2 SAMUELA 1 - Khumi Common Language Bible

Davida ly Sawla dei nai satang thai nai

¹ Sawla dei nai bo y Davida ly Amalek chengchi ai tiu pajau nai vawi ali teang i, Zikala mary y kani nyhrei awm.

² Khawn khutawi baly Sawla i awm nai tavai taira i dengdairei, thawndeang leaungrei tym; ni ly my i baichu sei iy lu tleaung y spryh aphui naimy, paleung si nai sai amteng bo. Ni ly Davida teng y chei i, tahm khai nai khaileaung y meung.

³ Davida my ni teng y, “Nang ly manira i dengdairei jeu nai mo?,” nanai deng. Ni my, “Kai ly Israela tavaimichi taira i preang nai ne,” nanai pathang.

⁴ Davida my, “Ati aly mo?,” nanai deng. Ni my ly “Kaichi i tavaimichi ly tavai sum i, khumi neangneangchi ly dei u bo. Sawla hawi ni i chapo Jonathan ai py padei vui bo,” napi.

⁵ Davida my ni teng y, “Sawla hawi Jonathan dei nai ly nang mana pany mo?,” nanai deng.

⁶ Ni my, “Kai ly Kilabo mawi saleung y awm nai thym khala y, Sawla ly my i tivi cheaung naira y anghawi naimy awm nai ai py, paleung ka-echi i tavai ka-richi hawi keaungngo atang nai risachi ly ni i sahawi y tym dudu nai py kaniu.

⁷ Huna nai khala y ni ly nithun mang y khen i, kai ai niu baly palau nai ne. Kaimy, “Kang tym bo areng awi!,” nanai pathang.

⁸ Samrang ly kai ai ami mo, nanai angdeang i, kai ly Amalek khumi napi.

⁹ Huna nai khala y Samrang ly “Kai ly khri pa-rei tamo nga nai y, dei ai bo. Hunai deaungkho y jeu iy kai ai padei ba!,” ang napi.

¹⁰ Na i py samrang ly atlym phai atlym baly dei ai nai teu bo, nanai kapany nai deaungkho y, kai ly ni ai kapadei vui bo. Naibaly samrang lukhym hawi kiuban y amchiu nai ka-si py leng iy, nang teng y kang syn pi nai ne areng awi,” napi.

¹¹ Davida hawi my i khumichi ly paleung si nai deaungkho y, mymychi i baichuchi sei u bo.

¹² Nichi ly tavai keung y Sawla hawi Jonathan py, Areng i khumi napi nai Israela chengchi neangneang dei nai deaungkho y, kani dym pa-rei biu hai naimy vo tangam u nai ne.

¹³ Davida my satang thai hai nai thawndeang teng y, “Nang ly mani pri i khumi mo?,” nanai deng. Ni my, “Kai ly Amalek cheng khumi ne; na i py kai ly nang i pri theung y awm nai ne,” nanai pathang.

¹⁴ Naibaly Davida my, “Nang ly ati mana nai Areng my khai takhra nai samrang ai padei vam mo?,” napi.

¹⁵ Naibaly Davida ly my i khumi leaungrei ai palau i ni teng y, “Hini khumi ai padei vui!,” nanai leu pei i, huni Amalek khumi ai dei pa-rei tleh vui bo.

¹⁶ Davida my Amalek khumi teng y, “Hina nai tym nai ly nangmy i sa nai leaungsai ne; nang ly Areng my khai takhra nai samrang ai kapadei bo, nanai thui khyp nai deaungkho y, nangmy ai nangmy padei nai teu bo,” napi.

Sawla hawi Jonathan nini i vui y Davida i vo tangam nai

¹⁷ Davida ly Sawla hawi Jonathan nini i vui y, paleung si nai khulym hawi, hina nai vo hai bo.

¹⁸ Naibaly huni ai Juda mipuichi teng y py, patiu pi ai nai leu pei. (Hini satang ai Jasa i cha-iu theung y tajiu typ bo.)

¹⁹ “Achi ai lu sa nai keungchi ly Israela mawichira y dei u veng bo! Achi i sorai risachi chau be veng bo!

²⁰ Huni satang ly kath mary theung y py, Asakelon mary lamchira y py, thui u moh. Philistia neampachychi amo theu ai nai ngo u moh sy; Tameuh by y nai khumichi i chaniuchi, amo theu ai nai ngo u moh sy.

²¹ “Kilabo mawichira y kani nai moh, kadam py tlo moh sy; huni mawichira i li, hlauchi ly deungrei amti amjang thawn moh sy! Ati mana nai mo nabaly, huni meingtym ly tavaimi soraichi i khopuichi taham si iy, Sawla i khupui ei cha naimy awm nai deaungkho y ne.

²² Atho awm nai khumichi ai ko naira y py, paleung ka-echi ai padei naira y py, Jonathan i thailiho ly ham parai iy, Sawla i haisau ly pahyp y nai ne.

²³ “Lyh ai hawi parai iy paleung ka-no hawi nai Sawla hawi Jonathan nini ly heng vanrei, dei vanrei, Ahmtlau tleaung y rang iy, khrangsichi tleaung y atho awm keh.

²⁴ “Israela neampachychi awi, Sawla i vui vo tangam u! Ni ly nangchi ai tahm awm nai ateaung hawi amthyp hai iy, vang kateng lengseaung, muku ateaungchi hawi ateaung hai bo.

²⁵ “Tavaimi soraichi ly dei u be bo. Nichi ly tavai keung y dei u nai ne. Jonathan ly mawichira y atlym i, dei jo bo.

²⁶ “Kai i amnau Jonathan awi, kai ly nang i vui paleung si parai bo; kai ly nang ai khri pa-rei tamen na a! Kai i tlang tleaung y nang i tamen nai ly lyh ai nai hawi parai i, neampachychi i tamen nai tleaung y py ty keh.

²⁷ “Tavaimi soraichi ly dei u be bo; nichi i tavai ateaungchi ly aphi su iy, teaung ai nai ngo y leang bo,”