HEBRAI 1 - Khumi Common Language Bible

Chapo teng i dengdairei leu pei nai

¹ Tameuh my jangni y sangum cheaungkhangra y amsi pajochi teng y amochi ai leu thui hai;

² na i py hini kangkhym kangtem i neng y ly mymy ly Chapo ai achi teng y leu thui hai bo; mymy ly ni ai ati cheaungkhang amtym ai nai keung y khai rym i, ni i saho y kani khaileaung py sa.

³ Ni ly mymy i nang parai naira kangvang sangso hawi awm nai sai atawm khypkhyp nai ne, naibaly mymy i atiti sa thai nai leu deaungkho y ati cheaungkhang khaw hai; naibaly ni ly kamngo pachai nai bo y salo mang y Tahm Asang Keh Nai i lamtang mang y ateh bo;

Chapo ly len keh nai

⁴ Ni ly kani pri i amtaw thau naichi tleaung y amyn hawi keh nai amtym nai deaungkho y, nichi tleaung y hawi keh nai lawn bo.

⁵ Ati mana nai mo nabaly Tameuh ly, “Nang ly kai i Chapo ne, Vaini ly kang lawn hai bo,” napi nai hawi, Kai ly ni i vui Ampo lawn ai i, Ni ly kai i vui Chapo lawn ai,” nanai kani pri i amtaw thau naichi theung y ami teng y thui vai mo?

⁶ Naibaly mymy ly tapen man nai ai ly khaileaung pri y hawi bi kha y, “Tameuh i kani pri i amtaw thau naichi bawibawi ly ni ai chiu u sy,” ang napi.

⁷ Naibaly mymy ly kani pri i amtaw thau naichi i molam y, “Ni ly mymy i kani pri i amtaw thau naichi ai ly ali y lawn hai reng, Ni i kalop sa nai keungchi ai py mai kangveaung y lawn hai reng,” ang napi.

⁸ Na i py Chapo i molam y naini hini thui nai ne; “Aw Tameuh, nang i areng atehra ly deungtasarei awm ai nai ne; Teng naira areng cheaungvawi py nang i peang naira i areng cheaungvawi ne.

⁹ Nang ly hawi naira ai ly ngai i, hawi y naira ai ly nang ly niu ngai y; hunai deaungkho y Tameuh, nang i Tameuh ly nang i ahawichi tleaung y ly nang i tlang tleaung y amo theu nai rimui khri pa-rei ang thi nai bo he,” napi.

¹⁰ Naibaly “Areng awi, nang ly angchei khala y ly khaileaung palum bo, Kani py nang i kiu y sa nai ne;

¹¹ Hunichi ly tama pawn ai i, Nang ly awm jojo ai nai ne: Hunichi bawibawi ly ateaung kamta ly tangym ai i,

¹² Nang ly hunichi ai kanih kamta taeang ai, ateaung kamta khyp pa-rei. Hunaibaly hunichi ly takhra veng ai bo: Na i py nang ly huna jojo ai i, Nang i sanengchi py tem ai ny y,” napi.

¹³ Na i py mymy ly, “Nang i paleung ka-echi ai ly nang i kheu amchym naira kaso y ryrei ly, Kai i lamtang mang y ateh,” nanai kani pri i amtaw thau naichi theung y ami i molam y thui vai mo?

¹⁴ Nichi bawibawi ai ly kalop sa ai nai phailo, paheng naira amtym ai nai keungchi ai sabawm ai nai pato nai ny y nai sai a?