2 SAMUELA 19 - Khumi Common Language Bible

Juaba my Davida ai thui tamawn nai

¹ Samrang Davida ly Abasalom i vui y vo tangam naimy awm, nanai satang ly Juaba teng y tym.

² Samrang ly chapo i molam y vo tangam naimy awm, nanai thai nai khala y, Davida i tavaimi risa bawibawichi i vui y huni kani eaung pawi ly paleung si nai pawi lawm lawh bo.

³ Tavai keung i preang nai deaungkho y kaji u nai tavaimichi kamta, nichi ly mary theung y tyn kryh y naimy kun u.

⁴ Samrang ly meimai atamym naimy, Aw Kai i chapo! kai i chapo Abasalom! Abasalom kai i chapo!” nanai aeu naimy vo bo.

⁵ Juaba ly samrang i yhm mang y chei i ni teng y, “Vaini nang ly nangmy i hengra ai py, nangmy i chapo chaniu, samrangnu hawi samrangnu ai kry nai keungchi i hengra ai py, atleu nai nang i khumichi ai tahm pasang ai nai jeng y, tahm panem bo.

⁶ Nang ly nang ai tamen nai khumichi ai nithun thun vui iy, nang ai niu ngai y nai khumichi ai atho pei bo. Nangmy i tavailu kalenchi hawi tavaimi risachi ai, ati sai py tahm khai y, nanai amteng hai bo. Vai i neng y ly kaichi bawibawi dei iy, Abasalom phai heng lawh ai nabaly, nang ly khri pa-rei amo theu ai, nanai kaichi pany pajau bo.

⁷ Vai, nang ly jeu iy nangmy i khumichi teng y paleung pahawi nai leu thui pi. Nang ly huna nai kamta so y lawh baly, khawndam khawn mang y huni khumichi theung i leaungrei py nang hawi vanrei awm ai ny y i, nangmy deungrei khri pa-rei patang naira avum ai, nanai kai ly Areng i amyn y vaineng abeu bo,” napi.

⁸ Naibaly samrang ly ang thau i, mary apai katheu pa-kho sahawi mang y chei iy ateh. Khumichi ly huni meingtym y samrang awm, nanai pany nai khala y mymy teng y ahihawi u bo. Hina nai thym khala Israela cheng bawibawichi ly mymychi i awm naira tleirei y preang u.

Davida ly Jerusalem mary y vawi teang nai

⁹ Pri verei y awm nai khumi bawibawichi my, “Samrang Davida ly achi ai paleung ka-echi kiu i nai atleu pi. Ni ly achi ai Philistia chengchi kiu i nai atleu pi. Na i py vai ly Abasalom i molam y, hini pri y khai su veng bo.

¹⁰ Achi ly Abasalom ai achi i samrang lawm ai nai asitui leih pi teu i py, ni ly tavai keung y dei veng bo. Hunai deaungkho y samrang Davida ai palau teang ai nai, ati mana nai y achi dawn y naimy awm u lawh mo?” nanai mymychi tengtawi a-ei u bo.

¹¹ Hina nai Israela chengchi arum u nai satang ly Davida teng y tym. Ati mana nai y nangchi ly nangmychi i samrang ai, samrang yhm mang y palau teang ai nai Israela chengchi tleaung y patyh u lawh mo?

¹² Nangchi ly kai i amjo amnau, kai hawi thi ngan ka-bichi ne. Kai ai palau ali teang ai nai ati mana nai patyh lawh ai mo?” nanai deng ai nai pathyp pi nai keung Zadok hawi Abijatha nini ai Juda cheng lu sa naichi teng y pato bo.

¹³ Huni bo y Davida ly Amasa teng y, “Nang ly kai i amjo amnau ne; vai i dengdairei nang ai Juaba i meingtym tavailu areng kehra y kang khai bo. Kai ly huna nai kaso y lawh baly, Tameuh my kai ai dei pa-rei pajeng na sy!” nanai amti pi ai nai py leu pei bo.

¹⁴ Davida i leu molam y Juda mipui bawibawichi i paleung tuinem hai nai deaungkho y nichi my, “Samrang hawi bangtang bawibawichi awi, vawi u ali teang ba,” nanai thui hai u bo.

¹⁵ Samrang i vawi nai lam tavo vai mang y tha ai nai, Kilakala mary y tym u nai Juda mipuichi ly Jordan tavo mang lamchung u bo.

¹⁶ Huna nai thym khala y Bahurim mary y awm nai Kira i chapo Benjamin cheng Shimei py, samrang Davida ai lamchung ai nai Jordan tavo y jeu kaliki bo.

¹⁷ Ni hawi vanrei Binjamin cheng khumi leaung sangrei abawi nai ne. Huni bo y Sawladengtheungchi i miseaung Ziba py, my i chapo leaung holai pangrei, miseaung leaung apomreichi hawi vanrei tym. Nichi ly samrang tym y rai khala my, Jordan tavo y tym u yb nai ne.

¹⁸ Nichi ly samrang i dengtheungchi ai tavo vai mang y tha ai nai hawi, samrang i kangai sa pi ai nai tavo angpeang u bo. Samrang ly tavo angpeang ai nai angveirym nai thym khala y, Shimei ly ni i mo y ambeu iy,

Shimei ai Davida my pahen nai

¹⁹ “Nang parai nai samrang awi, nang, Jerusalem mary i theu nai thym khala y, kai i tamang naichi pahen pi kyh ba. Huni molam y kai i tlang tleaung y paleung angai y nai khai moh ba. Huni ai ly pany pi jo moh kyh ba.

²⁰ Aw areng, kai ly kamngo sa lawh bo. Huna nai y tosyh mang y awm nai cheng theaungchi theung i, samrang nang hawi avum ai nai vaini tym manme nai ne,” napi.

²¹ Zeruiah i chapo Abisai my, “Shimei ai ly padei ai nai avo; ati mana nai mo nabaly ni ly Areng my vawi takhra nai samrang ai pasawi lawh nai deaungkho y ne,” napi.

²² Na i py Davida ly Abisai hawi ni i amjo Juaba teng y, “Nangni i dawn nai ly ami my hnei takeng mo? Nangni ly kai ai patang hai ai nai ngai nai sai a? Vai, kai ly Israela samrang lawm veng bo. Hunai deaungkho y vaini ly mani Israela cheng leaungrei ai py padei u moh,” napi chum baly,

²³ Shimei teng y, “Nang ly dei ai ny y, nanai kai adeu mang,” napi.

Mephiboseth ai Davida my pahen nai

²⁴ Naibaly Sawla i katu Mephiboseth ly samrang hawi avum ai nai tym. Ni ly samrang Jerusalem mary i theu nai dengdairei, eaung naimy vawi ali teang nai neng ryrei, my i khei asi y, labeaung mui avau y, ateaungchi py pasiu y nai ne.

²⁵ Samrang ly Mephiboseth Jerusalem mary i dengdairei tym nai khala, “Mephiboseth awi, ati mana nai y kai hawi abang y lawh mo?” nanai deng.

²⁶ Mephiboseth my, “Nang parai nai samrang awi, nangmy pany yb nai kamta kai ly kheu tabai nai khumi ne. Kai ly nang hawi vanrei keaungngo kano kasau atang iy abang ai nai keaungngo kano kasau tleaung y atangra khai hai i py, kai i miseaung ly kai ai tapawp nai ne.

²⁷ Ni ly kai i satang py ka-chawi naimy nang teng y amti pi bo. Na i py nang ly Tameuh i kani pri amtaw thau kamta ne nai deaungkho y, kai ly teng, nanai nangmy niu nai kamta sa bo.

²⁸ Kai i ampo yhm dengtheung bawibawichi ly nang i kiu y dei ai ataing naichi ne. Na i py nang ly kai ai nang i sabawi y cha ai nai pei bo. Samrang nang teng i pahen naira ati sai py hnei bi ai nai by y leang bo,” napi.

²⁹ Samrang my, “Nang katheu bi ai nai aly by y leang bo. Sawla i yhmtheaung katuichi ai nang hawi Ziba ly ka-hyh riri la hawi ai nai kai, dawn yb veng bo,” napi.

³⁰ Mephiboseth my py, “Huni bawibawichi ly Ziba amtym na sy. Samrang nang, hawihai palai tym teang nai my py, kai i vui ly paleung tuinem bo,” napi.

Bazilai ai Davida my pahen nai

³¹ Kilead pri i Bazilai py, samrang Jordan tavo angpeang nai khala tha ai nai Rokelim mary i dengdairei jeu kathiu bo.

³² Bazilai ly saneng vui tajarei awm i, khri pa-rei miteaung cheang na veng bo. Ni ly khri pa-rei nang chawn nai khumi ne nai deaungkho y, Mahanaim mary theung y samrang anawn nai thym khala, teicha teinei sabawm pi nai khumi ne.

³³ Samrang my ni teng y, “Kai hawi vanrei Jerusalem mary y abang; nang ai kaimy kang kry ai,” napi.

³⁴ Na i py Bazilai my, “Kai ly heng sau ai ny y leang bo; ati mana nai y samrang nang hawi Jerusalem mary y abang ai mo?

³⁵ Kai ly saneng vui tajarei awm. Ati mo ra py kai i vui ly amo theu naira by y leang bo. Cha nei teu i py kalum kathau, kamlym pany y leang bo. Khulym raawi py thai y. Kai ly samrang nang i vui myn kaji pho nai lawm ai.

³⁶ Hina nai tahm awm nai kawn vang hawi py ataing y leang bo. Na i py kai ly Jordan tavo angpeang iy, nang hawi vanrei abang daw ai.

³⁷ Amhm ampochi i tapreaung sahawi y kadei ai nai, yhm mang y vawi ai nai pei ba. Hi y kai i chapo Khimham awm; samrang awi, ni ai hawi jo ly nangmy ngai nai kamta so hai ba,” napi.

³⁸ Samrang my py, “Kai ly ni ai hawi jo ai i, nang i ngai nai kamta ni i vui sa pi ai. Nang i vui nang i takeng nai kamta sa pi ai,” napi.

³⁹ Naibaly Davida hawi ni i khumi bawibawichi ly Jordan tavo angpeang u. Samrang ly Bazilai ai pachawm iy, amtheaung hai bo. Naibaly Bazilai ly yhm y vawi bo.

Juda hawi Israela khumichi ly samrang molam y leu nawi u nai

⁴⁰ Samrang ly Jordan tavo angpeang nai khala y, Juda pri verei i khumichi hawi, Israela pri ka-hyhrei i khumichi ly samrang ai tha u. Naibaly samrang ly Kilakala mary mang y tako jo bo. Khimham py abang nai ne.

⁴¹ Huna nai khala Israela cheng bawibawichi ly samrang teng y jeu iy, “Kaichi i amjo amnau ne nai Juda khumichi ly nang hawi vanrei nang i yhm dengtheungchi, nang i khumichi ai Jordan tavo vai mang y tha pajau, nanai ati mana nai dawn u mo?” napi u.

⁴² Juda khumichi my, “Samrang ly kaichi i cheng theaung ne nai deaungkho y, kaichi ly hina nai kamta kasa u nai ne. Hunai deaungkho y nangchi ly ati mana nai kado theu u lawh mo? Kaichi ly teicha teinei kacha u iy, kawn vang kanga u lawh sai a?” napi u.

⁴³ Israela mipuichi my py, “Samrang Davida ly nangchi thui nai kamta nangchi i cheng theaung ne lawh teu i py, kaichi ly nangchi tleaung y phy horei abi keh nai ne. Nangchi ly ati mana nai y kaichi ai khen nau u lawh mo? Meitang khyp, samrang aipalau ali teang ai nai thui manme naichi ly kaichi ne,” napi. Na i py hini molam y Juda pri khumichi i thui nai ly Israela pri khumichi tleaung y ho keh nai ne.