2 NENG SATANG 32 - Khumi Common Language Bible

Jerusalem mary ai tiu ai nai Asuria chengchi my pajei pahyn nai

¹ Hina nai bo y samrang Hezekia ly ka-ym awm naimy Areng i kangai sa nai bo y, Asuria empara samrang Senakheri ly Juda pri y tiu ai nai kun bo. Ni ly khaw parai nai marychi ai katanmeuh iy, mary apaichi taphra naimy kun ai nai mymy i tavaimi kamkawmchi ai leu pei nai ne.

² Senakheri ly Jerusalem mary ai py tiu ai nai dawn yb bo, nanai Hezekia pany nai khala y,

^3-4 mymy i miteaung kehchi hawi arum i, Asuria chengchi tym nai khala tui ngo y ai nai, mary angam mang y paleaung nai tui lamchi paeng hai vui bo. Miteaung kehchi ly khumi neangneang palau iy, tui kho bawibawichi padeng u pawn nai ne.

⁵ Samrang ly mary khaw hai ai nai mary apaichi palum nai, angdeangra yhmchi sa nai, mary angam mang y apai tapang bi nai, hunichi sa bo. Huni bo y Jerusalem mary kangngym nisi mang i abyhra amkeuchi palum teang iy, tivi hawi khupui neangneangchi sa hai bo.

⁶ Samrang ly mary i khumi bawibawichi ai tavaimi kamkawm miteaung kehchi anui y khai i, mary apai katheu sahawi i khaileaung kakaura y angym hai bo. Naibaly ni my,

⁷ “Sorai paleung hawi atho so u. Asuria empara samrang ai py, ni my lu sa nai tavaimi kamkawm ai py jei u moh. Ni i sa thai naira tleaung y len keh nai sa thai naira achi theung y awm.

⁸ Ni mang y khumichi i sa thai naira naini awm khyh; achi mang y ly ang sabawm iy achi i tavai atiu naira y abawi nai achi i Areng Tameuh awm,” napi. Hina nai samrang i leu deaungkho y, khumichi ly atho nga u bo.

⁹ Neng kra kyh nai bo y Senakheri ly mymy i tavaimi kamkawm hawi vanrei Lakhisa mary y awm nai thym khala, Hezekia hawi Jerusalem mary y awm nai Juda khumichi teng y savai pato i,

¹⁰ “Nangchi Jerusalem mary i khumichi ly mary katanmeuh nai avum i malawn py, nangchi ly ati mana nai paleung tienem naimy awm u lawh mo, nanai kai empara samrang my leu kangdeng nai ne.

¹¹ Hezekia my nangchi i Areng Tameuh ly nangchi ai kai i kiu tleaung i nai atleu ai, nanai thui bo. Na i py Hezekia ly nangchi kajeu ka-lam y dei u tliu ai nai parawi hyp nai leu teu.

¹² Areng ai chiu nai meingtymchi hawi maichamchi taphra iy, Juda khumichi hawi Jerusalem mary i khumichi ai, maicham hareira y mui katui leng patlum iy, chiu u ai nai thui pi nai keung ly Hezekia ne.

¹³ Kai hawi kaichi i amsi pajochi ly pri tleirei i khumichi ai mana sa mo, nanai nangchi pany u y nai sai a? Takhra mani pri i tameuhchi ly mymychi i khumichi ai Asuria empara samrang kiu i nai atleu u a?

¹⁴ Huni prichira awm nai mani tameuh ly mymy i khumichi ai, kai i kiu tleaung i nai atleu pi vai sai a? Huna nai ne i py nangchi i tameuh ly nangchi ai atleu pi pajau, nanai ati mana nai nangchi athang khai u mo?

¹⁵ Vai ly nangchi ai Hezekia my li-tapawp moh sy; ni i leu ai nangchi ym u moh! Mani pri i tameuhchi ly my i khumichi ai Asuria empara kiu i atleu pi nai awm vai y leang. Hunai deaungkho y nangchi i tameuh py, nangchi ai atleu pi pajau y leang!,” nanai thui hai nai ne.

¹⁶ Asuria tavailu areng my py Areng Tameuh hawi Areng i miseaung Hezekia i tlang tleaung y, huni tleaung y thui tamawn nai leu katheu rai nai ne.

¹⁷ Empara samrang ly Israela chengchi i Areng Tameuh ai amtang naimy pa pi nai cha ly “Pri tleitleira i tameuhchi ly mychi i khumichi ai, kai i kiu i nai atleu u pajau y leang. Hezekia i tameuh py my i khumichi ai kai i kiu tleaung i nai atleu pajau ai ny y,” nanai ne.

¹⁸ Tavai lu arengchi ly mary apai salo i Jerusalem mary khumichi ai pajei nai paleung phra pa-rei sa u iy, mary ai rai y naimy peang vui thai ai nai Hebrai leu hawi aeu u nai ne.

¹⁹ Nichi ly Jerusalem mary khumichi i Tameuh ai, khumichi i kiu hawi sa nai mynchi napi nai, cheng takhra khumichi i tameuhchi hawi vanrei pahyh iy katheu u bo.

²⁰ Huna nai khala y samrang Hezekia hawi Amoz i chapo amo Isaia nini ly kasabawmra nga ai nai Tameuh teng y aeu naimy chiu sa hawi bo.

²¹ Areng ly kani pri amtaw thau ai pato iy, Asuria tavaimi risachi hawi tavai luchi ai padei hai nai ne. Naibaly empara samrang ly kangji nga naimy Asuria pri mang y vawi bo. Kanirei nai khala y ni ly my i tameuh achura yhm y awm nai thym khala, chapo phyreichi my ni ai haisau hawi tleh u bo.

²² Hina nai kamta Areng ly samrang Hezekia hawi Jerusalem mary i khumichi ai Asuria empara samrang Senakheri kiu i nai py, takhra paleung ka-echi kiu i nai py atleu iy, tengpang sahawi i prichi hawi aly naira pei bo.

²³ Khumi neangneangchi ly Areng i vui katalamrachi hawi, samrang Hezekia i vui langseaungchi py, Jerusalem mary y syn pi u bo. Huni neng dengdairei Hezekia ly pri takhrachi i mo y, tahm asang nai ne.

Hezekia no nai hawi amlyh am-e nai

²⁴ Huni neng thym thang khala y samrang Hezekia ly deivi pa-rei no nai deaungkho y, chiu sa nai ne. Areng ly ni i no hawi ali teang ai nai ka-ma-ra pei pi bo.

²⁵ Na i py samrang Hezekia ly amlyh am-e nai deaungkho y, Areng i sa pi nai ai kawn ai nai pany y. Huna nai y Juda pri khumichi hawi Jerusalem mary i khumichi ly patang naira avum u.

²⁶ Kangkhym y Hezekia hawi Jerusalem mary i khumichi ly tahm anem nai paleung awm u nai deaungkho y, Areng ly Hezekia i deung y khumi mipuichi ai pajeng pi y nai ne.

Hezekia i nang chawn nai hawi tahm asang nai

²⁷ Samrang Hezekia ly nang chawn iy khumichi i mo y tahm asang nai ne. Ni ly muku, tangka, vang kateng lengseaungchi, rimuichi, khopuichi hawi takhra vang kateng vawnsaichi khai ai nai yhmchi sa bo.

²⁸ Choh, kreip hang hawi olive asituichi khai ai nai yhmchi, my i si, painochi khai ai nai sireungchi, beramchi i vui haichi py sa nai ne.

²⁹ Areng ly ni ai hunichi bo y si, beramchi hawi takhra yhmtheaung katui neangneangchi py pei pi nai deaungkho y, ni ly mary neangneangchi palum bo.

³⁰ Kihon micheaung mang leaung nai tui lam py paeng vui chum baly, khaileaung kho tai iy Jerusalem mary apai theung i ly-um y tui paleaung nai keung ly Hezekia ne. Hezekia ly sa nai tleirei y eaung naira nga.

³¹ Hini pri theung y tym nai lyh ai nairachi khen ai nai Babulon savaichi tym nai khala malawn py, Tameuh my Hezekia ai cham ai nai ni i ngai nai kamta sa ai nai pei pi nai ne.

Hezekia i peang nai deung tem nai

³² Samrang Hezekia i sa nai leaungsai ngiereichi hawi Areng teng y ahihawi nai saichi ai Amoz i chapo Isaia i paleung mei y niu nai cha-iu, Juda samrang hawi Israela samrangchi i cha-iu theung y tajiu pi typ nai ne.

³³ Samrang Hezekia dei nai khala y ni i veu ai ly samrangchi i tapreaung salo ka-theng y up bo. Ni dei nai thym khala Juda khumichi hawi Jerusalem mary i khumichi ly ni ai khri pa-rei tahm pasang u nai ne. Chapo Manase ly ampo i meingtym amtym iy samrang lyn bo.