HOSEA 12 - Khumi Common Language Bible

¹ Israela khumichi i khawn khutawi dengdai kani dym khala khrairei, sa nai dawn nai ngiereichi ly kamran by y, atyhtyh teu. Nichi theung y ka-ym by y nai, khrukhra naichi nawi ra nai ne. Nichi ly Asuria pri hawi amsawi amnai asa naimy, Aikupta pri hawi ka-sum ka-pai sa u bo,” napi.

² Areng ly Juda khumichi ai thui tamawn bo. Israela ai py mychi i sa nai sai molam y pajeng ai. Mymy ly nichi i sa nai kamta, hawi nai hawi y nai heung pi ai.

³ Nichi i amsi pajo Jakob ly amhm taku theung y awm nai khala my, amjo Esaw hawi ajo hawi bo. Jakob ly tleaungri acheang nai khala y, Tameuh ai ka-awi sa iy ajo hawi nai ne.

⁴ Ni ly kani pri amtaw thau hawi ani i, pajau nai ne. Ni ly vo iy amtheaung naira hnei. Tameuh ly Bethela mary y achi i amsi pajo Jakob teng y jeu iy, leu pei bo.

⁵ Huni Tameuh ly ati cheaungkhang sa thai nai Areng Tameuh ne. Mymy i amyn ly Areng ne i, huni amyn y chiu ai nai tla.

⁶ Hunai deaungkho y Jakob i kangpreangchi awi, nangmychi i Tameuh ai ym iy mymy teng y vawi u teang ba, ka-ym awm u, kahawi so u, nangmychi i Tameuh ai paleung sau parai naimy ajeng u.

Tara chih nai satang thui panawi bi nai

⁷ Areng my, “Israela khumichi ly Kanan chengchi kamta, paleung akawi parai. Nichi ly teng y nai sie khyry hawi van nai khumichi teng y jo u reng nai ne.

⁸ Nichi my, ‘Achi ly nang chawn u bo. Paisa tangka neangneang pateung bo. Ami py achi ai teng y naimy nga nai tangka hawi nang chawn nai ne, nanai neng hai pajau y leang,’ na u.

⁹ Na i py nangchi ai Aikupta pri i dengdairei pahawi nai nangchi i Tameuh kai, Areng ly khutaha daichi ka-vymra y, nangchi kani yhmchi hawi awm nai kamta, vai py kani yhmra y awm hai ai.

¹⁰ “Kai ly amochi teng y amteng hai iy, mo mang i vui atitichi niu hai bo. Amochi dengdairei kai i khumichi ai pany hai pi bo.

¹¹ Na i py nichi ly Kilead pri y, mynchi ai chiu u. Huna nai chiu nai khumichi ly dei ai. Kilakala mary y awm nai khala, si kataichi apathyp u iy huni meingtym y awm nai maichamchi ly adym angdengra y lengseaung pakheng achu naichi lawm ai.”

¹² Achi i amsi pajo Jakob ly Mesopotamia pri mang y preang iy, aju nga ai nai molam, khumi leaungrei teng y beram typ ai nai tla.

¹³ Areng ly Israela khumichi ai miseaung achei nai Aikupta pri i dengdairei pahawi ai nai hawi, kry ai nai amo leaungrei ai pato pi.

¹⁴ Israela khumichi ly Areng ai khri pa-rei kado theu hai bo. Mychi i sa tamang nai molam y dei u ai nai ataing khyp nai ne. Nichi ly Areng i nang parai nai sai ai cheh nai deaungkho y, mymy ly nichi ai pajeng ai.