AMTAW 3 - Khumi Common Language Bible

Kheu kangbai ai hawi sa pi nai

¹ Naibaly Petera hawi Johan ly cho amang neng iy chiu sa ai nai neng khyp khala y ly, achura yhm kalen pui y kun ai nai kalau.

² Naibaly neampacho leaungrei ami mo, tapen khyp khala i dengdairei kheu tabai nai ai ajeaung; huni khumi ai ly achura yhm kalen pui y kun naichi teng y cheaung ai nai, achura yhm kalen pui katheu pa-kho Ka-pu nanai pakeung y kani tleirei paseaung jojo.

³ Huni khumi ly Petera nini Johan ai achura yhm kalen pui y kun ai tau nai niu i cheaung.

⁴ Naibaly Petera nini Johan ly ni ai khen jo i Petera my, “kaini ai khen rai he,” napi.

⁵ Naibaly mymy ly nini teng y ati mo nga ai nai athang khai nai khen.

⁶ Na i py Petera my, “Kai ly muku tangka sai py by y leang; na i py kai i awm nai kang pei keih ai: Nazaret Isu Krista i amyn y tako,” napi.

⁷ Naibaly mymy ly ni ai lamtang mang i kiu y amkhaw iy pathau, naiblay tlenrei khyh my mymy i kheu hawi kheumei hiu ly atho nga praw ryp.

⁸ Naibaly mymy ly tlenrei khyh my angthau iy angdo i, tako amteaung bo. Naibaly tako iy achaw ryry naimy Tameuh ai palo prei nai tarawi y nini hawi achura yhm kalen pui y kun teang.

⁹ Naibaly ni i tako nai hawi Tameuh ai palo nai ly khumi baw bawichi my niu: mymy ly achura yhm kalen pui katheu pa-kho Ka-pu nanai pakeung y ateh iy cheaung reng nai khumi ne, nanai py pany;

¹⁰ naibaly mymy i tlang tleaung y atiti tym nai ly khrikhri pa-rei lyh i dawn ai nai ngo y.

Achura yhm theung y Petera i leu thui nai

¹¹ Naibaly mymy ly Petera nini Johan ai amkhaw jo nai thym khala y ly, khumi bawibawichi my lyh parai i Solomon i dangkhum napi naira y angpreng achu.

¹² Naibaly Petera ly huna nai niu iy nichi teng y pathang i, “Nangchi Israela khumichi awi, hini ly ati mana nai rengrang napi lawh? kaini i sa thai naira hawi, kaini ly Tameuh ai tahm khai nai khumi ne nai deaungkho y teu kaini my ni ai tako hai thai nai ka-tawm ly ati mana nai kaini ai khen ryry lawh?

¹³ Abraham hawi Isaka hawi Jakob i Tameuh, achi i amsi sangumchi i Tameuh my ly mymy i Miseaung Isu ai ly palo nai bo he; ni ai ly nangchi my patiu hai i, Pilata my patheu ai tau nai khala y py mymy i mo y nangchi my ngai y nai ly.

¹⁴ Khumi Kachai hawi Khumi kahawi ai ly nangchi my ngai y iy, kasi nga nai keung ai ly nangmychi teng y patheu ai nai takeng u lawh i, Hengra sa nai keung ai ly nangchi my padei;

¹⁵ na i py mymy ai ly Tameuh my kadeichi theung i dengdairei pathau teang bo, kaichi ly huni pany hai nai keung ne.

¹⁶ Naibaly mymy i amyn y ym nai deaungkho y mymy i amyn my ly hini, nangchi i pany nai hawi niu nai khumi ai ly hawihai nai bo he: ne, mymy i saho y ym naira awm nai my ly nangchi bawibawi i mei ka-niu y ni ai hawihai pyn nai bo he.

¹⁷ “Naibaly amjo amnauchi awi, nangmychi hawi nangchi i miteaung kehchi hawi pany y nai deaungkho y hini ly sa nai teu, nanai kai pany mang.

¹⁸ Na i py Tameuh my amo bawibawichi i labeaung y mymy i Krista ly atiti ngari patang ai nai satang thai hai yb nai ly ang tym hai nai bo he.

¹⁹ Hunai deaungkho y nangchi i kamngochi ly tama hai thai ai nai uikhei u ly, ali u teang jau,

²⁰ hunaibaly Areng teng i dengdairei amcheng nai neng tym thai ai i, Isu, nangchi i vui y ang khai pi yb nai Krista ai ly ang pato thai ai nai:

²¹ ni ai ly ati cheaungkhang sa palai nai neng tym y ryrei ly kani my kawn ai nai tla rai: huni leu ly Tameuhmy khaileaung palum angchei khyp khala i dengairei amo kachaichi i labeaung y thui yb bo.

²² Ne, Mosi my py thui i, ‘Areng Tameuh my nangchi i amjo amnauchi theung i nai kai kamta amo leaungrei ai ang theu hai ai mang, ni my ly leu bawibawi nangchi teng y ang thui pi nai ngierei ly nangchi my tangai ai nai tla.

²³ Naibaly ami py huni amo i leu tangai y nai ngierei ly khumichi theung i nai tama hai vui ai,’ napi.

²⁴ Ne, Samuela awm nai dengdairei amo bawibawichi, kangkhym i chi my py leu thui pi nai bawibawi ly vai i satang thui pi rym teang.

²⁵ Nangchi ly amochi hawi leu maikawm chanauchi ne chy bo; huni ly Tameuh my nangchi i amsi sangumchi teng y adeu i Abraham teng y, ‘Nang i kangpreang deaungkho y khaileaung pri i cheng cheaungkhangchi tlamsa ai,’ napi.

²⁶ Tameuh my mymy i Miseaung ai khai pi i, nangchi bawibawi ai nangchi i kamngo i dengdairei hi vui iy amtheaung hai ai nai, nangmychi teng y ang pato pi manme nai bo he,” napi.