HEBRAI 4 - Khumi Common Language Bible

¹ Hunai deaungkho y jei nai tarawi y amkym u sina, ti y baly mymy i anawn naira y kun ai nai leu adeu nai ly awm jojo makho iy, nangchi theung y ami py kai y nai awm lawh na.

² Nichi teng y thui pi nai kamta ly achi teng y py satang kahawi thui pi nai ne khyp bo: na i py nichi ly tangai nai keung tatangchi hawi ym naira y amtawm y nai deaungkho y, nichi i thai nai leu ly nichi ai chawn hai y leang.

³ Achi ym chum naichi ly huni anawn naira y kun dudu nai ne he; khaileaung palum angchei khala i dengdairei atiti sanaichi ai sa pajau iy py, mymy i thui nai kamta, “Kai i kado theu nai vaineng abeu nai kamta ly, Nichi ly kaimy i anawn naira y kun y ai,” napi.

⁴ Mymy ly mani manira y mo kani saryhrei kani i satang ly hinai kamta thui na a, “Tameuh ly mymy i atiti sa nai bawibawi ly saryh kani y anawn veng bo,” napi;

⁵ naibaly hunira y py, “Nichi ly kaimy i anawn naira y kun y ai,” napi bi.

⁶ Hunaibaly phyreichi ly huni meingtym y kun ai nai nga nai deaungkho y hawi, jangni i satang kahawi thui pi nai nga nai keungchi ly leu tangai u y nai deaungkho y kun u y vui nai py,

⁷ mymy ly kra parai nai bo y Davida i labeaung y, “Vaini” nanai ly kani khai rym bo; vaichi i tajiu nai kamta, Nangchi i paleung tang hai u moh,” napi.

⁸ Jousa ly nichi ai anawn naira nga hai lawh baly, huni bo y kani takhra nanai ly tapi y leang bo.

⁹ Hunaibaly Tameuh i khumichi i vui y kani saryhrei kani i anawn naira awm jojo rai.

¹⁰ Naibaly mymy i anawn naira y kun chum nai keung ly Tameuh my mymy i atiti sa nai anawn nai kamta ly, ni py mymy i atiti sa nai ly anawn vui teang bo.

¹¹ Hunaibaly ami py huni ym y nai khen pata nai kamta atlym y ai nai, huni anawn naira y kun ai nai paleung verei tau u sina.

¹² Ati mana nai mo nabaly Tameuh i leu ly heng i atiti sa thai, haisau bo nyhrei awm nai tleaung y py chiu i, hengra hawi phailo py, hiu lenglaw hawi aleng khawi takhra pa-rei thun pajau:paleung y dawn nai hawi tau naichi py chih praw thai nai ne.

¹³ Naibaly mymy i mei ka-niu y ly atiti sa nai bawibawichi theung y amteng y nai ha py by y; achi ai ang sa nai keung i mei ka-niu y ly ati cheaungkhang ka-keu hawi am-eaung nai angchi awm lawh veng nai ne.

Nang parai keh nai Pathyp pi nai keung Isu

¹⁴ Hunaibaly kani mang y tako prei chum nai pathyp pi nai keung kalen keh nang parai nai, Isu, Tameuh i Chapo ai ly achi my nga nai deaungkho y, achi i ym nai leu patawm u cheng sina.

¹⁵ Ati mana nai mo nabaly achi ly achi i ham y nai sai dawn hai ai nai pany pajau y nai pathyp pi nai keung kalen keh ai ly ngo y leang; huna ny y naimy achi kamta parawi naira lam cheaungkhang avum teang nai, kamngo mang y so y nai ai nga nai teu.

¹⁶ Hunaibaly achi ly pahenra nga thai ai nai hawi, aly aeang nai neng khala y pahenra i sabawm naira nga thai ai nai py, pahen naira areng atehra mang y vam parai naimy kasa u sina.