungkho y hawi, mymychi i vui hawi khumi bawibawichi i vui khai achu naira y nangchi i atiti paawh y naimy pei nai deaungkho y py, nichi ly Tameuh ai tahm pasang nai chy bo;

¹⁴ mymychi kypkyp py nangchi i tlang tleaung y Tameuh i pahenra khrikhri pa-rei len nai deaungkho y, nangchi i vui chiu ang sa pi nai tarawi y khri pa-rei nangchi ai adawn nai ne.

¹⁵ Tameuh i pei nai ly den py thui pajau y nanai deaungkho y mymy teng y kawn nai leu tym sy.