HOSEA 1 - Khumi Common Language Bible

¹ Juda pri y samrang Uziah, samrang Jotham, samrang Ahaz, samrang Hezekia hawi Israela pri y samrang Jehoasa i chapo Jeroboamchi peang nai deung y, Beri i chapo Hosea teng y tym nai Areng i leu pei nai ly hinichi ne.

Hosea i aju hawi chanauchi

² Areng ly Hosea dengdairei, Israela chengchi teng y leu pei manme nai ly “Nang ly chei iy neampachy leaungrei hawi yhmtheaung so ba. Nang i aju ly ka-ym by y nai neampachy ne ai. Nang i cho chanau py, nang i aju kamta ka-ym by y naichi lawm ai. Kai i khumichi py huna nai kamta, kai ai khai su iy leu atangai u y nai ne,” napi.

³ Hunai deaungkho y Hosea ly Diblaim i chaniu Koma napi nai neampachy hawi yhmtheaung sa nai ne. Nini ly chapo chalu leaungrei tapen chum baly,

⁴ Areng ly Hosea teng y, “Nang i chapo ai ‘Jezarela’ nanai amyn pathi ba, ati mana nai mo na baly Israela samrang i amsi pajo Jehu ly Jezarela mary y khumi ai tleh nai kamngochi molam y, kai ly Israela samrang ai pajeng ai. Samrang Jehu i deung kamtawm jum hai ai.

⁵ Huni neng tym baly kai ly Jezarela leaunghawira y, Israela pri i sa thai naira phra hai ai,” napi.

⁶ Koma ly pa-nyh deaungdi tapen bi bo. Huni deaungdi ly chaniu neampachy ne. Naibaly Areng my Hosea teng y, “Kai ly Israela khumichi ai mo mang y kamngo pahen y ai nai deaungkho y, huni chaniu ai ‘tamen y’ nanai amyn pathi ba.

⁷ Na i py kai ly Juda pri khumichi ai tamen ai rai. Nichi i Tameuh kai Areng ly nichi ai atleu ai. Na i py tavai atiu nai hawi py, haisau, thailiho, thailiho chyn, keaungngo, keaungngo tavaimi kamkawm hawi py, nichi ai atleu ai ny y.

⁸ Koma ly chaniu ai kanu li chum baly, deaungdi aniu bi i, chapo tapen.

⁹ Naibaly Areng my Hosea teng y, “Israela khumichi ly kai i khumi ny y, kai py nichi i Tameuh ny y nai deaungkho y, huni chapo ai ‘kai i khumi ny y’ nanai pathi ba,” napi.

Israela pri lo-pa ali teang nai

¹⁰ Israela pri khumichi ly pangli spryh kamta kati pajau y, pata pajau y na pa-rei peung u ai. Vai ly Tameuh my nichi teng y, “Nangchi ly kai i khumichi ny y, nanai thui teu i py, kangkhym kani y ly “Nangchi ly Tameuh kangheng i cho chanauchi ne u bo!” napi ai.

¹¹ Juda pri khumichi hawi Israela pri khumichi ly amkawm u ali teang ai. Nichi ly mychi i vui lu sa nai keung leaungrei vawi takhra u ai. Nichi ly mychi i prira y nang chawn u ai. Jezarela i kani ly kani kalen lawm ai,” napi.