Ezekiela 27 - Khumi Common Language Bible

Turu mary i vui vo khulym

¹ Areng my kai teng y leu pei nai ly,

² “Nang khumicho awi, Turu mary i vui y vo khulym thui hai ba.

³ Huni mary ly pangli peang y awm i, pangli peang jeungrei y awm nai marychi hawi ka-sum ka-pai sa nai ne. Ni teng y sa thai naira angym nai Areng my ati mana leu pei mo, nanai hina nai amti pi. “Nang Turu mary awi, nang ly kamngo thuira by y na pa-rei apu parai nai deaungkho y amlyh reng nai ne.

⁴ Pangli ly nang i awmra yhm ne. Nang i kupe lasachi ly nang ai apu parai nai sampho kamta ang sa bo.

⁵ Nichi ly Heramon mawi i maicha keungchi ai pjeng si ai nai hawi Lebanon mawi i saitleang keung ai alika padora teang sa ai nai teaung u bo.

⁶ Ta-paichi sei ai nai Bashan daichi i ngopraibiu keungchi syn u; nang i sampho pangkan kangbai ly Kuparu tlawn i nga nai maicha keung hawi sa iy kasainuhchi hawi ka-pu sa nai ne.

⁷ Nang i alikachi ly Aikupta pri i nga nai pau thun nai kalang mai ka-syn hawi sa nai y, kamlo mang my ma praw nai ne. Nang i kanito kangvang ai dang naichi ly Kuparu tlawn i nga nai hawi keh nai an kamsen kanih ngan hawi sa nai ne.

⁸ Nang i ta-pai hai nai khumichi ly Sidon mary i khumichi hawi, Arava mary i khumichi ne. Nang i acham yb nai Turu mary i khumichi ly samphora y kalop sa naichi ne.

⁹ Sampho pathyp ai nai kupe kakawpchi ly Kibala mary i khumichi ne. Pangli y khuleaung chei nai sampho ngiereichira i sampho y kalop sa nai khumichi ly nang hawi ka-jo ka-van sa u nai ne.

¹⁰ Pasia pri, Ludia pri, Laidia prichira i tavaimi risachi ly nang i tavaimi kamkawm theung y kalop sa u. Nichi ly mymychi i khopuichi hawi tamo lukhymchi ai tavaimichi i awmra yhm y bang u nai ne.

¹¹ Arava mary i tavaimichi my nang i mary apaichi py, Kama mary i tavaimi kamkawmchi my nang i tavai angdeangra py typ pi nai ne. Nichi ly mymychi i khopuichi, nang i mary apai tleaung y bang u bo. Nang ai khen apu hai nai keungchi ly huni khumichi ne.

¹² “Nang ly nangmy i khri pa-rei nawi parai nai vawnsaichi ai Tashu mary y tangka, tamo, sengphru, kimachi hawi angtheung iy ka-sum ka-pai sa u bo.

¹³ Javawn mary, Tubal mary hawi Meshe marychira y nang i vawnsaichi ai, miseaungchi, kheupaja laawmchi hawi katheung u.

¹⁴ Beth Tokarmah mary mang i tym nai kalop sa hai nai keaungngochi, tavai keaungngochi hawi, keaungngo kano kasauchi ai, nang ly nangmy i vawnsaichi hawi katheung nai ne.

¹⁵ Dedan mary i khumichi py, nang hawi ka-sum ka-pai sa u. Pangli peang jeungrei i khumichi ly kasai nuh hawi dengkeaung ngan kamnumchi ai, nang i vawnsaichi hawi angtheung u bo.

¹⁶ Suria pri i khumichi ly nang i sa nai vawnsai amjy neangneangchi van u iy, hunichi ai emerald lengseaung, vang kateng lengseaung kamsen, an kamsen kanih ngan, mawi thun nai kanih ngan, kanih mai ka-syn, koral lengseaung, amiachi hawi van u nai ne.

¹⁷ Juda pri hawi Israela prichi my ly nang i vawnsaichi ai Minet mary mang i chohpui chamaw choh, khawi hang, olive asitui, mui katuichi hawi van u bo.

^18-19 Damaska mary i khumichi ly nang i vawnsaichi hawi nang i sa nai ateaung alangchi van iy, Uzala mary sahawi i Vawiden mary hawi Javawn mary i khumichi py, vawnsai ateaung alangchi i vui y helabon kreip hang, Sahah beram muichi hawi katheung u nai ne. Nichi ly tamo kangheng, mui katui amjyjychi hawi py, nang i vawnsaichi hawi katheung u bo.

²⁰ Dedan mary i khumichi ly nang i vawnsaichi ai keaungngo atang nai nibaichi hawi katheung u.

²¹ Arab khumichi hawi Kedar pri i samrangchi ly nang i vawnsaichi ai beramcho, beramchi, mi-ichi hawi katheung u.

²² Sheba hawi Ramah marychira i ka-pai sa nai khumichi ly nang i vawnsaichi ai hawi keh nai mui katuichi, lengseaung vang katengchi, mukuchi hawi van u bo.

²³ Haran mary, Kanneh mary hawi Eden marychi py, Sheba mary, Asuri mary hawi Khilam marychi mang i ka-sum ka-pai sa nai khumichi py, nang hawi ka-jo ka-van sa u bo.

²⁴ Nichi my hawi parai nai kanih nganchi, an kamsen kanih nganchi, mawi thun nai kanihchi, an sadi nanai sampraibyhchi hawi, amrui hawi parai nai vuinawn amjyjychi jo u nai ne.

²⁵ Nang teng i vawnsaichi ai sampho puichi hawi tang u bo. “Nang ly ji parai nai vawnsaichi tang iy pangli theung y awm nai sampho hawi atawm.

²⁶ Nang i ta-pai hai nai khumichi ly nang ai pangli theung y tym hai nai khala, nisi ali my nang ai pangli theung y phra hai bo.

²⁷ Nang i nang chawn nai vawnsai ngiereichi, samphora y kalop sa nai nang i khumichi, sampho pathyp nai lasamachi, ka-sum ka-pai sa nai keungchi, sampho tleaung i tavaimi bawibawichi hawi atang nai khumi ngiereichi ly nang i sampho phra nai khala pangli theung y akhum i, chau bebe nai ne.

²⁸ Sampho akhum naira i samphora kalop sa nai khumichi aeu nai raawi ly tui peang jeungrei avah na bo.

²⁹ “Samphora kalop sa nai khumichi ly mymychi i samphochi khai su iy kacheng y angkhyh u bo.

³⁰ Nichi ly mymychi i lu tleaung y spryhchi aphui iy speung y jawn u i, nang i vui khrikhri pa-rei vo tangam u bo.

³¹ Nichi ly nang i tlang tleaung y tym nai sai niu u i, sam avau biu iy paleung si paleung mawn nai ka-ma-ra y paisiu apam u. Nichi ly paleung si nai khrikhri pa-rei vo hang u bo.

³² Nichi ly vo tangam naimy nang i molam y vo khulym thui nai ly: ‘Vai ly pangli theung y chau jyhp nai Turu mary hawi mani mary pata pajau ai mo?

³³ Nang ly nangmy i vawnsaichi ai pangli vai pri takhra mang jo naira y, khumi cheng cheaungkhangchi i aly aeang naichi alaw hai bo. Nang i nawi parai nai vawnsaichi ly samrangchi ai nang chawn hai bo.

³⁴ Vai, nang ly pangli y phra i, suida pangli kathiu y tup jo nai ne. Nang i vawnsaichi hawi nang i kalop sa nai khumi bawibawichi ly nangmy hawi vanrei pangli y chau be bo,’ nanai vo sai mang y vo hai u nai ne.

³⁵ “Pangli peang jeungrei y awm nai khumi bawibawichi ly nang i taham si nai ai niu u i, rengrang tlai na u bo. Nichi i samrangchi malawn py, jei hyn nai phailo seaung u na i, meimai phra u na bo.

³⁶ Nang ly chau vui bo, deungtasarei chau vui bo. Khaileaung pri verei i ka-sum ka-pai sa nai khumichi ly jei hyn u iy, thui tamawn nai lu heng u ai,” nanai ne.