2 SAMUELA 10 - Khumi Common Language Bible

Ammon khumichi hawi Suria khumichi ai Davida my tiu pajau nai

¹ Neng kra kyh nai bo y Ammon samrang Nahash ly dei i, ni i chapo Hanun samrang lyn bo.

² Samrang Davida my, “Ni i ampo Nahash ly kai ai tahm khai naimy ka-ym awm nai kamta, kai py Hanun ai tahm khai ai nai tla,” nanai thui iy Hanun teng y awm hai nem nai leu thui pi ai nai savaichi pato bo. Na i py savaichi Ammon pri y tym u nai khala y,

³ Ammon chengchi ai lu sa nai keungchi my mymychi i samrang teng y, “Davida ly ngampo ai tahm pasang ai nai i vui y, hini khumichi ai ang pato nai ne, nanai athang khai a? Ny y leang! Ni ly achi ai tiu pajau ai nai, mary i awm nai sai pany ai nai khen paviu nai keungchi kamta, nichi ai ang pato nai teu!” napi u.

⁴ Hanun ly Davida i pato nai savaichi ai patiu iy, labeaung mui ka-hyhrei vau pi vui i, baichuchi akeng tym pa-rei sei pi vui iy, pato ali teang bo.

⁵ Nichi ly vawi teang ai nai khri pa-rei kaji u nai ne. Huni satang Davida thai nai khala y, nichi i labeaung mui sau ali teang nai ryrei ly Jeriko mary y awm iy, huni bo y vawi u ai nai leu taviu bo.

⁶ Ammon khumichi ly Davida ai mychi i paleung ka-e y khai u lawh bo, nanai apany u nai deaungkho y, Betherhoba mary hawi Zobah mary i Suria tavaimi leaung 20,000 rei, Toba mary i khumi leaung 12,000 rei bo y, samrang Maaka hawi khumi leaung 1,000 reichi ai alai u nai ne.

⁷ Davida ly huni satang thai nai khala y, Juaba ai tavaimi kamkawm pui hawi pato bo.

⁸ Ammon khumichi ly Rabah mary i nai theu u iy, mary apai katheu pa-kho sahawi y meingtym la u. Suria khumichi, Toba mary i khumichi, Maaka i khumichi hawi takhra khumichi ly adymra y meingtym la u nai ne.

⁹ Juaba ly paleung ka-e tavaimichi my, nithun, mo ang tiu ai, nanai pany nai deaungkho y, vawi patyp nai Israela tavaimi risachi ai Suria chengchi mang y motha iy meingtym la hai.

¹⁰ Huni bo i takhra risachi ai ly my i amnau Abisai ai lu sa hai. Abisai py nichi ai Ammon khumichi mang y motha iy meingtym la hai bo.

¹¹ Juaba my Abisai teng y, “Suria khumichi my kai ai pajau nai niu baly, nang ly kai ai sabawm ba. Ammon khumichi my nang ai pajau lawh teu baly, kai ly nang ai sabawm ai.

¹² Achi ly ham parai naimy achi i khumichi hawi achi i Tameuh i marychi i vui atho sa iy tiu u sina! Areng ly mymy i ngai nai kamta so sy!” napi.

¹³ Juaba hawi my i khumichi ly atiu ai nai mo mang y lyn u baly, Suria khumichi ly angpreng u nai ne.

¹⁴ Hina nai Suria khumichi angpreng u pawn nai ly Ammon khumichi my niu nai khala y, nichi ly Abisai teng i angpreng u i, mary theung y kun u teang bo. Huna nai khala y Juaba ly Ammon khumi hawi atiura i nai anaw iy, Jerusalem mary y vawi u teang bo.

¹⁵ Suria khumichi ly Israela chengchi teng y tavai sum bo, nanai pany u nai khala y, mychi i tavaimi risa bawibawichi ai kachu teang.

¹⁶ Samrang Hadadeza ly Euphrat tavo nisi mang i Suria khumichi ai palau i, nichi ly samrang Hadadeza i tavailu areng Sobach my lu sa iy, Helam mary y tym u nai ne.

¹⁷ Davida ly huni satang thai nai khala y, Israela risachi ai angym hai i, Jordan tavo angpeang hai iy, Helam mary mang y amsa hai bo. Huni mary theung y Suria khumichi ly Davida awm nai mang y motha iy meingtym la u. Tavai atiu nai amteaung nai hawi,

¹⁸ Israela chengchi ly Suria khumichi ai neaung vui bo. Davida i khumichimy Suria tavai ka-ri lu sa nai leaung 700 reichi hawi, keaungngo atang nai risa leaung 40,000 reichi ai tamyh vui iy, paleung ka-e tavailu areng Sobach ai py tamo nga hai bo. Naibaly ni ly tavai keung y my dei nai ne.

¹⁹ Hadadeza i anui y awm nai samrangchi ly Israela chengchi i kiu y mymychi tavai sum u bo, nanai pany nai khala y, Israela chengchi hawi aly ai nai ka-dyh ka-dawi asa i, nichi i anui y awm u. Suria khumichi py Ammon khumichi ai sabawm bi ai nai vam u y leang bo.