ESTHER 5 - Khumi Common Language Bible

Samrang hawi Modekai ai Esther my dym biu cha ai nai palau nai

¹ Esther ly mymy i biu hai nai pa-thom kani y samrangnu ateaungchi amthyp iy, samrang atehra bailang awm nai takun mo i samrang yhm angtheung katheu pa-kho y chei iy angdo jo nai ne. Samrang ly katheu pa-kho mang y mo tha iy ateh.

² Ni ly samrangnu Esther ai niu nai khala y paleung amtlau i, muku tivi talam pi bo. Esther ly sahawi y athui i, muku tivi meaung y teaung.

³ Samrang my, “Samrangnu Esther awi, ati aly awm mo? Nang i hnei ai ngai nai kai teng y thui ba; kai i empara pri ka-hyhrei ai malawn py hnei baly kang pei ai,” napi.

⁴ Esther my, “Samrang nangmy ngai pi ai na baly, vaidym kai i sa rym nai dym biu cha pawira y Haman hawi vanrei jeu ba,” nanai takeng.

⁵ Naibaly samrang ly Esther i ngai nai aly angym hai ai nai Haman ai palau kaliki iy, ni hawi vanrei Esther i dym biu cha pawira y chei hawi bo.

⁶ Samrang ly kreip hang nei thym naimy Esther teng y, “Nang i hnei ai ngai nai aly kai teng y thui ba; kai i empara pri ka-hyhrei malawn py hnei baly kang pei ai,” napi.

⁷ Esther my,

⁸ “Samrang nang ly kai i hnei nai aly pei ai na baly, khawndam mang y samrang nang i vui kaimy sa pi rym nai dym biu cha pawira y Haman hawi vanrei jeu bi ba; huni neng khala y kai i hnei ai ngai nai aly kang thui pi ai,” napi.

Haman ly Modekai ai padei ai nai dawn paviu nai

⁹ Haman ly dym biu cha pawi i nai vawi nai khala amo theu yhyh nai ne. Na i py ni ly Modekai ai samrang i yhm katheu pa-khora avum i, Modekai my ni ai tahm khai ai nai chiu y nai khala ly khrikhri pa-rei kado theu nai ne.

¹⁰ Na i py ni ly my i paleung am-yh naimy yhm y vawi i ahawichi ai mymy i yhm y palau, my i aju Zeret ai py nichi hawi vanrei ateh hai.

¹¹ Naibaly Haman ly mymy i nang nai saichi, chapo neangneang awm naichi, samrang my ni ai kalop kalenra y tahm pasang naichi hawi samrang yhm i takhra miteaung kehchi tleaung y malawn py, aly lenkeh naira abawi naichi amlyh nai ne.

¹² Ni i thui bi nai ly “Hini leaungsaichi khyh chang y rai, samrangnu Esther my py, samrang hawi kai ai ly dym biu cha pawi ang pacho nai ne; khawndam py kaini ai dym biu cha pawira y ang heang yb bo.

¹³ Na i py samrang i yhm katheu pa-khora y ateh nai Juda khumi Modekai ai kaniu nai ryrei ly vai kang thui pi nai bawibawichi ati sai py ny y nai lawm vui bo,” napi.

¹⁴ Hunaibaly my i aju hawi ahawi bawibawichi my ni teng y, “Miu vuipangrei asang nai akaeura yhmmawm leng hai be; Modekai ai huni akaeura yhmmawm salo y padei ai nai khawndam khawn mang samrang teng y hnei be. Naibaly amo theu parai naimy dym biu cha pawira y chei pajau ai,” nanai tau pei u bo. Haman ly huni tau pei nai tangai i, akaeura yhmmawm leng hai bo.