ATITI AWM ANGCHEI NAI 10 - Khumi Common Language Bible

Nova chapo i kangpreangchi

¹ Hini ly Nova i chapo Sema, Hama hawi Japhethchi i kangpreangchi ne. Tuibai tuitleng theu nai bo y hini leaung thomreichi ly cho chanauchi sa u bo.

² Japheth i chapochi ly Koma, Makoka, Madai, Javan, Tubal, Mesheka hawi Tirsachi ne. Nichi ly nichi i amyn angam nai khumichi i amsi pajochi ne.

³ Koma i kangpreangchi ly Askenaza, Riphath hawi Tokarmah khumichi ne.

⁴ Javan i kangpreangchi ly Elisa, Spain, Kupru hawi Rhode y awm nai khumichi ne.

⁵ Nichi ly pangli peang jeungrei hawi tlawnchira y awm nai khumichi i amsi pajochi ne. Japheth i kangpreangchi ly cheng takhra, pri takhra, leu takhra naimy amprei akyhkyh iy awm u bo.

⁶ Hama i chapochi napi nai kusha, Aikupta, Libia hawi Kananchi ly nichi i amyn angam nai khumi chengchi i amsi pajochi ne.

⁷ kusha i kangpreangchi ly Seba khumi, Havila khumi, Sabta khumi, Raama khumi hawi Sabteka khumichi ne. Raama i kangpreangchi ly Seba, Dedan i khumichi ne.

⁸ kusha ly chapo leaungrei awm; amyn ly Nimroda ne. Huni chapo ly khaileaung pri y khu ka-peangchi ai tiu manme iy eaung nai khumi ne.

⁹ Mymy ly Areng my sabawm nai saho y mawi sara kalen lawn i khumichi my ly, “Areng my Nimroda kamta nang ai py mawi sara kalen lawn hai sy,” nanai thui u reng.

¹⁰ Mymy i peang angchei nai khu theung y ly Babulon mary, Erech mary hawi Akad Marychi abawi nai ne.

¹¹ Ni ly huni pri dengdairei Asuria pri mang y chei iy, Ninevi mary, Rehobo Ire mary hawi Kalah marychi napi nai mary kalenchi ai py,

¹² Kalah mary kalen hawi Ninevi mary sala y awn nai Risen mary ai py sa nai ne.

¹³ Aikupta cheng kangpreangchi ly Ludia, Anam, Lehaba, Naphtu,

¹⁴ Pathrus, Kaslu hawi Krete khumichi ne; hunichi theung i dengdairei Philistin cheng angpreng nai ne.

¹⁵ Kanan i chapo chalu ly Sidon ne; Hetha py Kanan i chapo ne teang i, nichi ly nichi i amyn angam nai khumi chengchi i amsi pajochi ne.

¹⁶ Kanan ly Jebusi, Amori, Kirkasi;

¹⁷ Hevit, Arkit, Sinit,

¹⁸ Arvadi, Zemari hawi Hama chengchi i amsi pajo ne. Huni bo y Kanan i kangpreangchi ly

¹⁹ Sidon tokalawi mang dengdairei Kaza mary sahawi Kerar mary tym pa-rei, nisi mang Sodom mary, Komora mary, Adamah mary, Zeboim mary hawi Lasha mary sahawi tym pa-rei py, Kanan pri peang y khrairei ahei akyhkyh bo.

²⁰ Hunichi ly cheng takhra, pri takhra, leu takhra naimy pri tleirei y ahei nai, Hama i kangpreangchi ne.

²¹ Japheth i amjo kalen Sema ly Hebrai chengchi i amsi sangum ne.

²² Sema i chapochi ly Elam, Asura, Arpasa, Luda hawi Aramchi ne i, nichi ly nichi i amyn angam nai khumi chengchi i amsi pajochi ne.

²³ Aram i kangpreangchi ly Uz, Hula, Kether hawi Mesekachi ne.

²⁴ Arpasa ly Selah i ampo, Selah ly Eber i ampo ne.

²⁵ Eber ly chapo leaung nyhrei sa; leaungrei i amyn ly Pelek ne; ati mana nai mo nabaly ni i deung y khaileaung pri y awm nai khumichi ly amprei akyhkyh nai deaungkho y, huni amyn pathi nai ne; leaungrei i amyn ly Jokatan ne.

²⁶ Jokatan i kangpreangchi ly Alamoda, Seleph, Hazamavet, Jerah,

²⁷ Hadoram, Uzal, Dikala,

²⁸ Obal, Abimaela, Seba,

²⁹ Ophira, Havila hawi Jobab khumichi ne. Huni bawibawi ly Jokatan i kangpreangchi ne.

³⁰ Nichi i meingtym ly Mesha mary dengdairei nisi ngan mang Sephar mary khrairei kau.

³¹ Huni ly cheng takhra, pri takhra, leu takhra naimy pri tleirei y ahei nai Sema i kangpreangchi ne.

³² Khumi bawibawichi ly kangpreang takhra akyhkyh teu i py, Nova i kangpreangchi ne; tuibai tuitleng bo i khaileaung pri verei y awm nai khumi cheng cheaungkhangchi ly Nova chapochi i kangpreangchi ne.