2 SAMUELA 3 - Khumi Common Language Bible

¹ Samrang Sawla ai sabawm naichi hawi, Davida ai sabawm naichi ly kra parai naimy tavai atiu u nai ne. Davida ly atho awmryh awmryh iy, my i paleung ka-echi ly atho diryh diryh bo.

Davida i chapochi

² Hebron mary y awm nai khala y Davida i nga nai chapo leaung tariureichi ly hinichi ne. Chapo chalu ly Amanon ne i, ni i amhm ly Jezarela mary i Ahinoam ne.

³ Chapo pa-nyh ly Khilet ne i, ni i amhm ly Karamela mary Nabala i aju tavau Abikaila ne. Chapo pa-thom ly Abasalom ne; ni i amhm ly keshura samrang Talamai i chaniu Maaka ne.

⁴ Chapo palyh nai ly Adonijah ne i, ni i amhm ly Haki ne. Chapo pa-ngo nai ly Sephatia ne i, ni i amhm ly Abitala ne.

⁵ Chapo tariu i nai ly Ithaream ne i, ni i amhm ly Ekala ne. Hini chapochi ly Hebron mary y tapen naichi ne.

Abana ly Davida hawi amkawm nai

⁶ Sawla i samrang kangpreang ai sabawm nai khumichi hawi, Davida ai sabawm nai khumichi tavai atiu nai krara krara nai dengdairei, Abana ly Sawla i amjo amnauchi tlang tleaung y sa thai naira awmra awmra bo.

⁷ Kanirei nai khala y Sawla i chapo Isboseth ly Abana ai Aiah i chaniu, Sawla i aju katheang Rizpah hawi i ahawi, nanai neng hai bo.

⁸ Huna nai neng hai nai molam y Abana ly khri pa-rei kado theu nai deaungkho y, “Kai ly Sawla hawi atakai nai khumi, nanai nang dawn sai a? Kai ly Juda pri hawi ai nai sa nai khumi, nanai pany ba. Angchei khala i dengdairei kai ly nang i ngampo Sawla i tlang tleaung y py, ni i amjo amnauchi hawi ahawi kamrawichi tlang tleaung y py, ka-ym awm nai keung ne. Nang ai py Davida i kiu y tym y ai nai atleu bo. Huna nai i py vaini nang ly kai ai hini neampachy hawi neng hai lawh lo-oh!

^9-10 Areng ly Sawla ai ni i katu chanauchi teng i nai pri la pi vui iy, Davida teng y pri khuteng taki y khrairei, Israela pri hawi Juda prichi i samrang y palyn ai nai adeu yb bo. Vai py kai ly huni adeu nai leu angym pa-rei so y lawh baly, Tameuh my kai ai dei pa-rei pajeng sy!,” napi.

¹¹ Isboseth ly Abana ai khri pa-rei jei i, leu sairei py tlau vam y bo.

¹² Huni neng khala y Davida ly Hebron mary y awm i, Abana ly savaichi pato i ni teng y, “Hini pri y ami my peang mo? Kai hawi vuinai asa baly, Israela pri verei nang mang y abawi pa-rei, kaimy sabawm ai,” napi.

¹³ Davida my, “Hawi mang, na i py nang ly kai teng y jeu nai khala y, Sawla i chaniu Mikhala ai hawi ai nai tla. Huna i naini kai ly nang hawi ka-dyh ka-dawi sa ai,” nanai pathang.

¹⁴ Naibaly Davida ly Isboseth teng y savaichi pato i, “Kai i aju Mikhala ai pei teang ba. Kai ly ni ai pom ai nai molam y, Philistia khumichi i lengkhym chungvairei hawi van nai ne,” napi.

¹⁵ Naibaly Isboseth ly Mikhala ai Laisa i chapo, juvo Paltiel teng i nai la hai teang bo.

¹⁶ Paltiel ly lam jeungrei vo naimy, Bahurim mary tym pa-rei Mikhala nithun abang bo. Na i py Abana my, “Yhm mang y vawi ali teang,” napi i, ni ly vawi teang bo.

¹⁷ Abana ly Israela lu sa nai keungchi teng y chei i, nichi teng y, “Nangchi ly Davida ai nangmychi i samrang y palyn ai ngai hai nai ly kra bo.

¹⁸ Vai ly nangchi i vui neng kahawi ne. Areng my, ‘Kai i khumichi ai Philistia chengchi hawi, takhra paleung ka-echi kiu i nai kai i miseaung Davida kiu hawi atleu ai’ nanai ang thui pi nai ly pany u,” napi.

¹⁹ Abana ly Benjamin cheng theaungchi teng y py thui pi nai ne. Naibaly ni ly Israela chengchi hawi Benjamin cheng theaungchi mana paleung adyh u mo, nanai Davida teng y thui pi ai nai, Hebron mary y chei bo.

²⁰ Abana ly khumi leaung apomreichi hawi, Hebron mary y awm nai Davida teng y tym nai khala y, Davida ly nichi i vui pawi sa pi i, pacho panei bo.

²¹ Abana my Davida teng y, “Kai ly vai chei iy Israela cheng vui jynreichi, samrang nang mang y amkawm ai nai sa pi ai. Nichi ly nang ai mymychi i samrang ne, nanai dawn u patyp ai. Naibaly nang ly nangmy ngai nai kamta, Israela pri verei y peang ai nai nga ai,” napi. Davida ly Abana ai chymme naimy pato jo bo.

Abana ai padei nai

²² Naibaly Juaba hawi Davida i takhra tavaimi risachi ly tavai atiura i lawm nai vawnsai neangneangchi hawi vawi u bo. Abana ly Davida hawi vanrei, Hebron mary y by y leang bo. Ati mana nai mo nabaly Davida my ni ai paleung kahawi my pato chum veng nai deaungkho y ne.

²³ Juaba hawi my i khumichi tym u nai khala y, samrang Davida teng y Abana tym nai hawi, ni ai Davida ly paleung kahawi my pato teang nai satang Juaba ly thai bo.

²⁴ Naibaly Juaba ly samrang teng y chei i, ni teng y, “Nang ly mana sa nai mo? Nang teng y tym nai Abana ai ly ati mana nai y pato teang lawh mo?

²⁵ Ni, hi y ang tym nai ly nang ai tapawp iy, nang i chei naira tleirei, nang i sa nai sai cheaungkhangchi khen paviu ai nai ang tym nai ne, nanai nang ly pany be!,” napi.

²⁶ Juaba ly Davida teng i theu nai bo baly, Abana ai palau teang ai nai savaichi pato bo. Nichi ly Abana ai Sirah tuikan i dengdairei hawi u teang bo. Na i py huni satang ly Davida pany y leang.

²⁷ Abana ly Hebron mary y tym nai khala y, Juaba ly ni ai mary apai sahawi y palau i, leu kamsyh arum ai nai ngai nai kamta sa iy, haisau hawi kajeu y thun vau bo. Hunai kamta Abana ai padei vui nai ly Juaba i amnau Asahela ai padei vui nai deaungkho y ne.

²⁸ Hini satang Davida my thai nai khala y ni ly “Abana ai padei nai molam y kai hawi kai i mipuichi ly kamngo pipi akau y leang, nanai Areng my pany nai ne.

²⁹ Huni molam y Juaba hawi ni i yhm dengtheungchi ly pajeng naira avum u sy! Ni i kangpreangchi teng y no nairachi, keaungsi man naichi, veung jei no angdo naichi, tavai keung y dei naichi, kajeu kanglam awm naichi awm sy!,” napi.

³⁰ Huna nai y Juaba ly amnau Abisai Kibeon meingtym y tavai tiu nai khala y, mychi i amnau Asahela ai padei nai molam y, Abana ai vawitheung tha u nai ne.

Abana ai up nai

³¹ Naibaly Davida ly Juaba hawi ni i khumichi teng y, baichuchi sei iy paisiu amchiu u ly Abana i vui vo tangam u ai nai leu pei bo. Naibaly veu ai tapreaung mang y tha nai khala y, samrang Davida py nithun mang abang teang.

³² Abana ai Hebron mary y up u bo. Samrang ly tapreaung y vo hang nai deaungkho y, takhra khumi bawibawichi py hunai kamta sa u teang.

³³ Davida ly Abana i vui y vo khulym thui hai nai ly hina nai ne. “Aw Abana awi, nang ly ati mana nai khumi ka-khum kamta dei lawh mo?

³⁴ Khumi hawi y nai i kiu y dei nai kamta, kiu y kawm y, kheu y deaungki thiu y naimy dei lawh bo ly!,” nanai ne. Huna nai khala y khumichi ly Abana i vui vo hai taleang bi bo.

³⁵ Teicha teinei cha nei ai nai Davida ai khumichi my kani khengrei parawi teu i py samrang my, “Kai ly kani avah y rai khala y cha nei lawh baly, Tameuh my kai ai dei pa-rei pajeng na sy,” nanai vaineng abeu bo.

³⁶ Hina nai sa nai sai ai niu nai khala y, khumichi ly ngai hai u. Meitang khyp, nichi ly samrang i sa nai ngiereichi khrei u nai ne.

³⁷ Davida i khumichi hawi Israela mipui bawibawichi ly Abana ai padei naira y samrang abawi y, nanai pany u.

³⁸ Samrang ly mymy i bangtangchi teng y, “Vaini ly Israela chengchi ai lu sa nai keung kalen leaungrei i dei nai kani ne, nanai nangchi pany u y a?

³⁹ Kai ly Tameuh my khai takhra nai samrang ne teu i py, vaini kai ly atho di bo. Zeruiah i chapochi ly kai i vui khri pa-rei paleung no hai au na lawh ly. Hini khumi hawi y naichi ai mychi i kamngolai y, Areng my pajeng na sy!,” napi.