Ezekiela 23 - Khumi Common Language Bible

Kamngo sa nai neampachy amjo amnau leaung nyhrei

¹ Areng i leu ly kai teng y tym.

² Mymy ly “Nang khumicho awi, vaichi khala neampachy amjo amnau leaungnyhrei awm.

³ Nini ly deaungdi nai Aikupta pri y awm nai thym khala y, myni i kanu ai panem piu naira avum i, anglo mo phra iy bimanu lawm hawi bo.

⁴ Amjo ai ly Ahola,amnau ai ly Aholiba, nanai amyn pathi nai ne. (Ahola ly Samari mary ai amyn apu iy, Aholiba ly Jerusalem mary ai amyn apu nai ne.) Kai ly nini leaungnyhrei ai pom mei i, nini my cho chanauchi sa pi.

⁵ Ahola ly kai i aju ne teu i py bima sa veangveang nai, Asuria pri mymy i tavawichi i vui y kamleaung paleung khei y nai ne.

⁶ Nichi ly an kamleng atawm riri nai ateaungchi amthyp nai tavaimi luchi, samrang i bangtangchi hawi miteaung keh kalenchi ne. Nichi bawibawi ly mo-cha hawi iy keaungngo atang nai hawithym tavai luchi ne.

⁷ Ahola ly Asuria miteaung keh bawibawichi i vui bimanu ne. Amy i ngai phi nai kamleaung paleung deaungkho y, Asuria mynchi ai chiu naimy amymy ai chai hai y bo.

⁸ Ni ly my i mo-cha phra hai nai Aikupta pri y sa amteaung nai bima kalop ai sa jojo nai ne. Ni ly anglo cheangthli khala i ka-so my, neampachochi ly ni hawi vanrei i ahawi iy, ni ai bimanu y palawn u bo.

⁹ Hunai deaungkho y ni i khrei nai Asuria cheng tavaimichi teng y, ni ai kaimy au nai ne.

¹⁰ Nichi ly ni ai tlang ka-keu naimy khai iy, ni i cho chanauchi ai patiu u. Hunaibaly ni ai haisau hawi tleh u nai ne. Ni i taham si nai satang ai meingtym tleirei y, neampachychi my preaung u bo.

¹¹ Aholiba ly hina nai leaungsaichi niu; na i py ni ly Ahola tleaung y hawi y keh nai bima lawm bo.

¹² Ni py sadi na iy atawm riri nai ateaungchi amthyp nai Asuria samrang i bangtangchi hawi, keaungngo kamkawm tavailuchi i vui kamleaung paleung khei y. Nichi bawibawi ly mo-cha hawi iy hawithymchi ne.

¹³ Ni ly hawi y kangteng nai khumi ne iy, amjo kamta hawi y parai nai khumi ne, nanai kai pany.

^14-15 “Ni ly tamang tleaung tamangra. Akeng kawmrachi hawi apu parai nai lupeuchi ajeng nai khalide miteaung kehchi ly khalide pri i Babulon miteaung keh keaungngo ka-ri atang nai tavailuchi hawi atawm iy, nichi i mynchi ai dengpangchira y an kamsen sadi nanai hawi mawi sa nai niu bo.

¹⁶ Huni mynchi ai niu phai niu baly ngai phi nai paleung awm nai deaungkho y, Babulon pri y awm nai huni khumichi teng y savaichi pato nai ne.

¹⁷ Babulon chengchi ly ni hawi, i ahawi ai nai tym u bo. Nichi ly ni hawi tamang iy ni ai chai hai y. Ni ly nichi ai paso nanai pa-rei, nichi my ni ai chai hai y na bo.

¹⁸ Huni neampachy ly khumi mipuichi i mo y tlang ka-keu naimy awm iy, khumi lutengchi teng y, mymy ly kangji nang y nai bima ne, nanai apany hai bo. Kai ly ni i amjo ai paso nai kamta, ni ai py kapaso nai ne.

¹⁹ Ni ly Aikupta pri y anglo chengthli nai khala i dengdairei sa nai kamta, vai py sa iy hawi y keh nai bima lawm bo.

²⁰ Ni ly keaungngo katai hawi keaungngo kano kasau kamta, khri pa-rei paleaung nai neampachochi ai ngai keh.”

²¹ (Nang Aholiba awi, nang ly anglo chengthli nai thym khala, neampachochi my nang i kanu ai panem piu nai deaungkho y, anglo mo phra nai Aikupta pri y, kamleaung sa nai kamta, sa tamang bi ai nai ngai lawh ly.)

Amnau neampachy i tlang tleaung y Areng my tara chih nai

²² “Huna nai y Aholiba awi, nang teng y sa thai naira angym nai kai, Areng my leu pei nai ly: nang ly hini tavawichi ai paleih na lawh teu i py, kai ly huni khumichi ai palau pi ai. Nichi ly nang ai kado theu iy ang katanmeuh ai.

²³ Babulon hawi Khalide khumichi, Pekod, Shoa, Koa mang i khumichi hawi, Asuria pri i khumi bawibawichi py palau pi ai. Nichi bawibawi ly mo-cha hawi iy, hawithym nai samrang i bangtangchi, keaungngo ka-ri kamkawm miteaung kehchi, tahm asang nai keaungngo atang nai tavaimi luchi ne.

²⁴ Nichi ly tavai ateaung, tavai keaungngo ka-richi, cha nei vawn tang nai ka-richi syn iy, tavaimi kanghu pui hawi nang ai tosyh mang ang tiu ai. Nichi ly khopuichi adang naimy tamo lukhymchi adeung iy, nang ai ang katanmeuh ai. Kai ly nang ai nichi i kiu y pajeng ai nai au ai. Nichi my py mymychi i reita y, nang ai tara angchih u ai.

²⁵ Kai ly mei angai y i, kado theu nai deaungkho y nang ai kado katheu hawimy tara chih ai nai nichi teng y kapei ai. Nichi ly nang i notareang hawi kanochi seithlau iy cho chanauchi ai haisau y tleh ai. Nang i cho chanauchi ai ly hawi u pawn iy, kangheng tang naimy mai y leng angchi khyp ai.

²⁶ Nang i ateaungchi sei pawn iy, nang i vang kateng lengseaungchi la pi pawn ai.

²⁷ Kai ly nang i kamleaung paleung ai py, Aikupta pri y nang anglo chengthli thym khala i ka-so, nang i kamngo sa naichi ai py anawn hai ai. Nang ly mana khala py, mynchi ai khen angdeang ai nai nga ai ny y. Aikupta pri satang py dawn ali ai ny y,” napi.

²⁸ Sa thai naira angym nai Areng my leu pei nai ly “Kai ly nang i niu ngai y nai hawi paso nai khumichi kiu y, nang ai kang au ai.

²⁹ Nichi ly nang ai niu ngai y i, nang i pateung achu nai vawnsai ngiereichi la vui iy, nang ai tlang ka-keu naimy ang khai u su ai. Nang ai tlang ka-keu naimy awm nai bima kamta lawm hai ai. Nang ly kamleaung paleung awm nai hawi bima kalop sa nai deaungkho y,

³⁰ hina naichi avum nai ne. Nang ly khumi cheng cheaungkhangchi i vui bima lawm iy, nichi i mynchi hawi amymy ai chai hai y bo.

³¹ Nang ly ngamjo neampachy i kheu lawi chiu nai deaungkho y, kai ly ni ai nei hai nai kamngo khau ly nang ai py kang nei hai ai,” napi nai ne.

³² Sa thai naira angym nai Areng my leu pei nai ly “Nang ly ngamjo neampachy i khau nei ai nai tla; huni khau ly len i taku py thiu. Nang ly khumi luteng i thui tamawn nai hawi, panui hai nai avum ai; huni khau ly kawi tup na.

³³ Huni my ly nang ai paleung bi hai iy, pavui hai ai; ka-jeira hawi parai nai lawm reng nai khau, ngamjo neampachy Samari i khau ne.

³⁴ Nang ly huni ai nei keng chum baly pakawi seaungkhrang iy, huni kakawichi hawimy amy i kanu ai o-piu vui ai. Hini ly sa thai naira angym nai kai, Areng i leu pei nai ne.

³⁵ Sa thai naira angym nai Areng my leu pei nai ly “Nang ly kai ai tami vui iy nithun thun naimy kamleaung paleung hawi bima kalop sa nai molam y, nang ly patang naira avum ai,” napi.

Neampachy amjo amnau leaungnyhrei ai Areng my tara chih nai

³⁶ Areng ly kai teng y, “Nang khumicho awi, nang ly Ahola hawi Aholiba nini ai tara chih ai nai angveirym bo a? Nini ly amso ngai nai atitichi sa hawi nai molam y tara pasau jau.

³⁷ Nini ly kamleaung sa nai, khumi ai padei nai, mynchi ai juvo palawn iy kai hawi nga nai chanauchi ai padei bo. Nini ly kai i chanauchi ai mynchi teng y apathyp hawi nai ne.

³⁸ Nini i sa nai kalopchi ly huni khyh ny y, kai i Achura yhm ai chai hai y iy Anawn kani ai py dawndan hawi y.

³⁹ Kai i cho chanauchi ai mynchi teng y apathyp nai kani y my, kai i Achura yhm y jeu iy chai y naichi sa hawi lawh!

⁴⁰ “Nini ly kamlora y avaw avawrei khumi pato iy neampachochi ai palau, neampachochi py jeu u nai ne. Neampachy amjo amnau nini ly tui ahiu chum baly, mei akhymchira y an ka-pu amthym iy, vang kateng lengseaungchi amthyp hawi bo.

⁴¹ Nini ly myni i mo y sabawi khai hawi chum baly, apu parai nai ira kadang tleaung y ateh hawi; sabawi salo y naimy pei nai mui katui hawi olive asitui khai hawi bo.

⁴² Amo theu u lengleang nai khumi kangbawm katyn thai bo. Huni khumi kangbawm ly daichi ka-vymra i hawi nai khumichi ne. Nichi ly neampachy nini i kiu y ka-sichi pachiu pi iy, apu parai nai lukhymchi amym hai pi bo.

⁴³ Huni khumichi ly kamleaung sa nai molam y atho bai nanai neampachy ai bima palawn ai nai paleung ano rai na a, nanai kai ly kadawn nai ne.

⁴⁴ Nichi ly bima nini teng y chei u taleang chei u taleang bo. Nichi ly neampachy hawi y nai Ahola hawi Aholiba nini teng y chei u taleang bi nai ne.

⁴⁵ Huni neampachy leaungnyhrei ly pajang sa nai hawi khumi ai padei nai molam y khumi kahawichi my ly nini ai kamleaung sa nai hawi khumi ai padei naichi palawn iy chih ai,” napi.

⁴⁶ Sa thai naira angym nai Areng my, “Nini i tlang tleaung y jei hyn nai hawi lawm ai nai khrukhra nai khumi kanghuchi ai palau.

⁴⁷ Nini ai lengseaung hawi aphi iy haisau hawi tleh; nini i cho chanauchi ai tleh iy yhmchi py mai leng pawn.

⁴⁸ Nini leaungnyhrei kamta pajang so y ai nai neampachy leilachi ai pany hai ai nai vui y, kai ly pri verei y hawi y sa nai khumichi ai anawn hai ai.

⁴⁹ Amjo amnau ni awi, kai ly nangni i hawi y sa nai hawi, myn chiu nai kamngochi molam y, nangni ai kang pajeng ai. Naibaly kai ly sa thai naira angym nai Areng ne, nanai nangni pany hawi ai,” napi.