HOSEA 8 - Khumi Common Language Bible

Myn y chiu nai molam y Areng my Israela chengchi ai thui tamawn nai

¹ Areng my, “Baw eng iy pany hai ba! Paleung ka-echi ly ahmtlau kamta, kai i pri y ang nih u bo! Kai i khumichi ly kai hawi asa nai Leu Maikawm ai taphra iy, kai i khumichi ly kai hawi reita ai khai u su bo.

² Kai ai nichi i Tameuh nanai py, nichi ly kai i khumichi nanai py, nichi ly kai ai pany nanai thui u teu i py,

³ nichi ly hawi naira ai khai u su veng bo i, paleung ka-echi ly nichi ai hui u ai.

⁴ “Kai i khumichi ly mychi i kangai samrangchi vawi takhra u nai ne. Kai i paleung kangai ny y naimy, lu sa naichi ai khai takhra u bo. Mychi i muku, tangka hawi mynchi sa u i, mychi phra ai naini sa u nai ne.

⁵ Samari mary i khumichi chiu u nai muku si katai myn ai kapaso nai ne. Kai ly nichi tlang tleaung y kado theu bo. Nichi ly mana khala py, myn chiu nai khai u su ai mo?

⁶ Israela cheng kupe lasa kakawp hawi sa nai myn ly tameuh ny y! Samari khumichi chiu nai muku si katai myn ly dei lawm piu vui ai!

⁷ Nichi ly ali ai hei nai khala, kamchai tyn u lawh ai! Li i chohpui chomaw myn y baly tako ngo pajau y. Huni lira i chohpui chomaw myn lawh tei u py pri takhrachi cha u ai.

⁸ Israela pri ly takhra prichi hawi takhra lawh y. Teaung ai ngo y nai laawm ka-kawi hawi atawm.

⁹ Israela mipuichi ly pakym pajau y nai, keaungngo kano kasau karam kamta, paleung ka-dawn sa ngaulau reng nai ne. Nichi ly Asuria pri mang y chei iy, kasabawmra hnei u bo. Vang pei iy pri takhrachi my ama hai ai nai ngai u.

¹⁰ Na i py kai ly vai, nichi ai angym hai iy pajeng ai. Nichi ly kra y naimy Asuria empara samrang i ana nai khri pa-rei avum u ai.

¹¹ “Kamngo lawira nga ai nai i vui y maicham neangneang sa u teu i py, kamngo sa nai meingtym nawi ra ai nai lawm lawh bo.

¹² Kai ly nichi i vui reita neangneang khai pi teu i py, nichi my huni reitachi ly nichi hawi abi y, rengrang tlai napi iy, khai u su bo.

¹³ Nichi ly kai teng y apathyp iy, kapathyp mawi cha u bo. Na i py kai, Areng ly nichi i sa nai ngai pi y leang. Vai, kai ly nichi i kamngo pany pi iy, kamngo nai molam pajeng ai. Nichi ai Aikupta pri mang y pato teang ai!

¹⁴ “Israela khumichi ly samrang yhmchi sa u teu i py, mychi ai sa nai keung ai tami u bo. Juda khumichi ly khaw parai nai marychi sa u. Na i py kai ly nichi i samrang yhmchi hawi marychira y, mai tla iy kang hai ai.”