HEBRAI 8 - Khumi Common Language Bible

Pathyp pi nai keung kalen keh Isu

¹ Hunaibaly kaichi i leu thui naichi theung y aly len keh nai ly hini ne he: achi ly hunai kamta pathyp pi nai keung kalen keh;

² kani mang y Tahm Asang Keh Nai i areng atehra lamtang mang y ateh i, Meingtym Kachai hawi achura yhm tatang, khumi i sa nai ny y nai, Areng i jang naira y kalop sa nai keung nga bo.

³ Pathyp pi nai keung kalen keh ngiereichi ly atiti pei nai hawi apathyp nairachi talam ai nai khai rym nai ne; hunaibaly hini pathyp pi nai keung kalen keh py ati mo talam ai nai aly ngai nai ne.

⁴ Naibaly Reita kamta atiti pei nai talam pi nai keungchi awm angchi yb nai deaungkho y mymy ly khaileaung pri y awm i khyly den py pathyp pi nai keung lawn ai ny y;

⁵ nichi ly kani pri mang i atiti ka-tawmchi hawi pa-pui i kalop sa u lawh reng. Ne, Mosi my achura yhm jang ai nai tau thym khala y ly Tameuh my thui pi nai kamta, “Mawi y khen pata ai naira ang patei nai kamta ly cheaungkhang sa ai nai amkym,” napi.

⁶ Vai naini mymy ly sa nai sai hawi keh nai nga bo; ati mana nai mo nabaly mymy ly leu adeu naira hawi keh naichi salo y sa nai leu maikawm hawi ra hawi ra nai i savai aleaung bo.

⁷ Huni leu maikawm kangman i nai ly padeng ai naira by y i khyly, pa-nyh i vui y meingtym hau pi y leang bo.

⁸ Naibaly mymy ly nichi ai padeng nai, “Khen cham, neng ly tym ai bo, nanai Areng my napi. Kai ly Israelachi dengtheung hawi Judachi dengtheung teng y ly Leu maikawm kangtha kakhai ai:

⁹ Mymychi i amsi pajochi ai Aikupta pri i dengdairei pahawi ai nai Nichi i kiu y kapatawn nai kani y, Nichi teng y kai i leu maikawm khai nai kamta ny y; Ati mana nai mo nabaly nichi ly kai i leu maikawm y awm u jo y; Hunaibaly nichi ai ly kadawn hai y bo, Areng my napi.

¹⁰ Ati mana nai mo nabaly huni neng bo y ly Kai ly Israelachi dengtheung teng y leu maikawm khai nai ly hini ne he, nanai Areng my napi: Mymychi dawn naira y kai i leu pei naichi kapachei iy Nichi i paleung y py katajiu teang ai; Naibaly kai ly nichi i vui y Tameuh kalawn ai i, Nichi ly kaimy i vui y kai i khumichi lawn ai;

¹¹ Naibaly khumi leaung leaungrei mymy i saleaungchi hawi Amymy i amjo amnau teng y, ‘Areng ai pany’ nanai patiu y ai, Nichi bawibawi ly, theang keh nai i dengdairei len Keh nai tym pa-rei kai ai pany bawibawi ai:

¹² Nichi i taphra naira y kapahen ai, Naibaly nichi i kamngochi py tlen py kapany pi jo y leang bo,” ang napi.

¹³ Hunaibaly mymy ly leu maikawm kangtha, nanai thui nai deaungkho y kangman i nai ly ang tangym hai veng nai bo; na i py tlum ryry nai hawi dawn tami nai atiti ly tama vi nai ne.