AMTAW 26 - Khumi Common Language Bible

Akripa i mo y Pawla akhi nai

¹ Naibaly Akripa ly Pawla teng y, “Nangmy i vui ly nang thui pajau mang,” napi. Naibaly Pawla ly kiu pataw i mymy i eaung nai leu thui:

² “Samrang Akripa awi, Judachi my kai ai ang seu nai bawibawi kai i eaung nai leu vaini ly nang i mo y kathui ai nai nga nai deaungkho y kai kawn ai nai awm, nanai kadawn;

³ ati mana nai mo nabaly Judachi theung y reita hawi leu adeng nai bawibawi ra y nang ly khri pa-rei cheng parai; hunai deaungkho y kai i leu hawihai palai tangai pi nem ai nai kang takeng.

⁴ “Angchei y kai thawndeang khala i dengdairei kai i chengchi theung y hawi, Jerusalem y py kai i awm nai sai ly Juda bawibawichi my pany mang;

⁵ angchei khala i kai i satang nichi py pany, huna nai kaichi i reita hawihai palai patawm angym nai kamkawm kamta kai ly Pharisai ne, nanai nichi ngai baly kai ai ang thui pi pajau.

⁶ Naibaly Tameuh my achi i amsi sangumchi teng y leu adeu nai athang khai nai leu y vai hi y tara ang chih pi ai nai kai angdo nai he;

⁷ achi i cheng holai nyhreichi my vum kanithun Tameuh i kalop hawihai palai my sa iy, huni leu adeu nai niu ai nai athang khai u lawh. Huni athang khai nai leura y Judachi my kai ai ang seu nai he, samrang awi.

⁸ “Tameuh my kadeichi ai pathau nanai ly ati mana nai ka-ym by y nai palawn lawh?

⁹ Kai py Nazaret Isu i amyn y aly hai y nai atiti neangneang sa ai nai avo, nanai athang khai.

¹⁰ Huni ka-tawm ly Jerusalem y kasa reng; naibaly pathyp pi nai keunng kalenchi teng y leu nga iy, khumi kachaichi theung i khumi neangneangchi ai theaung y kakhai; naibaly nichi ai padei nai thym khala y kai py avo, nanai asa teang.

¹¹ Naibaly achura yhm tleirei y kapajeng jojo i, thui tamawn hai akhikan ai nai katau; naibaly nichi i tlang tleaung y kai khrikhri pa-rei paleung patheang si parai i, pri takhra i avang y tym pa-rei kaimy ana reng.

Pawla mymy i paleung amtlau nai sai thui pi nai

¹² “Hunai ka-tawm sa ai nai, pathyp pi nai keung kalenchi i leu nga nai hawi, mymychi i pato nai cha syn iy, Damaska avang y kachei;

¹³ naibaly samrang awi, kai chei nai thym khala y ly kanithun kha y kani mang i dengdairei kangvang ati mo kani kangvang tleaung y angvang keh nai, kaimy hawi kai i tako ahawi naichi ahawi y ly angvang phang nai niu.

¹⁴ Naibaly kaichi bawibawi khaileaung y atlym i, Hebrai leu y, ‘Sawla, Sawla, nang ly ati mana nai kai ai ana ryry lawh? Cheaungvawi thun nai akatheng ai nai nang i vui no kyh,’ ang napi nai raawi kathai.

¹⁵ Naibaly kaimy, ‘Areng, nang ly ami mo?’ kanapi. Naibaly Areng my ly, ‘Kai ly Isu, nang i ana nai he;

¹⁶ na i py angthau ly, kheu y angdo, hini nang i atiti niu naichi hawi, nang teng y kai vai amteng ai nai atitichi py, krykeung hawi pany hai nai keung y kang palawn ai nai py, kai nang teng y amteng nai he;

¹⁷ khumi bawibawichi hawi, Cheng Takhrachi i kiu i dengdairei kang lawi hai ai mang;

¹⁸ mymychi i mei pali hai ai nai, hunaibaly kaveng dengdairei kangvang mang y hi vui thai ai nai hawi, Setan i aly peang naira i nai ly Tameuh mang y hi vui thai ai nai hawi, kamngo pahen naira nga thai ai nai hawi, kai ai ym nai deaungkho y chai chum naichi theung y yhmtheaung kamtym nga thai ai nai py, mymychi teng y kang pato nai he,’ napi.

Pawla ly mymy i sa nai sai thui pi nai

¹⁹ “Hunai deaungkho y samrang Akripa awi, kani mang i amteng nai ly kai tangai y nai by y leang, na i py angchei y ly Damaska avang i khumichi teng y py,

²⁰ Jerusalem y py, Judai pri meingtym tleirei y py, Cheng Takhrachi teng y py, uikhei iy Tameuh mang y hi nai uikhei nai amyn ataing ai nai atiti sa ai nai tla, nanai kathuipi nai teu.

²¹ Huna naira y Judachi my achura yhm kalen pui y kai ai ang patiu iy, ang padei ai nai tau lawh.

²² Na i py kai ly Tameuh teng i dengdairei sabawm naira kanga nai deaungkho y amochi hawi Mosi my thui nai leu tym ai nai harei ny y baly, vaini khrairei khumi katheangchi hawi khumi kalenchi teng y py leu pany hai nai kaawm jo;

²³ huna nai Krista ly ngari patang ai nai tla i, kadeichi theung i dengdairei angthau bi nai deaungkho y khumi bawibawi teng y hawi, Cheng Takhrachi teng y py kangvang niu hai man nai keung ne ai, nanai leu ly,” napi.

²⁴ Naibaly mymy ly hunai kamta eaung nai leu thui nai thym khala y Festa ly athorei my, “Pawla, nang ly pathu bo; nang i amtiu nai nawi ala naimy ang pathu hai nai bo tu ly,” napi.

²⁵ Na i py Pawla my ly, “Festa kahawi keh awi, kai ly pathu y chy bo; leu meitang hawi amkym ai nai leu kathui nai teu.

²⁶ Hini leu ly samrang py pany chy bo; mymy teng y py jei y naimy kathui chy bo; hini atitichi ly mymy pany y nai ha py by y, nanai kai hawihai palai pany; hini ly takun taki y sa nai ny y leang.

²⁷ Samrang Akripa awi, nang ly amochi i leu ym a? Nang ym, nanai kai pany,” napi.

²⁸ Naibaly Akripa ly Pawla teng y, “Kai ai maiden chy parawi iy Kristian palawn ai tau nai na a hi ly,” napi.

²⁹ Naibaly Pawla my ly, “Maiden chy i py, maiden chy ny y i py nang ai leaungrei kang napi nai khyh ny y leang, vaini kai i leu thai nai bawibawichi ai py kaimy ka-tawm awm ai nai Tameuh i saho y kai ngai na a, hini kawm naira harei khyh ny y naimy,” napi.

³⁰ Naibaly samrang hawi, aripeng hawi, Berniki hawi mymychi teng y ateh naichi py angthau u hawm;

³¹ naibaly chei u takhra iy, “Hini khumi ly dei ai nai hawi kawm ai ataing ai nai py hawi y nai ati sai py so y leang he,” nanai arum.

³² Naibaly Akripa my ly Festa teng y, “Hini khumi ly Kaisara teng y tym ai nai tau y nai khyly lawi ai nai teu na a,’ napi.