AMOS 2 - Khumi Common Language Bible

Moba khumichi ai tara chih nai

¹ Areng my, “Moba khumichi ly kamngo sa nai bo y sa panawi bi nai deaungkho y, kai ly nichi ai meitang khyp kapajeng ai. Nichi ly Edom samrang i hiuchi ai maidym satlawi palawn vui nai hawimy, Edom samrang ai tahm khai u y bo.

² Kai ly Moba pri salo y mai kani nai hai iy, Kerioth mary i amtangra yhmchi ai maidym satlawi palawn vui ai. Tavaimichi i aeu nai raawi, baw katyn hawi atiu nai katynchi amsau nanai neng khala y, Moba khumichi dei u ai.

³ Kai ly Moba samrang ai kapadei ai; Moba pri i lu sa nai keung bawibawichi ai tleh pawn ai,” napi.

Juda khumichi ai tara chih nai

⁴ Areng my, “Juda pri khumichi ly kamngo sa nai bo y sa panawi bi nai deaungkho y, kai ly nichi ai meitang khyp kapajeng ai. Nichi ly kai i leu pei naichi niu ngai y iy, kai i pei nai reita leuchi patawm u y. Mychi i amsi pajochi ahihawi iy, chiu nai teng y nai tameuhchi mang y mychi naimy abang i, lam tamang u bo.

⁵ Hunai deaungkho y kai ly Juda pri salo y mai kani nai hai iy, Jerusalem mary i amtangra yhmchi ai maidym satlawi palawn vui ai,” napi.

Tameuh my Israela khumichi ai tara chih nai

⁶ Areng my, “Israela khumichi ly kamngo sa nai bo y sa panawi bi nai deaungkho y, kai ly nichi ai meitang khyp kapajeng ai. Nichi ly kalai pe pajau y nai khumi kahawichi hawi, phainai makengrei vang malawn py kalai pe pajau y nai khumi kamawnchi ai, miseaung y jo u bo.

⁷ Nichi ly atho di nai khumi hawi jeaungmang nai khumichi ai chiu iy, khumi kamawnchi ai nui u pawn nai ne. Ampo hawi chapo ly miseaung neampachy leaungrei hawi i ahawi mei naimy, kai i amyn kachai ai tahm anem hai bo.

⁸ Chiu naira meingtym tleirei y khumi kamawnchi teng i kalai atheu nai kanihchi bai iy, i u nai ne. Nichi ly kalai awm nai khumichi teng i kalai atheu nai kreip hang ai, mychi i chiu nai Tameuh i achura yhm y nei u bo.

⁹ “Huna nai kamta ly kai i khumichi awi, kai ly nangchi i vui saitleang keung tanrei asang iy, ngopraibiu keung kamta atho awm parai nai Amori khumichi ai kataphra pi chauchau bo.

¹⁰ Kai ly nangchi ai Aikupta pri i dengdairei, kang pahawi nai ne. Daichi ka-vym theung y saneng vui palyh ryrei pahawi iy, Amori khumichi i pri ai nangchi peang ai nai kang pei bo.

¹¹ Kai ly nangchi i chapo phyreichi ai amo lawm ai nai py, nangchi i thawndeang deaungdi phyreichi ai naziri khumilawn ai nai py, kang vawi pi takhra bo. Aw Israela chengchi awi, hini ly ne angchi khyp nai ny y a? Hini ly kai, Areng i leu pei nai ne.

¹² Na i py nang ly naziri khumichi ai kreip hang nei hai iy, amochi ai ly kai i leu pei nai thui y ai nai paka u bo.

¹³ Naibaly kai ly nang ai khaileaung y kang chiu piupa ai i, nang ly choh pho kaji kawi cheng nai ka-ri kamta tangam ai.

¹⁴ Khri pa-rei angpreng rang parai nai khumichi malawn py tleaung ai ny y. Atho ham nai khumichi py atho bai ai i, tavaimi risachi py mychi i tlang atleu u pajau ai ny y.

¹⁵ Thailiho pa nai khumichi py khaw u pajau ai ny y. Khri pa-rei angpreng rang nai khumichi py law tleaung ai ny y; keaungngo tleaung i khumichi py, mychi i tlang tleaung u pajau ai ny y.

¹⁶ Huni kani y sorai keh nai risachi malawn py, mymychi i tavai ateaungchi khai su iy, angpreng u pawn ai,” nanai Areng my thui nai ne.