2 SAMUELA 12 - Khumi Common Language Bible

Nathan my pany hai nai hawi Davidauikheih nai

¹ Areng ly amo Nathan ai Davida teng y pato nai deaungkho y, Nathan ly chei i samrang teng y, “Kanirei nai khala y mary hareira y khumi leaung nyhrei awm. Leaungrei ly nang i, leaungrei nai ly mawn parai.

² Khumi kanang teng y ly si hawi beram neangneang awm.

³ Khumi kamawn teng y ly my i van nai beramcho harei awm kalei khyh. Ni ly huni beramcho ai kry; beram cho ly chaniu kamta, mymy i cho chanauchi hawi vanrei veangryh veangryh bo. Ni ly beram cho ai my i cha nai teicha teinei pacho. Mymy i nei nai khaura i tui panei iy, phai tleaung y tapawm reng nai ne.

⁴ Kanirei nai khala y khumi kanang i yhm y angvyn leaungrei tym. Huni khumi kanang ly angvyn ai pacho ai nai, my i awm nai si hawi beramchi theung i tleh hai ai nai ngai y nai deaungkho y, khumi kamawn teng i beramcho la iy tleh i, angvyn ai pacho ai nai an sa pi lawh,” napi.

⁵ Huna nai khala y Davida ly khumi kanang tlang tleaung y khri pa-rei kado theu i, “Huna nai sa nai khumi ly dei ai nai avo!, nanai heng nai Areng i amyn y kai, vaineng abeu bo.

⁶ Ni ly hina nai pahyp y naimy ana nai molam y, ni i la vui nai beramcho harei i jeng y phy palyhrei heung teang sy,” napi.

⁷ Nathan my, “Huni khumi ly samrang nangmy ryp bo. Israela chengchi i Areng Tameuh my, ‘Kai ly nang ai Israela samrang y khai iy Sawla kiu tleaung i nai atleu bo.

⁸ Kai ly nang ai Sawla i pri hawi ajuchi kang pei bo. Israela pri hawi Juda prichi peang ai nai samrang lawm hai bo. Hunichi py anyp y rai nabaly, kai ly nang ai phy nyhrei kang pei panawi bi ai nai ne.

⁹ Nang ly ati mana nai y, kai i leu pei nai tangai y lawh mo? Ati mana nai hini hawi y naira sa lawh mo? Nang ly Uriah ai tavai keung y dei hai bo. Ammon khumichi ai ly ni ai padei ai nai pei iy, ni i aju ai la vui lawh ly!

¹⁰ Nang ly kai i leu pei nai tangai y naimy, Uriah i aju ai la veng nai deaungkho y, nang i kangpreangchi teng y ka-jei hawi parai naimy dei naichi awm ai.

¹¹ Kai ly nang i yhm dengtheungchi theung i naimy, nang ai patang hai nai keung leaungrei theu hai ai. Nang i ajuchi ai takhra khumi teng y, kaimy pei vui nai ly nang nui ai. Huni khumi my ly nang i ajuchi hawi kani thun tang y my, i ahawi nai py nang nui ai.

¹² Nang ly huni kamngo kangviu y sa bo. Kai ly Israela cheng vui jeungrei niu pajau ai nai, huni leaungsaichi kani thun tang y my tym hai ai’ nanai leu kang pei,” napi.

¹³ Davida my, “Kai ly Areng i ngai y nai kasa lawh bo,” nanai ahui baly Nathan my, “Areng ly nang i kamngo pahen bo i, deira i nai lawi hai bo.

¹⁴ Na i py nang i huni kamngo sa tamang nai ly Areng ai khri pa-rei mei aniu y naira tym hai lawh nai deaungkho y, nang i deaungdi ly dei ai,” nanai pany hai chum baly,

¹⁵ Nathan ly yhm mang y vawi vui bo. Uriah i aju hawi Davida i nga nai deaungdi ai, Areng my khri pa-rei no patang hai bo.

Davida i chapo dei nai

¹⁶ Davida ly deaungdi no hawi ali teang ai nai, Tameuh teng y chiu sa; samrang ly ati sai py cho nei y. Dym tleitleirei, my i takun theung y kun iy angsaveaungra y vumtorei aseaung nai ne.

¹⁷ Samrang yhm i miteaung kehchi ly jeu iy, ang thau ai nai khri pa-rei parawi teu i py akhi vui i, nichi hawi vanrei teicha teinei cho pi y bo.

¹⁸ Kani saryhrei bo y deaungdi ly dei i, Davida i bangtangchi ly huni satang ai samrang teng y thui pi ai nai vam u y. Nichi my, “Deaungdi heng nai thym khala y achi my takeng i py, samrang ly achi ai arum hai y. Hunai deaungkho y deaungdi dei nai satang, ni teng y achi ly mana thui pi vam ai mo? Ni ly amymy ai patang hai lawh na cham be!” na u bo.

¹⁹ Davida my nichi ly mychi tengtawi leu kamsyh y arum u nai niu i, deaungdi ly dei bo, nanai athang khai. Hunai deaungkho y nichi teng y, “Deaungdi ly dei bo a?” nanai deng. Nichi my py, “Ne, dei bo,” nanai pathang u.

²⁰ Davida ly angsaveaungra i nai ang thau i tui ahiu, sam aseu, ateaungchi ali. Naibaly Areng i yhm y chei iy chiu sa. Yhm mang y vawi teang nai khala y, samrang ly teicha teineichi hnei i, vaimy cha nei praw ryp nai ne.

²¹ Samrang i bangtangchi ly ni teng y, “Kaichi ly nang i sa nai sai dawn pajau y bo. Nang ly deaungdi heng nai thym khala y, vo naimy teicha teinei cho y nai ne. Na i py vai, deaungdi dei phai dei baly ang thau iy, cha nei lawh ly!” napi u.

²² Davida my, “Ne, deaungdi heng nai thym khala y cho nei y naimy vo tangam nai ne. Areng ly kai ai pahen iy deaungdi ai dei hai y ai, nanai kadawn.

²³ Na i py vai ly deaungdi dei chum bo i, kai ly mana biu hai ai mo? Kai ly deaungdi ai paheng teang thai nai sai a? Kanirei nai khala y kai ly ni i awm naira y kachei teang ai. Ni ly kai teng y mana khala y py, jeu ali teang thai y leang bo,” nanai pathang.

Solomon ai tapen nai

²⁴ Hunaibaly Davida ly mymy i aju Bathaseba ai paleung awmnem hai chum baly, ni hawi i ahawi bo. Naibaly Bathaseba ly chapo tapen i, Davida my Solomon nanai amyn pathi. Areng ly huni deaungdi ai tamen nai deaungkho y,

²⁵ mymy tamen nai molam y, huni deaungdi ai Jedidiah, nanai amyn pathi ai nai amo Nathan teng y leu pei bo.

Rabah mary ai Davida my peang vui nai

²⁶ Huna nai thym khala y Juaba ly Ammon pri i mary pui Rabah mary ai tiu i, peang vui ai nai thym khala y,

²⁷ Davida teng y, “Kai ly Rabah mary ai tiu i, mary ai tui pei nai tuikan nga vui bo.

²⁸ Nang ly nang teng y awm nai tavaimichi ai pangym iy, mary ai tiu ly nang my peang vui jau. Kai ly huni mary ai peang vui nai keung, nanai amyn kahawi angam vui ai nai ngai y,” nanai savai pato iy thui pi bo.

²⁹ Naibaly Davida ly mymy i tavaimichi ai pangym iy, Rabah mary ai tiu i nga.

³⁰ Samrang ly Ammon chengchi i Molech tameuh myn lu i muku lu khym la iy, adeung vui bo. Huni lukhym kaji ly sie vuipangrei awm i, vang kateng lengseaung harei tai nai ne. Samrang ly huni lengseaung la iy, mymy i samrang lukhymra y tai bo. Samrang ly huni mary tiura i nga nai vawnsai neangneangchi py syn vui nai ne.

³¹ Huni mary i khumichi ai hawi i, rawchi, phalavachi, atiuchi hawi sa nai kalop py, iukhi sa nai kalop py sa hai bo. Samrang ly Ammon pri i takhra marychira i khumichi ai py, hina nai kamta sa hai. Naibaly mymy hawi mymy i khumichi ly Jerusalem mary y vawi u bo.