DANIELA 12 - Khumi Common Language Bible

Deung tlum nai neng

¹ Ateaung kanem amthyp nai kani pri amtaw thau naimy, “Huni neng khala y tahm asang parai nai kani pri amtaw thau nai Mikhaela ly amteng ai. Ni ly nang i chengchi ai kry nai keung ne. Naibaly khumi neangneangchi awm angchei khala i dengdairei, mana khala py avum vai y nai ngari kamtang avum nai neng tym ai. Huni neng tym nai khala y Tameuh i cha-iu theung y amyn abawi yb nai khumi, nang i cheng bawibawichi ly law tleaung naira nga u ai.

² Dei chum nai khumi neangneangchi ly heng u ali teang ai. Nichi theung i phyrei khumichi ly deungtasarei hengra nga u ai. Phyreichi ly deungtasarei tahm anem naira avum u ai.

³ Lu sa nai khumi kachengchi ly kani mang i kangvang kamta, angvang phang na ai. Khumi neangneangchi ai teng nai kalopchi sa ai nai, thui parip pi nai khumichi py, ka-si taukichi kamta deungtasarei angvang ai,” napi.

⁴ Ni my kai teng y, “Aw Daniela awi, nang ly huni cha-iu pakhym vui ly khaileaung pri tem nai neng ryrei, huni salo y pajawp typ nai ka-ma-ra nip typ ba. Hina nai thym khala y khumi neangneangchi malawn py, huni leaungsaichi tym nai pany thai ai nai, atho sa u atyhtyh ai,” napi.

⁵ Naibaly kai, Daniela ly tavo vai adengdang nai mang y, khumi leaung leaungrei angdo nai kaniu bo.

⁶ Leaungrei my tavo syh mang angdo nai kani pri amtaw thau teng y, “Hini lyh ai hawi parai nai leaungsaichi ly ati mana khala tem ai mo?,” nanai deng.

⁷ Huni kani pri amtaw thau nai ly kiu nyhrei kani mang y pheu iy, deungtasarei heng nai Tameuh i amyn y vaineng abeu nai ly “Huni ly saneng thomrei bo y lo tariurei ateng ai. Tameuh i khumichi avum nai, ana nai leaungsaichi tem nai neng khala y, hini leaungsai bawibawichi py tem ai,” nanai thui nai kathai bo.

⁸ Ni i thui pi nai leu thai teu i py, kai ly pany thai y nai deaungkho y kai ly “Na i py areng awi, huni leaungsaichi ly mana khala tem ai mo?,” nanai deng.

⁹ Ni my pathang nai ly “Daniela awi, khaileaung pri tem khala khrairei, hini leuchi ai tamym me nai deaungkho y vai, nang ly chei ai nai tla ai.

¹⁰ Khumi neangneangchi ly paleung chai u ai. Khumi hawi y naichi ly pany thai naira by y i, hawi y naira sa u veangveang ai. Khumi kacheng naini, pany thai naira nga ai.

¹¹ “Kani tleirei kapathyprachi anawn hai nai neng, ka-jei hawi parai nai amso ngai naira tym nai neng dengdairei, kani 1,290 rei dym vui ai.

¹² Kani 1,335 rei dym nai neng tym pa-rei, ka-ym awm nai khumi ly taham hawi nai ne.

¹³ “Aw Daniela awi, nang py tem khala khrairei ka-ym awm ba. Hunaibaly nang ly dei ai. Na i py nang ly kani kangkhym i neng tem nai khala ly kawn vang nga ai nai ang thau ali teang ai,” napi.