ESTHER 3 - Khumi Common Language Bible

Juda chengchi ai padei ai nai Haman i dawn tau nai

¹ Neng kra y nai thym khala y samrang Ahasuru ly Akai kangpreang, Hamedatha i chapo Haman ai samrang i bangtang kalenkehra y tahm pasang bo.

² Samrang my Haman ai lu meung iy tahm khai ai nai, samrang yhm y kalop sa nai khumi bawibawichi teng y leu pei yb nai kamta sa u. Modekai leaungrei naini so y naimy awm.

³ Samrang yhm theung i takhra miteaungkehchi my ni teng y, “Nang ly ati mana nai y samrang i leu pei nai tangai y lawh mo?” nanai deng i,

⁴ leu pei nai tangai ai nai kani tleirei parawi u bo. Na i py Modekai ly tangai pi y naimy, “Kai ly Juda cheng ne nai deaungkho y Haman ai lu meung pajau y,” nanai pathang. Naibaly nichi ly Modekai i sa nai ai Haman ly kham pajau mo, kham pajau y mo, nanai pany ai nai ngai i, Haman teng y amti pi bo.

⁵ Hina nai Modekai ly lu meung ai nai ngai y nai satang thai nai khala y Haman ly khrikhri pa-rei kado theu nai ne.

⁶ Modekai ly Juda cheng ne, nanai py pany nai deaungkho y Haman ly Modekai leaungrei ai khyh py ny y, Pasia empara pri theung y awm nai Juda chengchi ai raurei, tamyh pawn ai nai dawn bo.

⁷ Samrang Ahasuru i peang nai saneng holai nyhrei, Nisan napi nai angchei lo y Haman ly mymy i dawn yb nai kamta, sa ai nai avo nai kani ai Purim napi nai tambe va i, Adar napi nai lo holai nyhrei, kani holai thomrei kani y avah nai ne.

⁸ Naibaly Haman ly samrang teng y, “Samrang nang i empara pri khu ka-peang tleirei y khumi cheng harei awm. Nichi i reita tanyn ly takhra chengchi i reita tanyn hawi atawm y. Nichi ly pri peang nai Reitachi ai py tangai u y. Huna nai y nichi i tlang tleaung y neaung kham naimy awm nai ly samrang nang i vui ati sai py kamran by y leang.

⁹ Samrang nangmy ngai na baly nichi ai padei ai nai leu pei ba. Samrang nang ly hina nai kamta sa ai na baly, pri peang nai i vui nang i yhmtheaung katui khaira theung y tangka sie 435555 rei kapakun ai nai leu adeu mang,” napi.

¹⁰ Naibaly samrang ly mymy i leu pei naichi khaw typ hai ai nai pajawp typ nai ka-ma-ra kiusabyh amjiu iy, Juda chengchi i paleung ka-e Aka i kangpreang, Hamedatha i chapo Haman teng y pei bo.

¹¹ Samrang my, “Nang i ngai nai kamta sa ai nai hini chengchi hawi nichi i tangka ai, nang i kiu y kang au bo,” napi.

¹² Haman ly angchei lo kani holai thomrei kani y samrang i secretarychi ai palau iy, samrang i leu pei nai tajiu hai bo. Naibaly huni leu pei nai ly empara pri verei y awm nai khumi cheng cheaungkhangchi i leu y tapeang hai iy peang nai keungchi, samrang i bangtang kalenchi hawi miteaungkehchi teng y pei pi nai ne. Huni leu pei nai ai samrang Ahasuru i amyn hawi patheu nai, samrang i pajawp typ nai ka-ma-ra nip pi typ bo.

¹³ Cha tha nai khumichi ly huni leu pei nai cha ai, empara pri verei y awm nai khu ka-peang ngierei ra y syn u bo. Huni cha theung y ly “Ada lo kani holai thomrei kani, huni kanirei y my Juda cheng miteaung, deaungdi, neampacho, neampachy ngiereichi ai pahen y, pahyp y naimy padei iy, nichi i yhmtheaung katuichi lawm u sy,” nanai abawi nai ne.

¹⁴ Huna nai kamta sa ai nai neng tym baly angvei u rym ai nai, huni leu pei nai cha ly khu ka-peang tleirei y ahei ai nai ne.

¹⁵ Samrang i leu pei nai kamta Susa mary pui theung y hini cha patheu iy ahei hai bo. Naibaly cha tha nai khumichi ly thai hai nai cha ai, khu ka-peangchi ra y syn u bo. Naibaly Susa mary pui theung y khrukhra nai thym khala, samrang hawi Haman nini ly ateh iy kreip hang nei hawi nai ne.