HOSEA 9 - Khumi Common Language Bible

Israela chengchi avum ai nai pajengra, Hosea my thai hai nai

¹ Israela khumichi awi, cheng takhra khumichi kamta, amo theu naira pawichi so u moh. Nangchi ly nangmychi Tameuh i leu tangai u y bo. Nangchi ly pri vereira y amymy ai bima lawm ai nai, bala tameuh teng y jo u. Amti amjang thengthaichi thawn nai ly Bala tameuh my tamen nai saho y ne, nanai nangchi dawn u lawh!

² Na i py kra y nai sala y nangchi ly choh bai palo, olive asitui hawi kreip hangchi cha nei ai nai nga ai ny y.

³ Israela khumichi ly Areng i pri y awm ai nai ngo y i, Aikupta pri mang y vawi u ali teang ai nai tla ai. Asuria pri y py cho ngau y nai teicha teinei cha u ai.

⁴ Huni prichira y nichi ly Areng teng y kreip hang py, tawnbawi py, talam pajau ai ny y. Nichi cha nei nai teicha teinei ly si keung i teicha teinei kamta, cha nai khumichi ai chai hai y ai. Nichi ly kajeu kanglam dam ai nai, huni teicha teinei cha u ai. Huni teicha teinei ai katalamra palawn iy, Areng i Achura yhm y syn u moh.

⁵ Nichi ly Areng ai tahm khai naimy palo ai nai, khai takhra nai pawi kanichi neng tym baly, ati mana sa u ai mo?

⁶ Nichi ly patang naira avum u iy, meingtym tleirei y tym u nai khala, Aikupta khumichi my nichi ai pangym iy, Memphi mary y up ai. Nichi i tangka khairachi hawi yhm kangngymchi awm nai meingtymchi ly aleng phreungchi hawi acha keungchi my khiu meuh ai.

⁷ Nichi i tlang tleaung y kamngo pajeng ai nai neng ly tym bo. Huni neng tym nai khala y Israela khumichi my pany u ai! Nangchi my, “Hini amo ly kamthu. Phailo nga nai khumi ly khumi ka-khum ne,” nanai thui u bo. Nangchi ly khri pa-rei kamngo sa u nai deaungkho y, kai ai pipi niu ngai u y bo.

⁸ Tameuh ly mymy i khumi Israelachi ai pany hai ai nai, kai ai amo palawn iy pato nai ne. Na i py nangchi ly kai i chei nai meingtym tleirei y, tavo ai sakre hawi patiu nai kamta, kai ai patiu bo. Tameuh i Achura yhm theung y my, khumichi ly amochi i paleung ka-echi lawm u bo.

⁹ Nichi ly Kibeahmary y awm nai kamta, khri pa-rei sa tamang u nai ne. Tameuh ly nichi i kamngo pany pi jo iy, huni molam pajeng ai.

Israela chengchi i kamngo hawi pajeng nairachi

¹⁰ Areng my, “Israela ai kai avum angchei nai khala, daichi ka-vym theung y prau nai kreip keungchi ai niu nai kamta ne. Nangchi i amsi pajochi ai kai avum angchei nai khala, myn angchei nai thaidu athaichi ai niu nai kamta ne. Na i py nichi ly peor mawi y tym nai khala y, Bala tameuh ai chiu u nai deaungkho y, nichi my tahm khai nai tameuhchi kamta, amso ngai nai lawm vui bo.

¹¹ Israelachi i sa thai naira ly tavo akheang nai kamta tama vui ai. Nichi ly cho chanauchi tapen y ai. Deaungdi kajeu y aneng nai neampachy awm ai ny y. Deaungdi aniu nai awm hai y ai.

¹² Na i py nichi ly cho chanauchi ai palum paveang lawh teu i py, kai ly huni deaungdichi ai padei iy, leaungrei ai py heng hai ai ny y. Kai ly nichi ai khai su nai khala y, nichi ly ka-jei awm nai patangra avum u ai,” napi.

¹³ Aw Areng, nichi i cho chanauchi ai paleung ka-echi my hau iy, padei nai mei sajang kaniu nai ne.

¹⁴ Hini khumichi i vui y nang teng y ati kang hnei ai mo? Nichi i neampachychi ai teng hai vui iy, nichi i deaungdichi ai palum paveang ai nai ngo u moh sy.

Areng my Israela chengchi ai tara chih nai

¹⁵ Areng my, “Nichi ly Kilakala mary y hawi y nairachi sa amteaung u bo. Huni neng dengdairei kai ly nichi ai kaniu ngai y bo. Nichi i sa nai sai hawi y nai molam y, kai i pri theung i dengdairei, nichi ai patheu vui ai. Kai ly nichi ai tamen y leang bo. Nichi i lu sa nai keung bawibawichi ly kai ai tiu u nai ne.

¹⁶ Israela khumichi ly tangjyn jei nai deaungkho y, athai thai y nai dengkeaung keung hawi atawm. Nichi teng y cho chanau thawn hai ai ny y. Cho chanau sa lawh teu baly, nichi i thi ngan kamji chanauchi ai kaimy padei vui ai,” napi.

Amo my Israela chengchi i satang thui pi nai

¹⁷ Nichi ly kai i chiu nai Tameuh i leu tangai u y nai deaungkho y, mymy ly nichi ai khai su ai. Nichi ly pri takhrachira y amki naimy awm u ai.