III JOHAN 1 - Khumi Common Language Bible

¹ Miteaung keh my ly leu meitang deaungkho y katamen nai Kaia teng y pa nai.

² Ngai parai nai awi, nang i phailo ly amtheaung naira nga nai kamta ly nang ly ati cheaungkhangra y amtheaung naira nga ai nai hawi, noso kahawi awm thai ai nai py chiu kang sa pi nai ne.

³ Amjo amnauchi ly ang jeu iy, nang i meitang nai sai kai ai ang thai hai nai khala y kai ly khri pa-rei kawn na; ne, nang ly leu meitang y tako veangveang nai ne mang:

⁴ kai i chanauchi ly leu meitang y tako veangveang, nanai kai i thai nai ly kai i kawn naira len lawh nai by y leang bo.

Kaia ai palo nai

⁵ Ngai parai nai awi, amjo amnauchi ly angvyn ne iy, mymychi i tlang tleaung y nang i sa nai ngierei ly ka-ym awm parai pa-rei sa reng bo;

⁶ nichi ly palau takhra kamkawmchi i mo y nang i tamen nai sai pany hai bo; nang ly nichi ai mymychi i khuleaung chei naira y Tameuh ai tahm khai nai kamta sabawm baly hawi ai;

⁷ ati mana nai mo nabaly, nichi ly Cheng Takhrachi teng i dengdairei ati sai py lo u y naimy, huni Amyn deaungkho y khuleaung chei veng bo.

⁸ Hunaibaly achi ly leu meitang y sa ahawi nai keungchi lawn thai ai nai, hunai kamta khumi ai ly kawn ai nai tla.

Diotrapha hawi Demetria

⁹ Palau takhra kamkawmchi teng y ly leu maidenchy katajiu chum bo; na i py Diotrapha, nichi theung y kalen keh ngai lawh reng nai keung ly kaichi ai kawn y.

¹⁰ Huni deungkho y kai kang jeu nai khala baly ni i atiti sa naichi, kaichi i tlang tleaung y ni i leu hawi y nai thui iy, ni i leu peung nai sai ly kang pany hai vau bi ai; huni py ni ly hawi bo ti y rai, mymy kypkyp ly amjo amnauchi ai kawn y, kawn ai ngai naichi ai py paka lawh iy, palau takhra kamkawm theung i dengdairei ang patheu vui veng.

¹¹ Ngai parai nai awi, kamngo ly amtiu moh ly, kahawi phai amtiu. Atiti kahawi sa nai keung ly Tameuh teng i nai ne; atiti kamngo sa nai keung ly Tameuh ai niu vai y leang.

¹² Demetria ly khumi bawibawi hawi, leu meitang khyp nai i palo naira nga bo; kaichi py palo bo; naibaly kaichi i palo nai ly teng, nanai nang ly pany mang.

Kangkhym i kawn nai leu

¹³ Kai ly nang teng y leu neangneang katajiu ai nai awm, na i py cha tui y hawi cha tajiu naira y ly nang teng y katajiu ai nai ngai y leang; kra y nai sala y my kang niu ai nai athang kakhai; hunaibaly achi ly mo atha naimy arum ai.

¹⁴ Nang i tlang tleaung y awmnem naira awm sy. Ahawichi my ly nangchi teng y kawn nai leu ang thui pi.

¹⁵ Ahawi leaung leaungreichi i amyn palau iy nichi teng y kawn nai leu thui pi kyh ba.