II KORINTH 3 - Khumi Common Language Bible

Leu Maikawm kangtha i savaichi

¹ Kaichi ly kaimychi ai kahawi athui nai amteaung taleang bi bo lo-oh? Ti y baly nangmychi teng y pei ai nai mo, nangchi teng i nai mo kaichi awm nai sai kahawi thui nai cha, phyrei khumichi i vui aly ngai nai kamta ly kaichi i vui aly ngai teang bo lo-oh?

² Nangchi ly kaichi i cha, kaichi i paleung y tajiu nai, khumi bawibawi pany nai hawi phain nai py ne;

³ Krista i cha, kaichi ai kry hai nai, cha tui y tajiu nai ny y i, Tameuh kangheng i Phailo y tajiu nai teu; lengseaung phei y tajiu nai ny y i, tlang i paleung phei y tajiu nai ne, nanai nangchi ai amteng hai bo.

⁴ Naibaly kaichi ly Krista i saho y Tameuh mang y hunai kamta ym naira awm:

⁵ ati py kaimychi teng i dengdairei theu nai palawn ai nai kaimychi my pha pajau ryry nai kana nai ny y leang; na i py kaichi i pha pajau nai ly Tameuh teng i dengdairei nga nai ne.

⁶ Mymy ly leu maikawm kangtha kry ai nai keungchi y ang pha hai, cha mang i leu kry ai nai ny y naimy, phailo mang i kry ai nai teu: cha i leu my ly padei nai teu, phailo my naini paheng nai ne.

⁷ Na i py dei naira i kalop sa nai, lengseaung y cha mawih tajiu nai malawn py huna tanrei nang parai naira y tym iy, Israela kangpreangchi ly Mosi i meimai nang parai nai sai deaungkho y ni i meimai ai khen jo pajau y baly (huni nang parai nai sai ly tama ryh tama ryh nai ne),

⁸ Phailo i kalop sanai ly mana tanrei nang parai naira tym hai ai moh?

⁹ Pasum ai naira i kalop sa nai malawn py nang parai naira awm baly, hawi naira i kalop sa nai ly nang parai naira mang y khrikhri pa-rei ty ai nai tla.

¹⁰ Nang parai hai chum nai ly hini ra y ly nang parai naira pipi awm y leang bo, ati mana nai mo na ably khri pa-rei nang parai naira my ly tuni ai katlen vui bo.

¹¹ Tama ryhryh nai malawn py nang parai naira awm baly, awm jo ai nai ly khri pa-rei nang parai naira awm ai nai tla.

¹² Hunaibaly kaichi ly hunai kamta athang khai naira awm nai deaungkho y kaichi ly vam parai pa-rei leu thui pi nai ne;

¹³ kaichi ly Mosi i sa nai kamta so y leang: Israela kangpreangchi ly tama ryh tama ryh nai i tem ai naira khen u jo y ai nai,

¹⁴ mymy ly ni i meimai y ly amym naira amym; na i py nichi i paleung ai tang hai lawh veng: vaini tym pa-rei leu maikawm kangngym phain nai khala y ly huni amym naira khypkhyp ly lei y naimy awm jojo; huni ai ly Krista y tama hai veng bo.

¹⁵ Na i py vaini tym pa-rei Mosi i cha-iu phain nai tleirei ly nichi i paleung y amym naira awm lawh.

¹⁶ Na i py nichi i paleung ly Areng mang y mo hi vui nai khala y ly amym naira ai la vui ai.

¹⁷ Naibaly Areng ly Phailo ne: naibaly Areng i Phailo awm naira ngierei y ly alaw naira awm.

¹⁸ Na i py achi bawibawi ly meimai amym y naimy dengkhang apui kamta Areng i nang parai naira angvang hai nai, nang parai naira i dengdairei nang parai veangveang naimy, achi ly huni kamta vanrei atawm khyp nai awm ai nai, takhra hai dudu nai awm bawibawi, Areng, Phailo napi nai i dengdairei nga nai kamta.