2 NENG SATANG 8 - Khumi Common Language Bible

Solomon i sa nai kalop amcheang pa-rei sa naichi

¹ Solomon i Achura yhm hawi samrang yhm sa nai ly saneng apomrei ateng nai ne.

² Ni ly mymy ai samrang Hiram my pei ali teang nai marychi py sa palum teang i, huni marychi ra y khuteng sa ai nai Israela chengchi pato bo.

³ Ni ly Hamath hawi Zobah khu ka-peangchi py tiu nai nga vui iy,

⁴ khutaha daichi ka-vym ra awm nai Tadamoth mary ai lengseaung apai pahi nai ne. Hamath khu ka-peang ra i cha nei vawn pateung achu nai marychi py, sa palum teang bo.

⁵ Solomon ly anui mang i marychi ai py sa palum teang nai ne. Tleng saleaung Beth Horon mary hawi tlawi saleaung Beth Horon mary (mary apaichi hawi katheu angtleangrachi sa),

⁶ Baalath mary, cha nei vawn pateung achu nai marychi, keaungngo hawi tavai ka-richi khai nai marychi ne. Jerusalem mary, Lebanon mawi, pri meingtym tleirei y my i ngai nai ryrei sa.

^7-8 Solomon ly Israela chengchi my Kanan pri y peang ai nai tiu nai thym khala, padei y naimy awm rai nai Kanan khumichi i kangpreangchi ai, my i kalop ram ra teaung bo. Hunichi theung y Amori cheng, Hiti cheng, Perizi cheng, Hivit cheng hawi Jebusi chengchi abawi u bo. Huni khumichi i kangpreangchi ly vaini khrairei miseaung y awm u jo nai ne.

⁹ Samrang my mani Israela cheng ai ly kalop ram ra tabawi y leang. Nichi ly tavaimi risachi, tavailu arengchi, tavai ka-ri luchi hawi keaungngo atang nai risachi ra y kalop sa u.

¹⁰ Samrang Solomon i sa ai paran nai kalopchi ra y sa nai kalop ramchi ai, kalop pacheang nai keung leaung 250 rei awm nai ne.

¹¹ Solomon ly my i aju, Aikupta samrang i chaniu ai Davida mary i dengdairei, ni i vui sa pi nai yhm y palyn bo. Samrang my, “Leu Maikawm Pawm awm reng nai meingtym ly chai parai nai deaungkho y, huni neampachy ly Israela chengchi i samrang Davida i yhm y awm ai nai avo y,” napi.

¹² Solomon ly Achura yhm mo y my i sa nai maicham ra y kapathyprachi talam bo.

¹³ Ni ly Mosi i reita kamta anawn kanichi, lo si pawi kanichi hawi, sanengrei y tlenrei sa nai pawi thomrei, angbo abawi y nai pawi, chohboleh pawi hawi Taichy pawichi khala, leng patlum nai kapathyprachi talam nai ne.

¹⁴ Ampo Davida my sa pi yb nai reita kamta, samrang ly pathyp pi nai keungchi kani tleirei sa ai nai kalopchi py, Pathyp pi nai keungchi i kalop sa naira y sabawm iy khulym thui u nai Levi theaungchi i kalopchi py, pasym pi yb bo. Tameuh i miseaung Davida my leu pei nai kamta, Achura yhm typ nai tamcheaung risachi py, kani tleirei sa ai nai kalopchi kamkawm phy pi bo.

¹⁵ Vawnsai pateung achu nai yhmchi, takhra kalopchi molam y Davida my leu pei naichi py, harei py takhawi y pa-rei sa u bo.

¹⁶ Vai ly Solomon i paran nai kalopchi ly sa angym be bo. Areng i Achura yhm leng amteaung khyp khala i dengdairei, sa nai kalop amcheang nai neng tym pa-rei, sa ai awm nai kalop ngiereichi ly eaung naimy pajau be bo.

¹⁷ Naibaly Solomon ly Edom pri, Akuaba pangli katheaung ra awm nai, sampho khenra marychi napi nai Ezijokeba mary hawi Elath mary mang y chei.

¹⁸ Ni teng y samrang Hiram ly my i pangli sampho ra y kalop kawp naichi hawi, sampho ra y kalop kyh chaw nai khumichi abawi nai samphochi pato pi bo. Nichi ly Solomon i pangli theung y kalop ra kyh chaw naichi hawi vanrei, Ophira mary mang y sampho hawi chei i, muku chang sie 18665 rei vi, Solomon teng y syn pi u nai ne.