EPHESI 4 - Khumi Common Language Bible

Tlang ly harei khyh

¹ Hunaibaly kai, Areng y theaung tla nai khumi my ly nangchi ly apanem nai hawi leu anui naira bawibawi hawi, tamen naira akham leungtang nai tarawi y amnym naira hawi,

² aly naira my kawm naira y Phailo bomrei naira ai ly kry ai nai sa u tanga iy,

³ nangchi ai ang palau naira y ly tako ai ataing ai nai kang takeng.

⁴ Nangchi ai ang palau nai ly athang khai naira harei y ang palau nai kamta ly, tlang harei hawi Phailo harei chy awm khyh;

⁵ Areng harei, ym naira harei, baptisma harei,

⁶ ati cheaungkhang i Tameuh hawi Ampo harei awm khyh; mymy ly ati cheaungkhang tleaung y py peang i, ati cheaungkhang num prei nai py awm, ati cheaungkhang theung y py awm teang.

⁷ Na i py Krista i atiti pei nai ne nai kamta, pahenra ly achi leaung leaungrei teng y ang pei bawibawi nai ne.

⁸ Hunai deaungkho y, “Mymy ly salo mang y lyn kalau nai thym khala y, Patiu naichi ai miseaung y hawi i, Atiti pei naichi ly khumichi teng y py pei,” ang napi.

⁹ (Hunaibaly “Mymy ly lyn kalau bo,” nanai ly, mymy ly khaileaung meingtym anui keh naira y kathiu manme, nanai sai ny y a?

¹⁰ Kathiu nai keung my ly ati cheaungkhang kawi hai thai ai nai, kani pri meingtym bawibawi salo kangteng y lyn kalau nai ne.)

¹¹ Naibaly achi ly ym naira paleung vanrei y hawi, Tameuh i Chapo ai pany naira y hawi, khumi ka-cheang lawn naira y hawi, Krista i angym naira len nai sai tanrei nai py achi bawibawi ataing y ryrei ly,

¹² khumi kachaichi ai angym hai ai nai hawi, kry nai kalop sa ai nai hawi,

¹³ Krista i tlang amcheang hai ai nai py, phyreichi ai ly amtaw thau naichi lawn ai nai py, phyreichi ai ly leu thui nai keungchi lawn ai nai py, phyreichi ai ly Satang Kahawi thui ai nai keung lawn ai nai py, phyreichi ai ly Pastor hawi patiu ai nai keung lawn ai nai py pei bo;

¹⁴ hunaibaly teng y naira y vam naira parawi nai kamta, achi ly cheng tapawp nai khumi i tapawp amang nai, patiu naira ali cheaungkhangra y hi mang py hu mang py pachaw iy hm ryry nai deungdi ny y ai bo.

¹⁵ Na i py achi ly tamen nai deaungkho y leu meitang thui iy, ati cheaungkhangra y mymy y ly veang ryh veang ryh thai ai; mymy ly lu ne, Krista ly.

¹⁶ Mymy i saho y tlang bomrei ly amtawm naira cheaungkhang sa nai deaungkho y adyh parai pa-rei myacha typ nai patawm achu iy, kangprei cheaungkhang my sa nai kamta, tlang ai ly tamen naira y amcheang ai nai veang hai nai ne.

Krista i saho y nga nai deung kangtha

¹⁷ Hunaibaly kai ly huna nai thui iy Areng y kang pany hai nai ne: Cheng Takhrachi i dawn rumrang nai tako nai kamta ly tako u bi moh; nichi i pany naira y ly veng nai ne;

¹⁸ huni pany y naira ly mymychi theung y awm nai deaungkho y hawi, nichi i paleung ly kyh chawn veng nai deauungkho y py, nichi ly Tameuh i hengra teng i nai amprei veng bo.

¹⁹ Hunichi ly sai py dawn nai paleung by y nai deaungkho y khri pa-rei atakaw ai nai atiti chai y naira cheaungkhang sa u iy, paleaung naira y bom apei u veng bo.

²⁰ Na i py nangchi ly hunai kamta Krista y amtiu u y leang;

²¹ Isu y leu meitang awm nai kamta nangchi ly mymy i raawi tangai iy mymy y amtiu nai ne nabaly:

²² nangchi i jangni i awm nai sai, khumi kangngym, tapawp naira i ngai phi teng y nai kamta phra ryh phraryh nai ai ly leng u vui ly,

²³ nangchi i paleung phailo y ly kangtha awm u ly, naibaly khumi kangtha,

²⁴ leu meitang hawi naira hawi chai naira y py Tameuh kamta ang sa nai ly amthyp u, nanai he.

²⁵ Hunaibaly ka-chawi thui nai ly anawn vui iy, leaung leaungrei ly amy i saleaungchi teng y leu meitang thui u sy; achi ly leaung leaungrei ly vanrei angprei ahawi nai ne.

²⁶ Kado theu u iy py kamngo tlo moh sy: nangchi i kado theu nai ai ly kani dym hai moh sy;

²⁷ diabola ai ly meingtym aheng pi u moh.

²⁸ Paviu nai khumi ly paviu bi moh jau sy; huna nai ny y naimy avaw nai khumi teng y atiti pei ai nai awm thai ai nai, mymy i kiu y atiti kahawi akawm pa-rei so sy.

²⁹ Leu hawi y nai ly nangchi i labeaung y den py theu moh sy, tangai nai keungchi ai pahenra nga hai thai ai nai, aeang nai kamta khaw hai ai nai leu kahawi ngierei phai thui sy.

³⁰ Tameuh i Philo kachai ai ly paleung mawn hai u moh, mymy y ly nangchi ai atleu nai kani i vui ly ang pajawp hai typ bo.

³¹ Kho naichi, kado theu naichi, amaran naichi, jo sei naichi, thui tamawn naichi bawibawi hawi, kamngo nairachi bawibawi py khai u su sy.

³² Naibaly ako leungtang nai neaung hawi nai awm u ly, Tameuh my Krista y ang pahen nai kamta ly apahen u.