Ezekiela 8 - Khumi Common Language Bible

EZEKIELA I TAMEUH AI PALEUNG MEI Y PA-NYH NIU BI NAI 8.1—10.22 Jerusalem maryra y myn chiu nai

¹ Kaichi pri palara avum nai tariu saneng, tariu lo, pa-ngo kani y Juda cheng luchi ly kai i yhm y ateh u iy, kai hawi leu arum nai thym khala y sa thai naira awm nai Areng i sa thai naira ly vaimy kai i tlang tleaung y tym bo.

² Kai ly khen kalau iy angdeang nai khala, mai kangveaung ka-tawm khumi i mo-cha amteng nai kaniu. Ni i akeng i ka-so kheupui meaung khrairei anui mang ly mai hawi atawm i, tleaung mang ngierei ly kachi pyn nai kheupaja kamta sadi pa la na.

³ Ni ly kiu ka-tawm hawi ajang iy kai i sam y theih. Naibaly hini paleung mei y niu nai theung y Tameuh i phailo my ly kai ai ali theung y kateng kalau i, Jerusalem mary Achura yhm tosyh ngan katheu pa-kho mang y ang pahawi nai ne. Hunira y Tameuh i mei a ngai y nai myn harei awm.

⁴ Kai ly Kheba tavo sahawi y amteng hai nai kamta, hini meingtym y py Israela chengchi i Tameuh i nang parai nai kangvang kaniu bo.

⁵ Tameuh my kai teng y, “Nang khumi cho awi, tosyh ngan mang y khen cham,” ang napi i khen nai khala, katheu pa-kho sahawi i maicham sahawi y Tameuh i mei adawi y nai myn kaniu nai ne.

⁶ Tameuh my kai teng y, “Nang khumi cho awi, nichi i sa nai leaungsai nang niu lo-oh? Hini meingtym y Israela chengchi i sa nai amso ngai naichi khen cham; nichi ly kai ai meingtym kachai hawi palo tleaung palora naira mang y ang paryh bo. Nang ly hunichi tleaung y amso ngai hawi naichi malawn py niu ai,” napi.

⁷ Mymy ly kai ai angam mang i ly-um apai pa-khora y anghawi i, apaira y awm nai kho harei ang patei.

⁸ Mymy ly “Nang khumi cho awi, apai ly hinira i my takeu vau,” nanai leu pei nai kamta kai ly katakeu vau nai khala, katheu harei kaniu bo.

⁹ Mymy ly kai teng y, “Theung mang y kun ly huni khumichi i hawi y nai amso ngai nairachi khen cham,” ang napi.

¹⁰ Hunaibaly kai ly theung mang y kun iy khen bo. Apai dengpangra y pavuichi, takhra chai y nai tawnbawi mynchi hawi, Israela chengchi my chiu nai takhra mynchi kaniu.

¹¹ Hunira y Shaphan i chapo Jaazaniah raurei, Israela cheng lu sa nai leaung vui saryhreichi awm. Nichi ly mui katui leng patlum nai khau ha harei syn u akyhkyh. Mui katuira i maikhyhchi py amhui kalau nai ne.

¹² Tameuh my kai ai, “Nang khumi cho awi, Israela cheng luchi i kangviu kam-ai y sa naichi nang niu a? Nichi ly mymychi kypkyp i mynchi awm nai takun theung y chiu u. Nichi my, ‘Areng ly achi ai niu y leang! mymy ly achi i pri khai su bo,’ nanai akhi u,” napi.

¹³ Naibaly Areng my, “Nichi ly hini tleaung y malawn py paso ai hawi parai naichi sa u nai nang niu ai,” napi.

¹⁴ Hunaibaly kai ai Achura yhm tosyh ngan katheu mang y anghawi. Naibaly Tamuza tameuh dei nai molam y vo hai u nai neampachychi ai patei bo.

¹⁵ Mymy ly “Nang khumi cho awi, hunichi ai niu lo-oh? Huni tleaung y malawn py amso ngai nairachi nang niu bi ai rai,” napi.

¹⁶ Hunai deaungkho y mymy ly kai ai Achura yhm apai theung y anghawi. Achura yhm y kun nai pa-kho sahawi i maicham hawi dangkhung sala y khumi leaung apom phai pangrei awm. Nichi ly Achura yhm y nithun thun u iy nisi mang y mo tha naimy kani si nai ai chiu u nai ne.

¹⁷ Areng my kai teng y, “Nang khumi cho awi, hunichi nang niu lo-oh? Hini Juda chengchi ly nang i niu nai amso ngai nairachi sa u nai ly kamsi kamdi chychy teu i, nichi ly pri verei y khrukhra naira kawi hai be bo. Huni khyh ny y rai, Achura yhm y jeu u iy hina naichi sa u nai deaungkho y, nichi ly kai ai kado ang patheu haira bo. Khen cham, nichi ly mana tanrei kai ai mei aniu y nai sa u na ly!

¹⁸ Nichi ly dengkeaung changpi ai notareangra y bi naimy kai ai mei aniu y nai sa nai ly khen cham; nichi ly kai i khri pa-rei kado theu naira angym pa-rei avum u ai. Kai ly nichi ai kangheng patleaung ai ny y; mana mo i py kapahen ai ny y. Nichi ly kai teng y tao pajeng parai naimy aeu iy chiu sa u teu i py, kai ly kapathang pi ai ny y,” napi.