AMTAW 8 - Khumi Common Language Bible

Sawla my palau takhra kamkawmchi ai ana patheng nai

¹ Naibaly huni kani ly Jerusalem i awm nai palau takhra kamkawmchi ai khri pa-rei ana ai nai amteaung bo; hunaibaly amtaw thau naichi ny y baly nichi ly Judai pri hawi Samari pri meingtym tleirei y ahei bebe bo.

² Naibaly Tameuh ai dawn parai nai amichi my mo Stephana ai ly up u i, khrikhri pa-rei vo hai.

³ Na i py Sawla my palau takhra kamkawmchi ai khrikhri pa-rei ana i, yhm tleirei kun iy neampacho neampachychi ai ryh i theaung y khai bo.

Samari pri y Satang Kahawi thui nai

⁴ Naibaly ahei naichi ly meingtym tleirei y chei iy leu thui pi preiprei.

⁵ Naibaly Philipa ly Samari avang y chei iy, mymychi teng y Krista i satang thui pi.

⁶ Naibaly khumi mipuichi ly mymy i leu thui nai hawi, atiti rengrang sa naichi niu iy, Philipa i leu thui pi nai ly paleung vanrei tangai pi.

⁷ Ati mana nai mo nabaly khumi neangneang ai nam naichi i taku theung i dengdairei vawinamchi ly athorei my aeu i theu bo; kamkhyn hawi kheu kambai neangneangchi py hawi pawn veng bo;

⁸ naibaly huni avang y ly khri pa-rei amo theu u na.

⁹ Naibaly amyn Simon khumi leaungrei awm; ni ly “Kai khumi kalen ne,” nanai jangvaini y huni avang y ly Samari i khumichi ai khri pa-rei lyh ai awm nai pa-rei atam sa pi;

¹⁰ naibaly khumi bawibawichi ly katheang keh nai dengdairei len keh nai khrairei my, “Hini khumi ly Tameuh i atiti sa thai naira Kalen napi nai ly, hini ne bo he,’. nanai ni i leu tangai pi bawibawi veng.

¹¹ Mymy ly atam sa iy nichi my kra parai pa-rei lyh ai awm parai nai deaungkho y mymy i leu tangai pi bo.

¹² Na i py nichi ly Tameuh i peang nai hawi Isu Krista i amyn Satang Kahawi py Philipa my thui pi nai ym u khala ly, neampacho py neampachy py baptisma nga u bo.

¹³ Naibaly Simon khrairei ym rau bo; naibaly mymy ly baptisma nga pajau iy Philipa teng y awm jo i, ka-ma-rachi hawi khrikhri pa-rei lyh ai awm nai sa naichi niu i, rengrang tlai ly, napi.

¹⁴ Naibaly Jerusalem y awm nai amtaw thau naichi ly Samari i awm naichi Tameuh i leu tangai bo, nanai thai i, mymychi teng y Petera nini Johan ai pato;

¹⁵ naibaly nini ly tym baly nichi Phailo Kachai nga thai ai nai chiu sa pi;

¹⁶ hu ti y rai khala y ly nichi theung y ami teng y py tym y rai; nichi ly Areng Isu i amyn y baptisma harei nga nai khyh rai.

¹⁷ Naibaly nini my mymychi i tlang tleaung y kiu tamam i, nichi ly Phailo kachai nga u bo.

¹⁸ Naibaly amtaw thau nai nini my kiu tamam nai deaungkho y phailo kachai pei nai ne, nanai Simon my niu iy,

¹⁹ “Ami i tlang tleaung y kai kiu tamam nai ngierei ly Phailo Kachai nga thai ai nai, hina nai kamta sa thai naira ly kai ai py pei kyh,” nanai nini teng y tangka pei ai nai tau.

²⁰ Na i py Petera my ly ni teng y, “Nang i tangka ly nangmy hawi vanrei tamo teang sy, nang ly Tameuh i pei nai ly tangka hawi van ai nai tau lawh nai deaungkho y.

²¹ Hinira y ly nang abawi y leang, abi py abi y leang; nang i paleung ly Tameuh i dawn naira y hawi y leang.

²² Hunai deaungkho y nang i kamngo uikhei ly,. Areng teng y chiu so, hunaibaly nang i paleung y nang i dawn nai ly ang pahen pi lym ai mang.

²³ Nang ly atiti kho naira myh y hawi, kamngo kawm rang naira y awm, nanai kai pany,” napi.

²⁴ Naibaly Simon ly, “Nangchi i atiti thui naichi ly kai i tlang tleaung y ati sai py tym y ai nai Areng teng y chiu so pi kyh,’. nanai pathang.

²⁵ Hunaibaly nini my ly Areng i leu pany hai iy thui pajau nai bo y, Samrai pri i avang neangneangra y Satang Kahawi thui pi preiprei naimy Jerusalem y vawi teang bo.

Philipa hawi Ethiopia i miteaung keh

²⁶ Naibaly Areng i kani pri i amtaw thau nai leaungrei my Philipa teng y, “Angthau ly, tokalawi mang, Jerusalem dengdairei Kaza avang y theu nai lam y tako ba; huni ly daichi ka-vym ne,” napi.

²⁷ Hunaibaly ni ly angthau i tako bo. Naibaly khen cham, Ethiopia pri i khumi leaungrei Ethiopia samrang nu Kandak i anui i tli chum nai khumi, areng tahm asang parai nai, ni i yhmtheaung bawibawi kry nai keung ly Jerusalem y Tameuh ai chiu ai nai chei bo;

²⁸ naibaly mymy ly vawi mang y ly ka-ri tleaung y atang nai tarawi y amo Isaia i cha-iu phain prei prei.

²⁹ Naibaly Phailo my ly Philipa teng y, “Huni ka-ri ahawi y chei ly, amkawm ba,” napi.

³⁰ Naibaly Philipa ly ni teng y angpreng iy amo Isaia i cha-iu phain nai thai i, “Nang i phain nai ly awm nai sai pany thai a?” napi.

³¹ Naibaly ni my ly, “Ami py kai ai thui pi pachai y baly mana pany thai ai mo? napi. Naibaly mymy teng y ateh ai nai Philipa ai chi bo.

³² Naibaly mymy i Tameuh cha-iu phain nai ly hini ra y ne, “Beram tleh ai nai kamta ni ai ly mymychi my pahawi; Beram mui vau nai keung i mo y beram cho hang y nai kamta ly, Ni py leu katheu y.

³³ Mymy tahm apanem nai thym khala ly mymy i tlang tleaung y tara chih ai nai pei y leang. Mymy i kangpreangchi i satang ly ami my thui ai mo? Khaileaung pri i dengdairei mymy i hengra ly la pi bo,” nanai he.

³⁴ Naibaly tli chum nai khumi ly Philipa hawi arum i ni teng y, “Amo my hini leu ly ami i leu thui nai mo? Mymy i leu a. khumi takhra i leu a? nanai kang deng nai he,” napi.

³⁵ Naibaly Philipa my ly thui i, huni Tameuh cha-iu i leu pakeung i dengdairei amteaung iy mymy teng y Isu i satang thui pi.

³⁶ Naibaly lam y chei hawi nai thym khala y ly mani tui awm naira y mo tym i, tli chum nai khumi my ly, “Khen cham, hi y tui awm, kai baptisma nga ai nai ly ati my ang paka rai mo?” napi.

³⁷ [Naibaly philipa my, “Nang ly nang i paleung verei y ym baly avo,” napi. Naibaly mymy ly pathang i, “Isu Krista ly Tameuh i chapo ne, nanai kai ym,” napi.]

³⁸ Naibaly ka-ri ai ly anawn hai iy nini leaung nyhrei, Philipa hawi tli chum nai khumi ly tui y satla hawi, naibaly mymy ly ni ai baptis sa bo.

³⁹ Naibaly tui i nai theu kalau bo nabaly Areng i Phailo my ly Philipa ai la vui bo; naibaly tli chum nai khumi my ly ni ai niu ali y i, amo theu parai naimy chei prei bo.

⁴⁰ Na i py Philipa ai amichi my Azota avang y niu ali teang bi bo; naibaly mymy ly tako prei i Kaisari avang y tym pa-rei avang tleirei Satang Kahawi thui pi preiprei.