ATITI AWM ANGCHEI NAI 7 - Khumi Common Language Bible

Tuibai tuitleng theu nai

¹ Areng my Nova teng y, “Nang hawi nang i yhm dengtheung kangym paleaung theung y kun u; nang leaungrei naini khaileaung pri verei y khumi kahawi ne, nanai kang niu.

² No-na by y nai mawi cheaungkhang theung i amjy harei y nu kalo ka-bom saryhrei, na i py chai y nai theung i amjy harei y nu kalo ka-bom harei lo khyh.

³ Tavo cheaungkhang theung i amjy harei y nu kalo ka-bom saryhrei, khaileaung salo y peung ali teang ai nai paleaung theung y pakun.

⁴ Vai momang kani saryhrei nai khala y, kaimy sa nai heng nai cheaungkhang tama thai ai nai, kani vui palyhrei, vum vui palyhrei kani nai hai ai,” napi.

⁵ Naibaly Nova ly Areng i leu pei nai kamta sa angym be bo.

⁶ Nova ly khaileaung salo y tuibai theu nai khala y saneng chungvai tariurei awm.

⁷ Naibaly tuibai tuitleng theu ai nai deaungkho y law tleaung ai nai Nova ly my i aju, chapo lengngochi hawi vanrei paleaung y kun u bo.

⁸ Tameuh my leu pei nai kamta no-na by y nai mawi hawi tavochi, chai y nai amso mawichi hawi tavochi theung i nai amjy harei y nu kalo ka-bomchi ly Nova hawi vanrei paleaung pui theung y kun u bo.

⁹ Tameuh my leu pei nai kamta hunichi ly Nova hawi vanrei paleaung pui theung y kun u nai ne.

¹⁰ Kani saryhrei bo baly tui len hai dudu bo.

¹¹ Nova i saneng chungvai tariurei saneng, pa-nyh lo kani holai saryhrei khala y, suida pangli tuino bawibawi py am-eaung iy kanitui pa-khochi py am-eaung hai bo.

¹² Naibaly kani vui palyhrei vum vui palyhrei khaileaung salo y kani khri pa-rei taawi hai bo.

¹³ Huni kani y Nova hawi my i aju, chapo leaung thomrei Sema, Hama, Japheth hawi ajuchi py paleaung pui theung y kun u bo.

¹⁴ Tavo cheaungkhang hawi daichi mawichi, yhm i tawnbawi katheang kalenchi hawi, amso mawi cheaungkhang py mymychi hawi vanrei kun u teang nai ne.

¹⁵ Heng nai amjy cheaungkhang nu kalo ka-bom ly Nova hawi vanrei paleaung pui theung y kun u.

¹⁶ Tameuh my leu pei nai kamta, Nova kun nai bo y Areng my katheu kho pi vui bo.

¹⁷ Kani vui palyhrei tui um dudu nai y, paleaung pui ly tui salo y ajau lawp na bo.

¹⁸ Tui ly len i paleaung pui ly amjau bo.

¹⁹ Tui len nai ly mawi ka-sangchi ai py um pawn na.

²⁰ Tui ly mawichi salo y miu holai pangrei asang nai ne.

²¹ Huna nai khala khaileaung salo i khumichi, amso mawichi, tavochi napi nai heng nai amjy cheaungkhangchi dei u bebe.

²² Khaileaung salo i taho thai nai amjy cheaungkhangchi ly dei chauchau bo.

²³ Areng ly tavochi hawi amso mawichi, khumichi, khaileaung y heng nai amjy cheaungkhang tamyh be bo. Nova hawi paleaung pui theung y vanrei awm naichi naini tleaung khyh nai ne.

²⁴ Tui ly khaileaung salo y kani chungvai atlo vuipangrei um naimy awm bo.