HEBRAI 13 - Khumi Common Language Bible

¹ Amjo amnauchi ai atamen naira ly awm jojo sy.

² Angvynchi ai kawn ai nai tami u moh:phyreichi ly hunai kamta sa iy pany y naimy kani pri i amtaw thau naichi ai anga hai lawh veng bo.

³ Theaung y tla naichi hawi vanrei theaung y tla nai kamta nichi ai pany u jojo ly:nangchi py tlang y awm nai ne teang nai deaungkho y ngari patang naichi ai ly pany u jojo.

⁴ Khumi bawibawichi ly apom naira ai tahm khai u sy, i ra y py hawi y naira abawi moh sy; angai naichi ai hawi pajang sa naichi ai ly Tameuh my chih ai.

⁵ Nangchi i paleung awm nai sai ly tangka ai paleung no nai abawi y nai awm sy; nangchi i awm nai ryrei my paleung hawi u; mymy kypkyp my ly, “mana khala y py kang patlaw y ai i, khai py kang khai su y leang mang” napi.

⁶ Hunaibaly achi ly vam parai pa-rei my, “Areng ly ang sabawm nai keung ne, Kai ly kajei y ai; Khumi my ati ang sa pajau ai mo?” napi reng nai ne.

⁷ Nangchi ai kry nai, Tameuh i leu ang thui pi nai keungchi ai ly pany u jojo ly: nichi i awm nai reita y atiti theu naichi ly dawn iy, nichi i ym nai sai amtiu u.

⁸ Isu Krista ly jangdyh py, vaini py, deungtasa khrairei py huna jojo.

⁹ Patiu naira amjy takhra takhra hawi, pany vai y nai my py nangchi ai pajau vui ai nai pei u moh:paleung ly cha ai naichira y ny y naimy, pahenra deaungkho y khaw naira nga nai ly hawi:huni mang y asa naichi ly hunira y chawn naira ngo u lawh y leang.

¹⁰ Achi ly maicham harei awm i, hunira y ly achura yhm y kalop sa nai keungchi ly cho ngau y.

¹¹ Kamngochi i vui y talam pi nai thi ly Meingtym Kachai y pathyp pi nai keung kalen keh my kun hai iy, huni tawnbawichi i veu ly avang yhm meaungteng y leng vui reng.

¹² Hunaibaly Isu py mymy i thi kypkyp i saho y khumichi ai pachai thai ai nai, apai pa-kho palem mang y patang bo.

¹³ Hunaibaly achi ly mymy ai tahm khai y naira ai pho iy, avang yhm meaungteng y mymy teng y chei u sina.

¹⁴ Achi ly hi y avang meingtym kakhaw by y i, vai avang awm ai nai hau nai ne.

¹⁵ Hunaibaly mymy i saho y palo naira ly apathyp naira lawn ai nai Tameuh teng y talam u reng sina, huni ly ni i amyn apha y nai labeaung athai ne.

¹⁶ Na i py atiti kahawi sa ai nai hawi, atiti paawh y naimy tami u moh, hunai kamta apathyp naira y ly Tameuh ly khrikhri paleung hawi na.

¹⁷ Nangchi ai peang nai keungchi i leu tangai u ly, nichi i ngaingai awm u; ati mana nai mo nabaly nichi ly mymychi i sa nai sai thui pi cham ai nai tla nai keung kamta, nangchi i phailo ai ang typ pi nai ne; huni ly paleung mawn nai tarawi y ny y naimy, amo theu nai tarawi y so u sy; huni ny y baly nangchi i vui kamran by y leang bo.

¹⁸ Kaichi i vui chiu so pi kyh; kaichi ly cheaungkhangra y hawihai palai awm ai nai tau iy, hawi nai hawi y nai pany naira chai parai nai ly awm, nanai kaichi ly teng khyp naimy apany bo.

¹⁹ Naibaly nangchi teng y kai ai ang tym hai kasa bi thai ai nai, huni kamta sa ai nai kang takeng nai tleaung y kang takeng ra nai ne.

Kangkhym i chiu sa nai

²⁰ Naibaly aly nai Tameuh, beram typ nai keung nang parai nai achi i Areng Isu ai ly deungtasarei leu maikawm thi saho y kadeichi theung i dengdairei pathau bi nai keung ly,

²¹ mymy i mei ka-niu y mymy i kawn nai ngierei Isu Krista i saho y achi ai sa hai iy, mymy i kangai sa ai nai atiti kahawi cheaungkhangra y nangchi ai angym hai sy; mymy teng y nang parai naira deungtasarei awm sy. Amen.

Kangkhym i taviu nai leu

²² Na i py amjo amnauchi awi, pachei nai ly kham u pajau tanga ai nai kang takeng; ati mana nai mo nabaly kai ly nangchi teng y leu maiden chy katajiu veng bo.

²³ Achi i amjo amnau Timothei ai ly palawi bo, nanai pany u ba; mymy ly tym kasa baly kai ly mymy hawi nangchi teng y kang jeu ai mang.

²⁴ Nangchi ai peang nai bawibawichi hawi, khumi kachaichi bawibawi teng y kawn nai leu thui pi kyh. Itali pri i nai amjo amnauchi my ly nangchi teng y kawn nai leu thui pi.

²⁵ Nangchi bawibawi teng y pahenra awm sy. Amen.