HEBRAI 10 - Khumi Common Language Bible

¹ Reita ly atiti kahawi awm ai naichi atawm tatang nai by y naimy, pa-pui awm khyh nai y, saneng tleirei apathyp jojo naira talam reng nai deaungko y jeu kasa naichi ai ly mana khala y py angym hai pajau y leang.

² Hunai ne mo khyly chiu nai keungchi ly huni tlenrei ra y my chai nai awm iy, kamngo nairachi apany naira by y nai deaungkho y, talam nai ly anawn vui y ai a?

³ Na i py huni apathyp naira y ly saneng tleirei kamngo nairachi adawn hai vau nai awm jojo lawh veng.

⁴ Si katai hawi mi-ichi i thi ly kamngo nairachi tama hai pajau ai nai ly aveng.

⁵ Hunai deaungkho y mymy ly khaileaung pri y satla nai thym khala y ly, “Nang ly apathyp naira hawi atiti talam naira ngai y, Nang ly kai i vui y tlang angvei hai rym lawh.

⁶ Leng patlum nai bom talam naira y hawi, Kamngo i vui y apathyp naira y ly nang ly kawn naira pipi ngo y leang bo;

⁷ Hunaibaly kaimy, ‘Aw Tameuh awi, khen cham, Cha-iu aeang y ly kai i satang tajiu nai kamta ly Nang i kangai sa ai nai kang jeu he,’ kana pi,” napi.

⁸ Hini leng mang i leu sai ly, “Nang ly apathyp nairachi, atiti talam nairachi, leng patlum nai bom pei nairachi, kamngo i vui y apathyp nairachi ngai y i, hunira y py nang ly kawn naira pipi ngo y leang bo,” napi (hunichi ly reita kamta talam nai ne):

⁹ hunaibaly mymy ly “Khen cham, nang i kangai sa ai nai kang jeu he,” napi bo. Mymy ly pa-nyh nai ai khaw hai kalingi thai ai nai, kangman i nai ly la vui nai ne.

¹⁰ Isu Krista i tlang talam bi ai nai aly by y pa-rei tlenrei my talam nai deaungkho y huni kangai y ly achi ai ang chai hai bo.

¹¹ Naibaly pathyp pi nai keung bawibawi ly mymy i sa avo nai kamta kani tleirei sa iy, kamngo nairachi mana khala y py tamo hai pajau y nai apathyp jojo naira talam nai angdo reng;

¹² na i py ni ly deungtasarei i kavui kamngo nairachi i vui y apathyp naira harei talam nai bo y, Tameuh i lamtang mang y ateh lawh veng;

¹³ huni bo y mymy i paleung ka-echi ai ly my i kheu amchym naira lawn y ryrei ly ajeng veangveang.

¹⁴ Ati mana nai mo nabaly ni ly harei chy talam naira y my chai hai chum naichi ai deungtasa khrairei angym hai bo.

¹⁵ Naibaly Phailo kachai my py achi ai pany hai teang i,

¹⁶ “Huni neng bo y ly nichi teng y Leu maikawm kakhai ai nai ly hini ne he; Nichi i paleung y kai i leu pei naichi kakhai ai i, Nichi i dawn naira y py katajiu teang ai, nanai Areng my napi,” napi. Naibaly huni thui nai bo y ly,

¹⁷ “Nichi i kamngo nairachi hawi nichi i taphra nairachi py kapany pi ali y ai bo,” napi bi.

¹⁸ Hunaibaly hunichi ai pahen naira nga hai baly kamngo i vui talam bi ai nai by y leang bo.

Tameuh teng y ahi hawi sina

¹⁹ Hunaibaly amjo amnauchi awi, heng nai lam kangtha ang khai pi rym nai, kanih jang nai mang y

²⁰ (huni ly mymy i tlang nanai sai ne) kun iy, Isu i thi deaungkho y achi ly Meingtym Kachai y kun ai nai vam iy,

²¹ Tameuh i dengtheungchi i tlang tleaung y lu y awm nai pathyp pi nai keung nang parai nai nga nai deaungkho y py,

²² achi i paleung y hawi nai hawi y nai pany naira kamngo ai katheng pan nai hawi, achi i tlang py tui kamchym y ahiu nai awm iy, ym naira kangym awm nai paleung meitang apu naimy kasa u sina.

²³ Hini achi i athang khai naira i ym nai leu amchyh y ai nai patawn u cheng sina; ati mana nai mo nabaly leu adeu nai keung ly ka-ym awm nai ne:

²⁴ naibaly tamen naira y hawi atiti kahawi sa naira y py apachei ai nai dawn u leungtang sina;

²⁵ achi ly phyreichi i sa nai kamta achi i achu nai ly anawn vui y naimy apachei ahawi sina; kani ly kasa ryh kasa ryh, nanai dawn pany iy, hunai kamta khri pa-rei atho so u.

²⁶ Achi ly leu meitang pany naira kangym nga nai bo y ly atiti kamngo sa ta-li baly, kamngo nairachi i vui y apathyp naira ly pipi by y leang bo i,

²⁷ tara chih naira ka-jei ka-teng ny y nai tym ai nai athang khai nai hawi, tiu nai keungchi ai kang pawn ai nai kado theu naira mai py avum ai nai athang awm.

²⁸ Mosi i Reita ai taphra nai khumi ly pany nai keung leaung nyhrei mo leaung thomrei mo i leu y pahen naira pipi abawi y naimy dei reng:

²⁹ hunaibaly Tameuh i Chapo ai kheu anui y chiu nai, mymy ai chai hai nai leu maikawm thi ai ly atiti rumrang y palawn lawh iy, pahenra Phailo ai pangaw hai nai keung i tlang tleaung y ly mana tanrei pajeng naira ty keh nai patang ai nai ataing, nanai mana dawn u mo?

³⁰ “Vawitheung nanai ly kaimy tha ai nai tla, kaimy heung ai,’ nanai hawi, “Areng my ly ni i khumichi ai chih ai” napi nai keung ai ly achi pany.

³¹ Tameuh kangheng i kiu y tla ai nai ly atiti ka-jei awm parai nai ne.

³² Na i py jangni y nangchi ai angvang hai nai bo y khri pa-rei khrukhra la parai nai patang nai thym khala i kani ly adawn u vau;

³³ lamrei y ly jo nai hawi patang nai deaungkho y nangchi ai khen kahawi ra ang palawn: lamrei y ly hunai kamta awm naichi hawi amkawm nai deaungkho y patang u bo.

³⁴ Nangchi ly theaung y tla naichi ai py tamen u bo, naibaly awm jo nai yhmtheaung hawi keh nai awm, nanai pany u iy, nangchi i yhmtheaung ang lawm pi nai py amo theu naira palawn u bo.

³⁵ Hunaibaly nangchi i vam nai sai ly patlaw u moh; huni ly kawn nai vang khra pa-rei nga hai nai ne.

³⁶ Nangchi ly Tameuh i kangai sa nai bo y atiti adeu nai ly nga thai ai nai, kham tanga naira aly ngai u chy bo.

³⁷ “kra y nai sala y jeu ai nai keung ly ajeng y naimy ang satla praw ai.

³⁸ Na i py kai i khumi kahawi ly ym naira deaungkho y heng ai; Ni ly nithun mang y anaw baly Kai i paleung ly den py ni ai kawn y ai.”

³⁹ Na i py achi ly tama naira tym pa-rei ni thun mang y anaw nai kamkawm ny y leang; hengra lawi hai ai nai ym naira awm nai kamkawm ne lawh veng.