AMTAW 21 - Khumi Common Language Bible

Pawla ly Jerusalem y tym nai

¹ Naibaly kaichi ly nichi hawi amprei iy paleaung mang theu, huni bo y ly kataw chei prei i Kos tlawn y tym, naibaly khawn mang ly Rodi tlawn y tym bi i, hu i dengdairei chei iy Patara avang y tym bo;

² naibaly kaichi ly Phawiniki pri y chei ai nai paleaung harei niu i, hu y atang iy angpeang veangveang.

³ Naibaly Kupra tlawn niu i langvawi mang y khai vui iy, Suria pri mang y angpeang veangveang, naibaly Turi avang y paleaung i vawn takhyh ai nai tla nai deaungkho y hu y ly angkhyh bo.

⁴ Naibaly abangnaichi ai hau iy, hu y kani saryhrei ni awm; naibaly hunichi my ly Phailo i saho y Pawla teng y, “Nang ly Jerusalem y chei ai nai tlo y,” napi.

⁵ Naibaly huni neng chi bo nabaly kaichi theu i chei bi bo, nichi bawibawi ly, mymychi i aju chanauchi hawi apai ngam y khrairei pavum; naibaly pangli peang y kheukhu di iy kaichi chiu sa;

⁶ naibaly noso kahawi awm ba, nanai thui pajau iy paleaung y atang, nichi ly yhm y vawi ali teang bo.

⁷ Naibaly Turi avang i dengdairei paleaung mang chei pajau baly, Ptolemai avang y tym i amjo amnauchi ai noso hawi a? napi iy nichi teng y kanirei ni awm.

⁸ Naibaly khawn mang y ly theu i Kaisari avang y tym iy, Satang Kahawi thui pi nai keung Philipa i yhm y kun: mymy ly leaung saryhreichi theung i leaungrei nai ne; naibaly mymy teng y ni awm.

⁹ Naibaly huni khumi ly anglo kachai chaniu leaung palyhrei awm, nichi ly Tameuh i leu thui.

¹⁰ Naibaly hu y ly kani neangneang awm i hunai thym khala y ly Judai pri i dengdairei amyn Akaba napi nai Tameuh i leu thui nai keung leaungrei kathiu bo.

¹¹ Naibaly kaichi teng y jeu i Pawla i khobai la iy, mymy i kiu kheu akawm i, “Jerusalem y awm nai Judachi ly hinai kamta hini khobai keung ai kawm ai i, Cheng Takhrachi teng y au ai, nanai Phailo Kachai my hina nai thui bo,” napi.

¹² Naibaly kaichi ly huni leu thai bo nabaly kaichi hawi huni avang i khumichi my ly ni ai Jerusalem y chei y ai nai takeng.

¹³ Naibaly Pawla my, “Ati mana nai kai ai paleung si hai ai nai vo u ryry lawh? Areng Isu i amyn deaungkho y Jerusalem y kawm ai nai kavam nai khyh ny y leang, dei ai nai py kavam nai na a,” nanai pathang.

¹⁴ Naibaly pipi parawi pajau ai ny y nai bo y, kaichi ly Areng mymy ngaingai ne sy, nanai anawn bo.

¹⁵ Naibaly huni bo y ly kaichi i vawn angvei iy Jerusalem y chei kalau bo.

¹⁶ Naibaly kaisari avang i abangnai amichi mo kaichi hawi chei teang, nichi my ly Kupra tlawn i Mnasona, abang man nai khumi leaungrei ai kaichi ai anga hai ai nai pahawi bo.

Pawla ly Jakob ai de nai

¹⁷ Hunaibaly kaichi ly Jerusalem y tym baly amjo amnauchi my amo theu parai naimy ang kawn u.

¹⁸ Naibaly khawn mang y Pawla ly kaichi hawi Jakob teng y chei: miteaung keh bawibawichi py hu y awm.

¹⁹ Naibaly mymy ly nichi ai noso hawi a? napi pajau nai bo y, mymy i kalop sa naira y Tameuh my Cheng Takhrachi theung y atiti sa hai nai ngierei ly ka-kawi ka-mi thui pi vyhvyh.

²⁰ Naibaly amjo amnauchi ly huni leu thai baly Tameuh ai palo, naibaly nichi ly ni teng y, “Be awi, Judachi theung y ym naichi i khri pa-rei nawi nai sai ly nang niu i, nichi bawibawi ly Reita y hawihai palai dawn;

²¹ naibaly nangmy Cheng Takhrachi theung y awm nai Juda bawibawichi teng y ly mymychi i chanauchi i vui lengkhym takip y ai nai hawi, Reita kamta awm y ai nai py Mosi ai khai ai nai nang patiu reng, nanai khumichi i labeaung y nang i satang ly nichi pany bo.

²² Mana sa ai mo? Nang tym, nanai ly nichi pany takengkei ai.

²³ Hunai deaungkho y nang teng y kaichi i thui nai kamta ly so ba: atiti adeu nai sa angym ai nai neampacho leaung palyhrei kaichi teng y awm;

²⁴ hunichi ai hawi ly, nichi hawi vanrei apachai teang ly, nichi i sam vau thai ai nai nangmy vang pei; hunaibaly khumi bawibawichi my khumichi i labeaung y nang i satang pany nai ngierei ly sa tatang nai ny y leang, nanai pany ai i, nangmy kypkyp py Reita pataw nai hawihai palai awm, nanai pany ai mang.

²⁵ Na i py Cheng Takhrachi theung y ym naichi i molam ly, myn y atiti apathyp naichi hawi, thi hawi, mawi taauka nai cha nai hawi, angai nai hawi amkym ai nai tla, nanai kaichi chih i tajiu chum veng bo,” napi.

²⁶ Hunaibaly khawn mang y Pawla ly neampachochi hawi vanrei apachai iy, mymychi i apachai nai neng angym ai nai satang hawi, leaung leaungrei i vui atiti pei ai naira talam pi ai nai neng py thui pi rym ai nai, achura yhm kalen pui y nichi hawi kun.

Achura yhm y Pawla ai patiu nai

²⁷ Naibaly kani saryhrei chi ai nai takengkei khala y Asia pri i Judachi my ly Pawla ai achura yhm kalen pui y niu i khumi mipui bawibawichi ai thui thli iy, ni ai patiu i, “Israela khumichi awi, sabawm kyh.

²⁸ Hini khumi ly meingtym tleirei i awm naichi teng y khumi humchi ai hawi, Reita ai hawi, hini yhm ai py thui tamawn nai keung na a hi ly: huni ny y nai py mymy ly achura yhm kalen pui y Krikchi ai kun hai iy, hini yhm kachai y py panyng lawh,” nanai aeu.

²⁹ Huni ny y rai khala avang y Ephesi i khumi Trophima ai mymy teng y niu i, Pawla my huni khumi ai ly achura yhm kalen pui y kun hai nai athang khai.

³⁰ Naibaly avang theaungrei ahyn ja na i, khumichi angpreng achu: naibaly Pawla ai patiu i, achura yhm kalen pui i dengdairei ryh iy, katheu kho praw veng.

³¹ Naibaly mymy ai padei ai tau nai thym khala y Jerusalem i khumi bawibawi khyh tukulu nai satang ly tavaimi lu areng keh teng y thai hai.

³² Naibaly ni ly tavaimichi hawi tavaimi chungvairei luchi ai hawi praw iy, nichi teng y angpreng kathiu; naibaly nichi ly tavaimi lu areng keh hawi tavaimichi ai niu baly Pawla ai pakhau nai anawn bo.

³³ Naibaly tavaimi lu areng keh my ly ahawi y chei i mymy ai patiu iy sengkry vui nyhrei hawi kawm ai nai leu pei: naibaly ni ly ami mo, ati sa mo nanai deng.

³⁴ Naibaly khumi mipuichi theung y phyrei ly leu harei y aeu, phyrei ly leu takhra y aeu bi, naibaly tukulula nai deaungko y amny amcha thai y i, apai theung i yhm y pakun ai nai leu pei.

³⁵ Naibaly Pawla ly khailei y tym nai khala y khumi mipuichi my khrikhri pa-rei ni meimeaung nai deaungkho y, tavaimichi my ly ni ai kateang kalau veangveang;

³⁶ ati mana nai mo nabaly khumi mipuichi my abang i, “Lo veng,” nanai aeu lengleang na.

Pawla i akhi nai

³⁷ Naibaly Pawla ai ly apai theung i yhm y pakun nai thym khala y, mymy ly tavaimi lu areng keh teng y ly, “Kai nang teng y leu sairei thui pajau na a?” napi.

³⁸ Naibaly ni my ly, “Nang krik leu kawp nai sai a? Jangni y khumichi ai pachei piupa iy, damra khumi sang palyhreichi ai daichi ka-vym y pahawi nai keung, Aikupta pri i khumi ly nang ny y lawh a?” napi.

³⁹ Na i py Pawla my ly, “Kai ly Juda, Kiliki pri i Tarsa avang i khumi ne, avang ka-teng ny y naira y awm nai; kai ai pahen ly, khumi bawibawichi teng y kai ai leu thui ai nai pei kyh,” napi.

⁴⁰ Naibaly avo, napi bo nabaly Pawla ly khailei y angdo iy khumichi ai kiu y paka, naibaly nichi leu anawn sup i mymy ly nichi teng y Hebrai leu y,