Ezekiela 46 - Khumi Common Language Bible

Samrang hawi pawi kanichi

¹ Sa thai naira angym nai Areng my, “Apai theung i ly-um mang y kun nai nisi katheu pa-kho ly kalop sa nai kani tariurei sala akho typ ai nai tla. Na i py huni pa-kho ly Anawn kani hawi lo si kani y paeaung jo ai nai tla.

² Peang thym nai samrang ly huni katheu mang, apai theung i ly-um dengdairei katheu pa-kho theung mang y awm nai takun theung y kun ai nai tla. Ni ly mymy i leng patlum nai kapathyprachi, leunghawi kapathyprachi ai pathyp pi nai keungchi my talam nai thym khala, katheu pa-kho chengheng sahawi y angdo ai nai tla. Ni ly katheu pa-khora chiu sa chum baly, angam mang y theu teang ai nai tla. Katheu pa-kho ly dym mang y khrairei paeaung jo ai nai tla.

³ Anawn kani hawi lo si kani tym nai tleirei khumi bawibawichi ly katheu mo mang dengdairei lu meung naimy, Areng ai chiu u ai nai tla.

⁴ Samrang ly Anawn kani y Areng teng y leng patlum nai kapathyprachi talam ai nai, no-na by y nai beramcho tariurei hawi beram katai harei syn ai nai tla.

⁵ Ni ly beram katai ha harei hawi vanrei teicha teinei katalamra talam ai nai tako dei teaungrei, beramcho ha harei hawi vanrei amy i talam ai ngai nai ryrei syn ai nai tla. Teicha teinei tako dei teaungrei y olive asitui palang palyhrei syn ai nai tla.

⁶ Ni ly lo si kani y no-na by y nai si katai beaungjeaung harei, beramcho tariurei hawi vanrei beram katai amairei talam ai nai tla.

⁷ Teicha teinei katalamra talam ai nai tako dei teaungrei hawi, si katai beaungjeaung horei ai py, tako dei teaungrei hawi vanrei, amy i talam ai ngai nai ryrei talam ai nai tla. Takodei teaungrei y olive asitui palang palyhrei talam ai nai tla.

⁸ Samrang ly mymy i kun nai lam mang dengdairei, katheu pa-kho mang theu ai nai tla.

⁹ “Mani pawi kani y py ne sy, Areng y chiu ai nai khumichi jeu u nai khala, tosyh katheu pa-kho mang kun naichi ly chiu sa chum baly tokalawi katheu pa-kho mang theu u ai nai tla. Tokalawi katheu pa-kho mang kun u baly, tosyh katheu pa-kho mang theu u ai nai tla. Ami py ne sy, amy i kun nai lam mang ali teang ai nai ngo y. Khumi luteng ly mymychi kun nai katheu pa-kho mang ali teang y naimy, mo kataw tako jo iy theu ai nai tla.

¹⁰ Samrang ly khumichi kun nai khala kun iy, nichi theu nai khala theu ai nai tla.

¹¹ Pawi kanichi khala sa reng nai pawichi ly apathyp nai si katai harei hawi beram katai harei y teicha teinei katalamra tako dei teaungrei, beramcho harei hawi vanrei chiu sa nai khumichi my talam nai ngierei talam ai nai tla. Teicha teinei katalamra tako dei teaungrei y olive asitui palang palyhrei py talam ai nai tla.

¹² “Leng patlum nai kapathypra hawi, leunghawi kapathypra, napi nai katalamrachi ai peang thym nai samrang ly mymy alyly naimy Areng teng y talam ai ngai nai khala, ni i vui nisi pa-kho paeaung pi ai nai tla. Ni my py Anawn kani khala i kamta kapathypra talam ai nai tla. Ni theu ali teang nai bo baly katheu akho teang ai nai tla,” napi.

Kani tleirei sa ai nai kapathypra

¹³ Sa thai naira angym nai Areng my, “Khawn tleirei no-na by y iy sanengrei awm nai beramcho harei, Areng teng y bom verei leng patlum ai nai tla. Hini katalamra ly kani tleirei sa ai nai tla.

¹⁴ Takodei sie vui palyh pa-ngo sie pangrei py khawn tleirei talam ai nai tla. Huni tako dei hawi katlen ai nai olive asitui palangrei bo y ka-hyhrei py talam ai nai tla. Areng teng y talam nai hini katalamra reitachi ly deungrei khaw jojo ai nai tla.

¹⁵ Areng teng y khawn tleirei beramcho, tako dei hawi olive asituichi talam u jojo sy,” napi.

Samrang hawi pri

¹⁶ Sa thai naira angym nai Areng my, “Peang thym nai samrang ly mymy i chapo leaungrei teng y, mymy i peang nai khaileaung meingtym harei pei pi lawh baly, huni khaileaung ai chapo my amtym jojo sy.

¹⁷ Na i py samrang ly mymy i khaileaung meingtym harei ai, miseaung leaungrei teng y pei lawh baly, huni miseaung ly miseaung alaw nai kanikhala, huni khaileaung meingtym ly samrang teng y tym ali teang sy. Huni khaileaung ly samrang i ne nai deaungkho y, ni hawi ni i chanauchi naini amtym jo thai khyh nai ne.

¹⁸ Kai i khumichi my peang nai khaileaung meingtymchi ai vym vui nai molam y nichi ai patheu thai y ai nai, samrang ly mymy i chapochi ai mymy i peang nai khaileaung meingtym naini pei ai nai tla. Kai i khumichi ly mymychi amtym nai khaileaung khai su moh sy,” napi.

Achura yhm i takeangchi

¹⁹ Naibaly huni khumi ly apai theung i ly-um tokalawi mang, katheu pa-kho sahawi y awm nai takunchira kun nai pa-kho mang y kai ai hawi jo bo. Huni takunchi ly chai parai nai takunchi ne iy, pathyp pi nai keungchi i vui khai pi takhra nai ne. Huni khumi my kai ai takunchi nidym mang y awm nai meingtym ang patei i,

²⁰ hini meingtym ly pathyp pi nai keungchi i kamngo ahui nai kapathypra, ti y baly sa tamang nai kamngo ahui nai kapathypra talam ai nai mawi byh naira, tako dei katalamra paawp nai meingtym ne. Hunai deaungkho y khumichi teng ka-jeira tym y ai nai, katalamra kachai ngiereichi ai, apai angam mang i ly-um y patheu ai nai avo y,” napi.

^21-22 Naibaly ni ly apai angam mang i ly-um y ang hawi i, taki palyhrei i taki tleirei y apaichy ha harei awm nai ly kai ai patei nai ne. Apaichy ha harei ly jeng miu vui palyhrei, ka ly miu phairei awm iy,

²³ lengseaung apang tapang nai ne. Huni angpang y kan ryp iy takeangchi thie nai ne.

²⁴ Huni khumi my, “Hini takeangchi ly khumichi my talam nai tawnbawichi ai, Achura yhm y kalop amsi nai khumichi i, mawi byhra takeangchi ne,” nanai kai teng y ang thui pi bo.