Ezekiela 1 - Khumi Common Language Bible

EZEKIELA I TAMEUH AI PALEUNG MEI Y ANGCHEI NIU NAI 1.1—7.27 Tameuh i areng atehra

¹ Phairei saneng, palyh lo, lo si kani pangrei kani y, Buzi i chapo, Pathyp pi nai keung ne nai kai ly pri pala naira avum nai Juda chengchi hawi vanrei, Babulon pri Kheba tavo sahawi y awm nai khala, kani pa-kho am-eaung i, Tameuh my kai ai paleung mei y niu hai nai kaniu bo.

² (Huni saneng ly samrang Jehoiakhin ai pri pala nai pa-ngo saneng ne.)

³ Babulon pri Kheba tavo sahawi y kai ly Areng i leu pei nai raawi thai i, sa thai naira ly kai i tlang tleaung y tym bo.

⁴ Kai ly angdeang kalau iy khen nai khala, tosyh ngan mang ali kamchai aho nai kaniu. Khupanym pui mang amlosadichi theu iy, huni khupanym tengpang sahawi i kani khusang ly angvang teaung na; amlosadi theu nai y kheupaja hawi atawm nai ly sadi nanai ne.

⁵ Ali kamchai umtang y ly heng nai amjy palyhrei hawi atawm nai mo-chachi kaniu; hunichi ly khumi i mo-cha hawi atawm.

⁶ Na i py nichi ly meimai palyhrei hawi pakhi palyhrei awm akyhkyh nai ne.

⁷ Nichi i kheuchi ly tawphrai tlai teu i py, kheuchira y sichi ka-tawm muiken awm. Huni heng nai amjy ly kachi pyn nai kheupaja kamta amchai-da na.

⁸ Nichi i meimai palyhrei hawi pakhi palyhrei awm nai khyh ny y, pakhi tleitleirei anui y, khumi i kiuchi py awm teang.

⁹ Huni heng nai amjychi ly harei hawi harei abi pa-rei pakhi nyhrei kadai riri naimy, mo atha u leungtang nai ne. Nichi ly mymychi i tlang amhi y naimy asyh u bawn bo.

¹⁰ Huni heng nai amjy ha hareira y awm nai meimaichi ly harei hawi harei atawm y. Mo mang i ly khumi i meimai, lamtang mang i ly khrangsi i meimai, langvawi mang i ly si katai i meimai, nithun mang i ly ahmtlau i meimai hawi atawm nai ne.

¹¹ Huni heng nai amjychi ly harei hawi harei pakhi kadeaung abi pa-rei, pakhi nyhrei kadai iy takhra pakhi nyhrei hawi mymychi i tlang y mym bo.

¹² Nichi bawibawi ly khuteng taki palyhrei mang y mo tha u. Hunai deaungkho y nichi ly mymychi i ngai naira mang y amhi y naimy chei bawn thai nai ne.

¹³ Huni heng nai amjychi theung ymaiteaung kangveaung hawi atawm nai harei ly asyh jojo nai ne. Hunira i mai kadeu ly amlosadichi theu bo.

¹⁴ Huni heng nai amjychi py amlosadi kamta rang parai naimy amki u nai ne.

¹⁵ Kai ly heng nai amjy palyhreichi ai khen nai thym khala y, nichi ha harei i sahawi y khaileaung y abi nai ka-ri kheu harei awm riri nai kaniu.

¹⁶ Huni ka-ri kheu bawibawichi ly lengseaung vang kateng kamta sadi naimy, ha harei atawm riri; ka-ri kheu tleirei y amtawn hai nai ka-ri kheu takhra py awm akyhkyh bo.

¹⁷ Hunai deaungkho y huni ka-ri kheuchi ly amhi y naimy, khuteng taki palyhrei mang y heng nai amjy palyhreichi asyh nai kamta asyh teang.

¹⁸ Ka-ri kheu tavaichi ly meichi hawimy kawi na iy, asang parai i, ka-jei hawi parai nai ne.

¹⁹ Heng nai amjychi asyh nai tleirei y, huni ka-ri kheuchi py, asyh rau teang.

²⁰ Heng nai amjychi kani mang y angteang kalau nai khala y, ka-ri kheuchi py angteang kalau teang.

²¹ Hunaibaly heng nai amjy i phailochi ly mymychi ngai nai mang y asyh nai khala, ka-ri kheuchi py heng nai amjychi i sa nai kamta sa teang nai ne. Ati mana nai mo na baly heng nai amjychi i phailo ly ka-ri kheuchi ai peang nai deaungkho y ne. Huna nai y heng nai amjychi asyh nai khala, anawn nai khala, ali theung y angteang kalau nai khala py, ka-ri kheuchi ly hunai kamta sa u teang.

²² Heng nai amjychi i luleung mang y ly sadi iy uithawn lengseaung hawi atawm nai ka-jei awm nai, takhuru nai amjy harei py awm.

²³ Huni takhuru nai i anui y heng nai amjy ha hareichi ly mymychi hawi kasa nai heng nai amjychi mang y pakhi nyhrei kadai iy, takhra pakhi nyhrei ly mymychi i tlang y mym naimy angdo u bo.

²⁴ Nichi akheang nai khala, kai ly pakhi aho nai katyn thai. Huni katyn ly pangli tui kamsau kamta py, tavaimi kanghu pui i katyn kamta py, ati cheaungkhang sa thai nai keung Tameuh i katyn kamta py atawm.

²⁵ Na i py pakhichi pakhym iy anawn nai khala py, nichi i luleung mang i takhuru nai salo i katyn ly tyn jojo rai.

²⁶ Huni takhuru nai salo y ly saphire lengseaung hawi sa nai areng atehra ka-tawm harei awm. Huni areng atehra tleaung y ly khumi i mo-cha hawi atawm nai leaungrei ateh.

²⁷ Huni mo-cha awm nai i akeng leng mang ly mai kangveaung theung i kheupaja kamta sadi na; akeng i dengdai kheu kadeaung tym pa-rei, ni i anui mang ly mai kangvang hawimy tlang verei ang teaung na bo.

²⁸ Huna nai ang teaung nanai kangvang sangso ly khupanymra y tla reng nai seaungjai hawi atawm. Hini ly Areng i nang parai nai ai amteng hai nai kangvang sangso ne. Kai ly hina nai niu nai khala khaileaung y angbeu naimy atlym vui bo. Hunaibaly raawi harei my,