II KORINTH 6 - Khumi Common Language Bible

¹ Hunaibaly kaichi ly mymy hawi sa ahawi nai, nangchi ly Tameuh i pahenra ai ly chawn hai y naira ngo u y ai nai kaichi kang takeng.

² “Neng kawn ai awm nai khala y kang tangai i, Paheng nai kani y kang sabawm bo,” ang napi; khen cham, vai ly kawn ai awm nai neng ne; khen cham, vai ly paheng nai kani ne.

³ Kaichi i kry nai sai ly ang padeng y ai nai, kaichi ly ati mora y py den py atlym ai naira so y;

⁴ na i py Tameuh i krykeungchi kamta ati cheaungkhangra y py khumi i mei kangai awm, khri pa-rei kham pajau naira y py, patang naira y py,

⁵ kamnga awm naira y py, amcheng naira y py, pakhau naira y py, theaung y tla naira y py, khrukhra naira y py, sa akawm naira y py, i thai y naira y py, biu hai naira y py,

⁶ chai naira y py, pany naira y py, amnym naira y py, neaung hawi naira y py, Phailo Kachai y py, tamen tatangnaira y py,

⁷ leu meitang ra y py, Tameuh i atiti sa thai naira y py; langvawi mang py lamtang mang py hawi naira haichi deaungkho y py, palo naira hawi palo y naira deaungkho y py,

⁸ amyn thui tamawn nai hawi amyn kahawi thui nai deaungkho y py; tapawp nai keung kamta awm iy, khumi meitang ne lawh nai;

⁹ kaichi ai pany ai lawn y nai, na i py amyn amthang parai lawh nai; dei vi dei vi nai kamta, naibaly khen cham, kaichi ly heng lawh nai; parip nai kamta, na i py ang padei y lawh nai;

¹⁰ paleung mawn nai kamta, na i py kawn jojo lawh nai; kamawn kamta, na i py khumi neangneangchi ai nang hai lawh nai; ati sai py by y nai kamta, na i py ati cheaungkhang neangneang awm lawh nai.

¹¹ Aw Korinth avang i khumichi awi, kaichi ly nangchi teng y labeaung ang iy, kaichi i paleung ly nangchi i vui am-eaung vau bo.

¹² Nangchi ly kaimychi y dawn amchei nai awm u y leang, nangmychi i paleung i tamen naira y dawn amchei naira awm u lawh nai teu.

¹³ Hunaibaly kang pei nai kamta khypkhyp kai ai pei u teang ai nai (chanauchi teng y thui pi nai kamta kathui nai ne), nangchi py paleung am-eaung u vau teang.

Ym y naichi molam y pany hai pi nai

¹⁴ Ym y nai khumichi hawi ly adyh y nai langvui savan u ahawi reng moh; hawi naira hawi kamngo naira ly ati amtawm naira awm mo? Ti y baly kangvang hawi kaveng ly ati atawm naira awm mo?

¹⁵ Krista ly Beliara hawi ati ado naira awm mo? Ti y baly ym nai khumi hawi ym y nai khumi hawi ly nga ahawi ai naira ati awm mo?

¹⁶ Naibaly Tameuh i achura yhm ly mynchi hawi ati aly naira awm mo? Achi ly Tameuh kangheng i achura yhm ne; Tameuh my ly, “Mymychi teng y kaawm ai i, mymychi teng y kapavai ai; naibaly kai ly nichi i Tameuh ne ai i, nichi py kai i khumichi lawn ai,” napi nai kamta ly.

¹⁷ Hunai deaungkho y Tameuh my ly, “Nichi theung i nai theu u ly takhra awm u, napi i, Atiti chai y naichi ly den py nam u moh;

¹⁸ Hunaibaly kang kawn u ai i, Nangchi i vui Ampo kang lawn ai. Nangchi py kai i vui chapo chaniuchi lawn u ai,” nanai ati cheaungkhang sa thai nai Tameuh my ly napi.