Ezekiela 28 - Khumi Common Language Bible

Turu samrang i vui amo leu

¹ Areng i leu ly kai teng y tym.

² Mymy ly “Nang khumicho awi, “Turu samrang teng y sa thai naira angym nai kai, Areng i leu pei nai amti pi ai nai ly: nang ly paleung len amlyh naimy nangmy ai tameuh ne na iy, pangli my katanmeuh nai samrang atehra tleaung y tameuh kamta ateh ai nai nga, nanai thui bo. Nang ly tameuh kamta cheng naira awm, nanai athang khai teu i py, nang ly tameuh ny y, khumicho teu.

³ Nang ly nangmy ai Daniela tleaung y cheng keh nanai py, nangmy teng y ati sai py apha thai y, nanai py athang khai nai ne.

⁴ Nang i cheng naira, pany thai naira ly nang ai muku tangka, yhmtheaung katuichi nang chawn hai bo.

⁵ Nang ly ka-sum ka-pai sa naira y py kawp parai nai deaungkho y, kamranchi nga ra nga ra nai ne. Nang ly nangmy i nang chawn naira y khri pa-rei amlyh am-e na!

⁶ “Huna nai y vai, sa thai naira angym nai kai, Areng my leu pei nai ly: nang ly nangmy ai tameuh kamta cheng naira awm, nanai athang khai nai deaungkho y,

⁷ kai ly pahyp y nai paleung ka-echi my nang ai tiu ai nai kang hawi ai. Nang i cheng naira hawi kawp naira hawimy, ko naira i apu parai nai vawnsaichi ai, nichi my ang taphra pi pawn ai.

⁸ Nang ai py angawm theung y pala iy pangli tui y dei naichi kamta dei ai.

⁹ Nang ai padei ai nai khumichi i mo y, nang ly tameuh ne, nanai angam veangveang ai rai a? Nang ai padei ai nai khumichi ang jeu nai khala, nang ly tameuh ny y bo i, khumicho naini lawm ai bo.

¹⁰ Nang ly tameuh by y nai cheng takhra khumichi i kiu y, ui kamta dei ai. Hini ly sa thai naira angym nai kai, Areng i leu pei nai ne,” napi.

Turu samrang jy nai

¹¹ Naibaly Areng i leu ly kai teng y tym bi bo.

¹² Mymy ly “Nang khumicho awi, Turu samrang i avum ai nai khym taham i vui y paleung si ba. Sa thai naira angym nai kai, Areng my ati leu pei mo, nanai thui pi ai nai ly nang ly vaichi khala cheh ai nai by y na pa-rei hawi angym nai sai pata ai ataing nai ne. Nang ly khri pa-rei cheng iy mo-cha hawi parai nai ne na a!

¹³ Tameuh i Eden akho y awm naimy amia, diamond, topazi, berula, kanelian, Jasper, saphire, emerald hawi karanet napi nai vang kateng lengseaungchi amthyp ai nai nga bo. Nang i ateaungchi ly muku hawi pateaung nai ne. Huni ateaungchi ly nang ai chun nai kani y my, nang i vui sa pi yb nai ne.

¹⁴ Kai ly nang ai tamcheaung atho awm nai kani pri amtaw thau naira y khai takhra nai ne. Nang ly kai i chai parai nai mawi salo y awm iy, sadi nanai vang kateng lengseaungchi umtang y aleaung ai nai nga bo.

¹⁵ Nang ai chun nai neng khala i ka-so, kamngo so amteaung y nai neng ryrei, nang i sa nai saichi ly cheh ai naira by y.

¹⁶ Nang ly ka-jo ka-van sa nai kalop nawi nai deaungkho y, kamjau kamteang sa nai hawi, kamngo nairachi sa lawh bo. Hunai deaungkho y kai ly kai i chai parai nai mawi salo i nai, nang ai athorei my theu hai nai ne. Aw tamcheaung typ nai kani pri amtaw thau nai awi, sadi nanai vang kateng lengseaungchira i nai nang ai kang paryh bo.

¹⁷ Nang ly nangmy i mo-cha kahawi ai amlyh iy nangmy i amyn amthang naimy ly khumi ka-khum kamta lawm hai bo. Huna nai y kai ly khaileaung y khrairei tahm panem iy samrang takhrachi pany pa-rei amtiura lawm hai ai.

¹⁸ Nang ly ka-jo ka-van sa naira y huna nai hawi y nai sa i, nang i kamngo nai deaungkho y, nang i chiu nai meingtymchi ai chai hai y bo. Huna nai y nang ai vai khen nai khumi bawibawichi i mo y, kai ly nang i mary ai maitlawi lawm na pa-rei kang hai ai. Kaichi ly maitlawi naini niu u ai.

¹⁹ Nang ly chau veng bo, deungtasarei chau bo. Nang ai pany nai khumi bawibawichi ly nang i khym taham si nai kamta avum nai ly jei hyn u nai ne,” napi.

Sidon mary i vui amo leu

²⁰ Areng i leu ly kai teng y tym.

²¹ “Nang khumicho awi, Sidon mary mang y hi ly huni mary ai thui tamawn ba.

²² Huni mary i khumichi teng y sa thai naira angym nai kai, Areng i leu pei nai amti pi. Sidon mary awi, kai ly nang i paleung ka-e ne. Nang i tlang tleaung y kai i sa nai saichi molam y, khumichi ly kai ai palo u ai. Kai ly nang i khumichi ai pajeng iy kai i chai nai sai patei nai khala, kai ly Areng ne, nanai nichi pany u ai.

²³ Kai ly nang teng y no kanghawi pato ai. Nang i lamra y thi leaung hai ai. Nang ai katanmeuh iy ang tiu u ai i, nang i khumichi ly dei u ai. Huna nai khala kai ly Areng ne, nanai nang pany ai,” napi.

Israela chengchi amtheaung naira nga nai

²⁴ Areng my, “Israela chengchi ai mei aniu y nai tengpang sahawi i khumichi ly no pei nai alengchi kamta lawm bi ai ny y. Kai ly sa thai naira angym nai Areng ne, nanai nichi pany u ai,” napi.

²⁵ Sa thai naira angym nai Areng my, “Pri takhrachira y ahei nai Israela chengchi ai kaimy pahawi ali teang ai. Kai ly kachai ne, nanai khumi cheng cheaungkhangchi my pany u ai. Israela chengchi ly mymychi i pri, kai i miseaung Jakob teng y kapei nai pri y awm u ai.

²⁶ Nichi ly huni meingtym y chymme naimy awm u ai. Nichi ly yhmchi sa iy kreip akhochi sa u ai. Nichi ai mei aniu y sa nai pri deaungpa bawibawichi ai kaimy pajeng nai khala, nang ly chymme ai. Israela pri ly tlamsa naimy awm ai. Huna nai khala kai ly nichi i Areng Tameuh ne, nanai nichi pany u ai,” napi.