HOSEA 10 - Khumi Common Language Bible

¹ Israela khumichi ly athai neangneang thawn nai kreip angjyn keung hawi atawm. Nichi ly nang chawn ryh baly, maicham neangneang sa u nai ne. Thengthai khulawn nawi ryh baly, mychi i chiu nai leaungchengchi ai apu tleaung apura pa-rei palum u bo.

² Nichi i paleung ly cheng y nai deaungkho y, vaimy kamngo pajeng naira avum u ai. Tameuh ly nichi i maichamchi taphra iy, nichi chiu u nai leungchengchi taphra ai.

³ Hini khumichi ly kra y naimy, “Achi ly Areng ai jei y nai deaungkho y, achi ly samrang by y, samrang awm teu i py, ni ly achi i vui ati ang sa pi pajau ai mo?,” nanai thui u ai.

⁴ Nichi ly ati sai py ny y nai leu katheu iy, teng y nai leu ka-deu pei i, ati sai py ny y nai leu sumneangchi akhai u nai ne. Leu meitang py teaung u y. Leu meitang ly li thawn nai khaileaungra y dei asi keung prau nai kamta, pri theung y adyh adawi y naira lawm bo.

⁵ Samari mary i khumichi ly Bethavan mary y awm nai muku si katai myn tama vui nai molam y, jei i vo tangam u ai. Huni myn ai chiu nai khumichi hawi pathyp pi nai keungchi ly muku si katai myn i vui y vo u ai. Huni muku si katai myn i sa thai naira tama iy, pri takhra mang y syn vui nai khala, nichi ly tangam u ai.

⁶ Huni myn ai Asuria empara samrang teng y talam ai nai, huni pri mang y syn u ai. Israela khumichi ly huni myn ai ym u nai molam y, kangji nga u ai.

⁷ Nichi i samrang ly tui ra y amjau jo nai thengbeang kamta, talam nai avum ai.

⁸ Avan mary mawi salo y awm nai Israela khumichi i chiu nai meingtymchi ly phra ai. Nichi i maichamchi salo y aleng keungchi, acha keungchi prau ai. Huna nai khala khumichi my mawichi ai, “Kaichi ai deng khyp ba!” nanai py, mawi aheungchi teng y, “Kaichi ai taphum meuh ba!” nanai py, aeu naimy takeng u ai.

Areng ly Israela chengchi ai tara chih nai

⁹ Areng my, “Israela chengchi ly Kibeah mary y kamngo sa angchei khala i ka-so, kai i tlang tleaung y kamngo sa u jojo nai ne. Hunai deaungkho y Kibeah mary y tym nai tavai takai ly nichi ai kai ai.

¹⁰ Sa tamang nai hini khumichi ai tiu iy parip ai. Pri takhrachi ly amkawm i nichi ai tiu iy, nichi ly mychi i kamngochi molam y, pajeng naira avum u ai.

¹¹ “Vaichi khala Israela chengchi ly amtiu yb iy, choh ati ai nai khai yb nai si nu tanglo hawi atawm. Na i py kai ly ni i apu parai nai kaneaung y tamtleang tang iy kalop sa hai ai. Kai ly Juda chengchi ai li thawn hai iy, Israela chengchi ai khaileaung padyh hai ai.

¹² Kai my, ‘Nangchi i vui khaileaung kangthara thawn iy, leu meitang adyh adawi nai ti hei u ba, kai i tlang tleaung y ka-ym awm nai amti amjang tyn u, nangchi i Areng teng y ali teang ai nai neng tym bo. Kai py kang jeu iy nangchi ai amtheaung hai ai’ napi.

¹³ Na i py nangchi ly hawi y nai ti pati u iy, hawi y nai athaichi pakym u bo. Nangchi ly ka-chawi naimy hawi y nai athaichi cha u bo. “Nangchi ly nangmychi i tavai ka-richi hawi tavaimi kamkawm atho ai a-ym u nai deaungkho y,

¹⁴ tavai keung y nangchi ai paleung ka-echi my tiu iy, nangchi i amtangrachi phra pawn ai. Huni ly tavai keung y Salman samrang my Bethabela mary ai taphra nai kani lawm iy, amhm hawi deaungdichi ly dei lawm na pa-rei padei nai avum ai.

¹⁵ Bethela mary i khumichi awi, nangchi ly khri pa-rei sa tamang u nai deaungkho y, huna nai leaungsaichi hawi avum u ai. Tavai amteaung phai amteaung baly, Israela samrang ly dei ai,” napi.