HOSEA 3 - Khumi Common Language Bible

Hosea hawi ka-ym by y nai neampachy

¹ Huni bo y Areng my kai teng y, “Nang ly chei iy tavawi hawi paleaung nai neampachy ai khrei ba, Israela khumichi ly tameuh takhrachi ai chiu iy, kreip athai kajeichi talam u teu i py, kai ly nichi ai tamen nai kamta, nang ly huni neampachy ai tamen ai nai tla,” napi.

² Naibaly kai ly tangka cho holai pangrei hawi, chajai choh teaung holai tariurei pei iy, ni ai atleu nai ne.

³ Nang ly bima kalop so y, takhra khumi hawi kamleaung so y naimy, kai ai kra parai pa-rei ajeng ai nai tla. Kai py ajeng ai,” nanai ni teng y thui pi bo.

⁴ Huna nai kamta Israela khumichi ly samrang by y, lu sa nai keung by y, apathyp nai by y, chiu ai nai lengseaung leng naichi by y, leung khen nai khala teaung nai mynchi by y naimy, neng kakra awm u ai.

⁵ Na i py Israela khumichi ly nichi i Areng Tameuh teng y py, nichi i samrang Davida i kangpreangchi teng y py, vawi ali teang nai neng tym ai. Huna nai khala nichi ly Areng ai jei kaji naimy tahm khai u ai. Mymy py nichi ai amtheaung naira pei ai.