AMTAW 1 - Khumi Common Language Bible

¹ Theophila awi, angchei i cha y ly Isu i atiti sa nai hawi, patiu angchei nai leu bawibawi ly,

² mymy ly Phailo kachai i saho y ni i vawi nai amtaw thau naichi teng y leu pei pajau iy, kani mang y pahawi kalau vui nai kani tym pa-rei nai leu ly kaimy tajiu bo.

³ Hunichi teng y ly mymy i ngari patang nai bo y neangneang pany kyp naira y mymy ly heng teang, nanai amteng hai iy, kani vui palyhrei sala y mymychi teng y amteng pi i, Tameuh i peang nai satang thui pi;

⁴ naibaly mymychi i awm achu naira y amkawm teang iy mymy ly, “Jerusalem i nai theu u moh; Ngaai i atiti adeu nai, kaimy kang thui pi nai ly ajeng u;

⁵ Johan ly tui y baptis sa reng, na i py kani kra y nai sala y nangchi ly Phailo Kachai y baptisma nga u ai,” napi.

Isu ai kani pri mang y hawi kalau nai

⁶ Naibaly nichi ly jeu achu iy ni teng y, “Areng, Israelachi teng y nangmy pri pei bi ai nai ly vai a?” nanai deng.

⁷ Naibaly ni my ly nichi teng y, “Ngaai my neng hawi kani mymy ngaingai awm ai nai sa rym nai ly nangchi pany ai nai avo y leang.

⁸ Na i py Phailo kachai my nangmychi i tlang tleaung y tym nai khala y nangchi ly sa thai naira nga u ai; hunaibaly Jerusalem y py, Judai pri hawi Samari pri verei y py, khuteng taki y tym pa-rei nangchi ly kai i leu pany hai nai keungchi lawn ai,” napi.

⁹ Naibaly huni leu thui pajau iy mychi niu ryhryh nai tarawi y ni ai kani mang y pahawi kaleu bo, naibaly khupanym my mychi niu pajau y naira y pahawi vui bo.

¹⁰ Naibaly nichi ly ni i kalau nai kani mang y khen ryry nai thym khala y, khen cham, khumi leaung nyhrei, kanih kangleung akhiu nai nichi ahawi y angdo.

¹¹ Nini my ly, “Kalili pri i khumichi awi, ati mana nai angdo naimy kani mang y khen u ryry lawh mo? Hini Isu, nangchi teng i dengdairei kani mang y pahawi kalau nai ly, kani mang y kalau nai nangchi i niu nai kamta mymy ly ang jeu takengkei teang ai,” napi.

Juda i meingtym y amtym nai

¹² Naibaly nichi ly Olive mawi napi naira i dengdairei Jerusalem y ali teang bo; huni mawi ly Jerusalem ahawi y awm, Anawn Kani y pavai salang ai nai hawi khyp.

¹³ Naibaly tym u i mymychi i awm naira salo i sambeu y lyn kalau bo; Petera py Johan py Jakob py Andria py, Philipa py Thoma py, Bartholomai py Matthai py, Alphai i chap Jakob py, Zelota kamkawmchi i khumi Simon py, Jakob i chapo Juda py.

¹⁴ Hunichi bawibawi ly neampachychi hawi, Isu i amhm Mari hawi, Isu i amjo amnauchi hawi paleung venrei my chiu sa nai patlaw y.

¹⁵ Hunai khala y ly (nichi bawibawi ly chungvai atlo leaung apomrei mo awm i) Petera ly amjo amnauchi theung y angdo iy,

¹⁶ “Amjo amnauchi awi, Phailo Kachai my Davida i labeaung y Isu ai patiu nai keungchi ai pahawi nai keung Juda i satang thui yb nai ly, huni Tameuh i cha-iu leu sai ly ang tym tanga nai bo.

¹⁷ Ni ai ly achi theung y kati tabawi nai ne i, hini krykeung kalop y py phy nga teang.

¹⁸ (Huni khumi ly my i kamngo vang y meingtym harei van; naibaly tla amkhiuh iy sala y apeu phiu ryp i tavi theu bebe.

¹⁹ Naibaly huni satang ly Jerusalem y awm naichi bawibawi my thai bo. Hunaibaly huni meingtym ly mychi i leu y Akeldama, napi; huni ly Thi Meingtym, nanai sai ne.)

²⁰ Sam cha-iu y, “My i awm naira ka-keu awm sy, Huni meingtym y ami py awm moh sy,” nanai hawi, “My i peang nai kalop ly khumi takhra my ngo sy,” nanai tajiu nai awm.

²¹ Hunaibaly Areng Isu achi theung y kun reng nai sala y ly Johan i baptis sa nai dengdairei achi teng i nai pahawi kalau vui nai kani tym pa-rei,

²² hini achi i amkawm reng naichi theung i khumi leaungrei ly kaichi hawi vanrei mymy i angthau bi nai pany hai ai nai keung lawn ai nai tla,” napi.

²³ Naibaly nichi ly leaung nyhrei ai vawi, leaungrei nai ly Josepha, Barsaba napi nai, amyn ka-reu Justa napi bi nai, naibaly leaungrei nai ly Matthia.

²⁴ Naibaly nichi chiu sa i, “Areng awi, nang ly khumi bawibawichi i paleung pany nai keung ne, Juda ly mymy i awm naira y chei ai nai phra i,

²⁵ hini krykeung kalop hawi amtaw thau nai kalop i jeng y awm ai nai, hinini khumi leaung nyhrei ai nangmy mani ai vawi mo, nanai kaichi ai pany hai kyh ba,” napi.

²⁶ Naibaly tambe va i, Matthia ai avah; hunaibaly ni ai ly amtaw thau nai holai hareichi theung y kati tabawi bo.