Ezekiela 37 - Khumi Common Language Bible

Hiu kapeaungchi kawi nanai leaunghawi

¹ Areng i sa thai naira ly kai ai ang khiu i, mymy i phailo my kai ai hawi jo iy, hiuchi kawi nanai leaunghawira y ang khai bo.

² Mymy ly kai ai huni leaunghawi mang y ang hawi i, huni meingtym y hiuchi neangneang awm iy, huni hiuchi ly hiu kapeaung cheichei ne, nanai kaniu.

³ Mymy ly “Nang khumicho awi, hini hiuchi ly heng ali teang thai na a?,” nanai kai teng y deng. Kaimy, “Sa thai naira angym nai Areng, hini leu ly nangmy naini pathang pajau ai khyh!,” nanai kapathang.

⁴ Mymy ly “Hiuchi teng y amo leu thui pi. Areng i leu pei nai tangai u ai nai hiuchi teng y thui pi.

⁵ Sa thai naira angym nai kai, Areng my leu pei nai ly nichi teng y kai my nangchi theung y taho hai thai nai ali pakun pi iy, nangchi ai heng hai ali teang ai.

⁶ Nangchi teng y athovuichi hawi ngan bawichi lyn hai iy, peihchi hawi mym pi ai. Nangchi theung y taho hai thai nai ali pakun pi ai i, nangchi ai heng hai ali teang ai. Huna nai khala kai ly Areng ne, nanai nangchi pany u ai,” napi.

⁷ Hunai deaungkho y kai ly mymy i leu pei nai kamta thui bo. Huna nai thui nai thym khala, tyn rumsum nai katyn thai nai ne. Naibaly hiuchi ly ha harei hawi amtawn u amteaung nai ne.

⁸ Hunichi ai kakhen nai thym khala y my, hiuchi salo y athovuichi amteng ryh iy nganbawi lyn i, peihchi mym bo. Na i py heng y leang rai.

⁹ Tameuh my kai teng y, “Nang khumicho awi, ali teng y amo leu thui pi; khuteng taki palyhrei mang aho ly hini khumi kadeichi heng ali teang ai nai taho hai thai nai ali pakun pi ai nai, sa thai naira angym nai Areng my leu ang pei, nanai ali teang y leu pei,” napi.

¹⁰ Naibaly kai ly mymy i leu pei nai kamta thui pi bo. Huna nai khala khumi kadei veuchi ly taho thai nai ali nga i, heng iy angdo u sau nai ne. Huni khumichi ly tavaimi kamkawm pui lawm na pa-rei nawi bo.

¹¹ Tameuh my kai teng y, “Nang khumicho awi, Israela chengchi ly huni hiuchi hawi atawm teang. Nichi my kaichi ly hiu kapeaungchi ne i, dei nai teu bo; mo mang i vui athang khai naira by y leang bo, nanai thui u nai ne.

¹² Hunai deaungkho y kai i khumi Israela chengchi teng y amo leu thui pi; Sa thai naira angym nai kai, Areng ly nichi i tapreaungchi paeaung pi pawn ai, nanai thui pi. Kai ly nichi ai patheaung chum baly Israela pri y hawi ali teang ai.

¹³ Kai i khumichi ai up nai tapreaungchi paeaung iy nichi ai patheu nai khala y, kai ly Areng ne, nanai nichi pany u ai.

¹⁴ Kai ly kaimy i phailo ai nichi teng y kapei iy, nichi ai heng hai ali teang chum baly, mymychi i saleaung khutengra y awm hai ai. Huna nai khala kai ly Areng ne, nanai nichi pany u ai. Kai ly hina nai sa ai, nanai adeu nai kamta sa ai. Hini ly kai, Areng my leu pei nai ne,” napi.

Juda pri hawi Israela pri ai pri harei palawn nai

¹⁵ Areng i leu ly kai teng y tym bi bo.

¹⁶ Mymy ly “Nang khumicho awi, thengbeang harei lo ly hunira y ‘Juda pri hawi my i ahawi Israela pri i vui,’ nanai tajiu ba. Hunaibaly takhra thengbeang harei lo bi ly hunira y ‘Israela pri hawi my i ahawi Josepha i vui Ephraim thengbeang,’ nanai tajiu ba.

¹⁷ Huni thengbeang nyhrei ai harei amny khyh ai nai, nang i kiu y syn tabi mei ba.

¹⁸ Huna nai sa nai ly awm nai sai ati mo, nanai nang i chengchi my ang deang ai.

¹⁹ Huna nai khala sa thai naira angym nai kai, Areng ly Ephraim i syn nai Josepha i thengbeang hawi, Israela cheng hawi my i miso minganchi ai hawi iy, Juda pri i thengbeang hawi vanrei tabi nai harei kamta, kaimy syn mei ai, nanai nichi teng y thui pi.

²⁰ “Nang i kiu y thengbeang nyhrei syn ly khumichi niu nai pa-rei patei pi.

²¹ Hunaibaly sa thai naira angym nai kai Areng ly Israela chengchi ai, nichi tym nai khumi cheng cheaungkhangchi theung i nai pangym achu chum baly, mymychi i saleaung khuteng pri y kapahawi ai, nanai nichi teng y thui pi.

²² Kai ly nichi ai huni pri Israela mawichira y, pri harei lawm hai ai. Nichi ai peang ai nai samrang leaungrei awm ai. Khumi cheng nyhrei, pri nyhrei awm bi ai ny y.

²³ Nichi ly amso ngai nai mynchi hawi, mymychi ai chai hai y nai awm bi ai ny y. Kamngo sa nai molam y kamhi kamtlau apu y nai awm moh. Kai ly nichi ai kamngo sa nai hawi, sa tamangra i nai chai hai ai. Nichi ly kai i khumi lawm ai i, kai py nichi i Tameuh lawm ai.

²⁴ Kai i miseaung Davida ka-tawm samrang ly nichi i samrang lawm ai. Nichi bawibawi ly beram typ keung leaungrei i anui y amkawm u i, kai i reita leuchi ai ka-ym awm parai naimy kry iy kai i leu pei nai tangai u ai.

²⁵ Nichi ly mychi i amsi pajochi awm reng nai pri, kai i miseaung Jakob teng y kaimy pei nai pri y awm u ai. Nichi kamta nichi i cho chanauchi hawi, nichi i kangpreang bawibawichi py, huni pri y awm u jojo ai. Kai i miseaung Davida kamta samrang ly nichi ai peang jojo ai.

²⁶ Kai ly nichi hawi deungtasarei aly ai nai Leu Maikawm asa ai. Nichi ai kapalum iy khumi peung hai ai i, kai i Achura yhm ly nichi pri y khaw hai jojo ai.

²⁷ Kai ly huni meingtym y nichi hawi vanrei awm iy, nichi i Tameuh lawm ai. Nichi py kai i khumichi lawm u ai.

²⁸ Kai ly nichi theung y kai i Achura yhm awm hai jojo nai khala, kai ly Israela chengchi ai kaimy chai hai bo, nanai khumi cheng cheaungkhangchi my pany u ai,” napi.