II KORINTH 5 - Khumi Common Language Bible

¹ Ati mana nai mo nabaly achi i awm nai khaileaung i yhm ly aphrei iy py, kani mang y kiu so y nai, deungtasarei awm ai nai, Tameuh teng i yhm awm, nanai achi pany.

² Achi ly kani mang i dengdairei achi i awm naira akhiu ai nai khrikhri pa-rei ngai i, achi ly hini yhm y tangam khyp nai bo;

³ hunai kamta akhiu nai awm iy khyly achi ly tlang ka-keu my awm y ai.

⁴ Achi, hini awm naira y awm naichi ly kaji pho nai tangam khyp nai bo; achi ly akhiu y naimy awm ai ngai nai deaungkho y ny y leang, na i py dei thai nai ai ly hengra my pajawn pajau thai ai nai, akhiu nai awm ai ngai nai deaungkho y teu.

⁵ Naibaly huni i vui kypkyp y kaichi ai ang sa pi rym nai keung ly Tameuh ne, mymy ly kaichi ai Phailo ang pei yb nai ne.

⁶ Hunaibaly tlang awm nai sala ryrei ly kaichi ly Areng teng y awm y leang, nanai pany iy py, kaichi ly mana khala y py khri pa-rei paleung sorai nai awm lawh;

⁷ (niu thai nai tako y naimy kaichi ly ym naimy tako nai teu;)

⁸ kaichi ly paleung sorai nai awm kana nai ne:kaichi ly tlang y awm y nai, Areng teng y awm ai nai ngai keh.

⁹ Hunai deaungkho y kaichi ly awm iy py, awm y iy py mymy i kawn nai khumi lawn ai nai tau cheng nai ne.

¹⁰ Achi bawibawi ly tlang y atiti sa naichi, hawi nai hawi y nai achi i sa nai kamta nga bawibawi thai ai nai, achi ai ly Krista i tara chih nai atehra mo y amteng hai bebe ai nai tla.

Krista i saho y Tameuh hawi amkawm nai

¹¹ Hunaibaly Areng ai tahm khai naira pany iy, kaichi ly khumichi ai parawi nai ne, kaichi ly Tameuh teng y naini amteng ai nai awm; nangmychi i hawi nai hawi y nai pany naira y py kaichi ly amteng ai nai athang kakhai.

¹² Kaichi ly nangchi teng y kahawi athui bi nai ny y leang, paleung y ny y naimy salo mang y amteng naira palo nai keungchi ai tlau ai naira ati mo nga u thai ai nai, nangchi ai ly kaimychi mang y amlyh ai nai ka-vo nga hai nai kamta kang thui pi nai teu.

¹³ Ati mana nai mo nabaly kaichi ly pathu iy py Tameuh i vui ne; kaichi ly cheng iy py nangchi i vui ne.

¹⁴ Krista i tamen naira my ly kaichi ai ang kawm rang nai bo; hunaibaly kaichi ly hina nai dawn, bawibawichi i dei ai nai jeng y leaungrei dei, hunai deaungkho y bawibawichi dei nai ne;

¹⁵ hunaibaly heng naichi ly amymy i vui y heng nai ny y leang bo, nichi i jeng y dei nai hawi angthau bi naii vui y heng u lawh thai ai nai, mymy ly bawibawichi i dei ai nai jeng y dei nai ne.

¹⁶ Hunai deaungkho y kaichi ly vai i dengdairei tlang mang y ly ami ai py pany y; kaichi ly tlang y Krista ai ly pany chum teu iy py, vai ly mymy ai pany y leang bo.

¹⁷ Huni deaungkho y ami py Krista y awm baly mymy ly kangtha lawn bo; atiti kangngymchi ly tama vui bo; khen u cham, nichi ly kangtha lawn veng bo.

¹⁸ Na i py ati cheaungkhang ly Tameuh teng i theu nai ne; mymy ly Krista deaungkho y kaichi ai amymy hawi aly hai bo, naibaly aly naira krykeung kalop ang pei bo;

¹⁹ huna nai Tameuh my Krista y khaileaung pri ai ly amymy hawi aly hai nai ne, nichi i taphra nairachi ly mymychi i tlang tleaung y taphra nairachi palawn pi y naimy, kaichi ai aly naira leu ang au nai bo.

²⁰ Hunaibaly kaichi ly Krista i jeng y savai ne i, Tameuh my kaimychi ai teaung iy ang takeng, napi pajau; Tameuh hawi aly u, nanai Krista i jeng y kaichi kang takeng nai ne.

²¹ Mymy y ly achi ly Tameuh i hawi naira lawn thai ai nai, kamngo pipi pany y nai ai ly Tameuh my achi deaungkho y kamngo palawn bo.