2 NENG SATANG 9 - Khumi Common Language Bible

Sheba samrang nu pavai nai

¹ Sheba samrang nu ly samrang Solomon i amyn amthang nai thai nai deaungkho y, rai parai nai leusaichi hawi ni ai cham ai nai, Jerusalem mary y tym. Samrangnu ly aheaung apai neangneang hawi iy, rimuichi, vang kateng lengseaungchi, muku neangneang tang nai kula-iuchi hawi tym nai ne. Ni ly samrang i mo y tym nai khala, mymy i dawn yb nai leuchi deng bo.

² Samrang ly ha py takhawi y pa-rei pathang pi. Samrang i pathang pajau y nai ha py by y.

³ Sheba samrang nu ly Solomon teng i cheng nai leuchi thai iy, ni i sa nai samrang yhm py niu.

⁴ Samrangnu ly samrang i pawi pi nai teicha teineichi, bangtangchi i awm nai yhmchi, samrang yhm y kalop sa nai kamkawmchi hawi, nichi i ateaungchi atawm riri naichi, pawi keung y samrang ai pasawm patau nai miseaungchi hawi nichi i ateaungchi, Achura yhm y samrang i talam nai kapathyprachi niu nai khala, khri pa-rei lyh nai ne.

⁵ Samrang nu my samrang teng y, “Kai ly kaimy i pri y awm nai khala, nang hawi nang i cheng nai satang thai nai satang ly teng khyp na a!

⁶ Kaimy niu y rai khala ly huni satang kaym y. Nang ly khumichi my thui nai tleaung y malawn py cheng nai ne.

⁷ Nang i sahawi y kalop sa iy nang teng i cheng naira leuchi, thai nai khumichi ly khri pa-rei taham hawi!

⁸ Nang i Areng Tameuh ai ly palo u sy! Mymy ly nang ai khri pa-rei tamen nai deaungkho y, mymy i jeng y peang pajau ai nai Israela samrang lawm hai iy tahm pasang bo. Mymy ly mymy i khumi Israela chengchi ai tamen iy, deungtasarei kry ai ngai nai deaungkho y, peang nai reita khaw ai nai hawi leu meitang adyh adawi naimy awm ai nai, nang ai nichi i samrang lawm hai iy tahm pasang bo,” napi.

⁹ Samrang nu ly samrang Solomon teng y muku kaji sie 6223 rei, rimuichi hawi vang kateng lengseaung neangneang talam pi bo. Samrang Solomon teng y Sheba samrang nu my pei nai rimuichi kamta, vai mo mang y mana khala py niu bi y leang bo.

¹⁰ (Ophira mary i muku syn nai samrang Hiram hawi samrang Solomon i khumichi ly maicha keung hawi, vang kateng lengseaungchi py syn u.

¹¹ Solomon ly maicha keung ai Achura yhm hawi my i yhm khaileichi sa naira py, katyn kapau beu kawp naichi i vui taro katheang kalenchi sa naira py teaung nai ne. Huna tanrei hawi nai maicha keung ly jangni y, mana khala py niu u vai y)

¹² Samrang Solomon ly samrangnu teng i nga nai langseaungchi molam y, mymy pei ali teang nai langseaungchi bo y samrangnu i ngai nai atitichi py pei pi bo. Naibaly samrangnu hawi aheaung apaichi ly Sheba pri y vawi u teang nai ne.

Samrang Solomon i nang nai sai

¹³ Ka-sum ka-paichi my pei nai akeuchi bo y, saneng tleirei samrang Solomon teng y pei nai muku kaji ly sie 311,10 chang y nai ne.

¹⁴ Arabia samrangchi hawi Israela khu ka-peang i aripeangchi my py, muku hawi tangkachi pei pi.

¹⁵ Solomon ly khupui 200 rei sa; khupui harei y muku kaji sie 15 virei hawi mawm nai ne.

¹⁶ Muku kaji sie 6 virei hawi mawm nai khupui katheang 300 rei py sa. Ni ly huni khupui bawibawichi ai Lebanon daichi Hall ra khai hai bo.

¹⁷ Samrang ly samrang atehra bailang pui harei sa i, ka-hyhrei ly kasai nuh hawi, ka-hyhrei ly muku tangcheng hawi sa hai.

¹⁸ Huni samrang atehra bailang tleaung y lyn ai nai khailei kheubyn tariurei awm. Atehra bailang hawi tabi ryp iy muku hawi mawm nai kheuchiu py awm. Atehra bailang i langvawi lamtang kiu kheangra awm iy, huni i teng mang y angdo nai khrangsi myn ha harei awm.

¹⁹ Khailei kheubynchi tariureira y, makeng makengrei y khrangsi myn ha harei khai i, bawibawi ly khrangsi myn holai nyhrei awm. Huni samrang atehra bailang ka-tawm ly mani pri y py, by vai y leang.

²⁰ Samrang Solomon i tui nei nai khau ngierei ly muku hawi sa iy, Lebanon daichi Hall ra awm nai khau hawi ateaung alangchi py, muku tangcheng hawi sa nai ne. Solomon i deung y ly tangka ai vang kateng palawn y.

²¹ Ni teng y samrang Hiram i sampho kamkawm hawi vanrei, pangli y chei nai samphochi awm. Ni i samphochi ly muku, tangka, kasai nuh, khumi tavym hawi kalaichi tang iy, saneng thomrei y tlenrei vawi teang nai ne.

²² Samrang Solomon ly khaileaung pri y awm nai samrang bawibawichi tleaung y nang iy cheng keh bo.

²³ Nichi ly Solomon teng y Tameuh my pei nai cheng nai leuchi tangai ai nai ni teng y jeu u.

²⁴ Nichi bawibawi ly muku hawi tangka, ateaungchi, tavai ateaungchi, rimuichi, keaungngo hawi keaungngo kaneaung kasauchi, Solomon i vui saneng tleirei syn pi nai ne.

²⁵ Samrang Solomon teng y tavai ka-richi hawi keaungngochi i vui keaungngo hai 4,000 rei awm iy, keaungngo risa leaung 12,000 rei py awm. Keaungngo risa phyreichi ly Jerusalem mary y py, phyreichi ai ly takhra marychira py khai nai ne.

²⁶ Solomon ly Euphrat tavo dengdai Philistia pri hawi Aikupta pri khujyh khrairei, meingtym tleirei i samrangchi ai peang bo.

²⁷ Ni i peang nai deung y tangka ly Jerusalem mary theung y lengseaung kamta py, saitleang keung ly Juda mawi kheutang ra y prau nai thaidu keungchi kamta nawi nai ne.

²⁸ Solomon ly keaungngochi ai Musari napi nai Aikupta hawi takhra prichira i pakun nai ne.

Solomon i peang nai satang kadawi

²⁹ Solomon i satang ly angchei khala i dengdai tem pa-rei amo Nathan i cha-iu, Shiloh mary Ahijah i amo cha-iu, Israela samrang Jeroboam i peang nai satang py tajiu nai amo Iddo i paleung mei y niu nai cha-iuchi ra y tajiu pi typ bo.

³⁰ Solomon ly Jerusalem mary samrang yhm y awm iy, Israela pri y saneng vui palyhrei peang.

³¹ Ni dei nai khala mymy ai ly Davida mary theung y up bo. Naibaly my i chapo Rehoboam ly samrang y lyn nai ne.