EZARA 5 - Khumi Common Language Bible

¹ Amo Hakai hawi Iddo i chapo amo Zekhariah nini ly Juda pri hawi Jerusalem mary y awm nai Juda khumichi teng y Israela chengchi i Tameuh my amteng hai nai leu thui pi u bo.

² Sheltiel i chapo Zerubabela hawi Jehozada i chapo Josua nini ly hini amteng hai nai leuchi thai nai khala y, Jerusalem mary Achura yhm ai sa u amteaung teang bo. Amo leaung nyhrei ly nichi ai sabawm nai ne.

³ Euphrat tavo pui nidym ka-peang samrang i bangtang kalen Tatenai, Shetha Bozenai hawi nini i ahawi kamkawm miteaung kehchi ly Jerusalem mary y chei u praw iy, “Hini Achura yhm sa palum teang ai nai nangchi ai ami my leu ang pei mo?” nanai deng u.

⁴ Nichi ly Achura yhm sa naira y abawi nai khumichi i amynchi hnei u.

⁵ Na i py Tameuh ly Juda lu sa naichi ai awm hai nai deaungkho y, Pasia miteaung kehchi ly empara samrang Dari teng y satang thai hai ai nai hawi, huni samrang teng i leu pei nai sai sairei ngo teang y ryrei ly ati sai py so u y ai nai leu pacheang bo.

⁶ Nichi ly empara samrang teng y pany hai nai cha pei pi nai ly:

⁷ “Empara samrang Dari awi, nang ly tlamsa naimy peang sy.

⁸ “Kaichi ly Juda pri y kachei u i, nang parai nai Tameuh i Achura yhm ly lengseaung puichi hawi sa iy lengseaung dengpangchi salo y dengkeaung tapang pakau naimy sa nai kaniu u bo, nanai samrang nang teng y kang pany hai nai ne. Kalop sa nai sai atyp parai nai deaungkho y amcheang u.

⁹ “Naibaly kaichi ly mipui lu sa naichi teng y, huni Achura yhm sa palum teang ai nai ami my leu ang pei nai mo, nanai deng.

¹⁰ Hini kalop sa naira y lu sa naichi i amynchi py, nang teng y pany hai ai nai kaichi my hnei yb bo.

¹¹ Nichi my, ‘Kaichi ly kani hawi khaileaung ai peang nai keung Tameuh i miseaungchi ne. Jangni khala i dengdairei sa thai naira awm nai samrang leaungrei my sa palum nai Achura yhm ai, kaichi sa palum teang nai ne.

¹² Na i py kaichi i amsi pajochi ly kani hawi khaileaung sa nai keung Tameuh ai kado patheu u lawh nai deaungkho y, mymy ly kaichi ai Babulon samrang Nebukhadnezar teng y au bo. Achura yhm py phra i, khumi mipuichi ai ly Babulon pri mang y hawi vui nai ne,’ nanai ang thui pi.

¹³ Naibaly nichi my, “Babulon empara samrang Kuru ly mymy i peang nai angchei saneng y, Achura yhm sa palum teang ai nai leu pei bo.

¹⁴ Huni samrang ly Jerusalem mary Achura yhm theung i Nebukhadnezar my la vui iy, Babulon mary tameuh yhm y khai vui nai muku, tangka ateaungchi pei ali teang nai ne.

¹⁵ Empara samrang Kuru ly mymy kalop pei nai samrang i bangtang kalen Shesabaza teng y huni ateaungchi au iy Jerusalem mary Achura yhm mang y syn hai i, huni Achura yhm ly meingtym kangngymra y sa teang ai nai leu pei bo.

¹⁶ Huna nai y Shesabaza ly ang tym i, Achura yhm leng amteaung nai ne. Huni Achura yhm sa nai kalop ly vaini khrairei sa nai ne i, cheang y leang rai,’ nanai ang thui pi teang.

¹⁷ “Jerusalem mary Achura yhm sa palum teaung ai nai Empara samrang Kuru my leu pei nai awm mo, by y mo, nanai samrang nang pany ai nai ngai baly, samrang yhm y kryme nai vuikanai theung y vai hau iy khen hai ba. Hunaibaly hini molam y nang mana sa hai ai nai ngai mo, nanai kaichi teng y leu pei teang kyh ba,” napi.