HOSEA 6 - Khumi Common Language Bible

Khumichi i uikheih nai sai teng y nai

¹ Khumichi my, “Areng teng y vawi u ali teang sina! mymy ly achi ai tamo kalem nga hai teu i py, tamo tha pa-rei hawi ang sa pi ai. Tamo nga hai teu i py, huni tamo ai bam pi y ai a?

² Achi ai kani nyh, kani thomrei sala y atho awm iy ham hai teang ai i, mymy i mei keung y awm hai ai.

³ Achi ly Areng ai pany ai nai atho so u sina. Khawn khutawi reng nai kamta, nicho neng khala khaileaung salo y kani nai hai reng nai kamta, mymy ly achi teng y ang jeu takengkei ai,” nanai thui u bo.

⁴ Na i py Areng my, “Israela chengchi hawi Juda chengchi awi, kai ly nangchi ai mana kang sa ai mo? Kai i tlang tleaung y nangchi i tamen nai sai ly khawn kadam kamta py, kadam amai kamta py, tama rai y nai ne.

⁵ Naibaly kai ly amochi ai pato iy, nangchi ai tara chih ai nai satang hawi, taphra ai nai satang thui hai nai ne. Nangchi teng i kai aly ngai nai ly rai y.

⁶ Kai ly nangchi i tawnbawi hawi apathyp nai aly ngai y, nangchi teng i tamen naira naini ngai khyh. Kai i khumichi my kai teng y leng patlum nai kapathypra talam nai tleaung y, kai ai pany u naini aly ngai khyh nai ne.

⁷ “Na i py nichi ly kai hawi sa nai Leu Maikawm ai Adam kamta taphra iy, kai i tlang tleaung y ka-ym by y bo.

⁸ Kilead mary ly khumi hawi y naichi hawi, khumi ai tleh nai khumichi kawi nai meingtym ne.

⁹ Pathyp pi nai keungchi ly tiu lawm ai nai oh nai damra kamkawm hawi atawm. Nichi ly Sekhem mary mang y chei nai lam y malawn py, khumi ai tleh u nai ne. Nichi ly hina nai hawi y nai kalopchi sa u lawh ly!

¹⁰ Israela khumichi i amso ngai nai kalop ai, kai ly niu nai ne. Kai i khumichi ly mynchi ai chiu u iy, mymychi ai chai nem hai y bo.

¹¹ “Juda khumichi awi, nangchi sa nai kamngochi molam y, nangchi ai py pajeng ai nai neng kani khai yb bo.